នាវេលានេះ ប្រធានគណបក្សនយោបាយម្នាក់ គួរតែត្រូវចេះដោះស្រាយវិបត្តិស្នេហ៍ ឲ្យប្រិយមិត្តរបស់ខ្លួន។ នេះ បើសិនជាគេយោង​តាមកម្មវិធីថ្មីមួយ ដែលទើបត្រូវបានបង្កើតឡើង ដោយប្រធានគណបក្សសម្ព័ន្ធ ដើម្បី​ប្រជាធិបតេយ្យ (ហៅខ្លួនឯងថា គណបក្សជួង) ចាប់ផ្ដើមធ្វើ ពីល្ងាចថ្ងៃទី៧ ខែកញ្ញា វេលាម៉ោង១៧នេះ​តទៅ។ លោក ខឹម វាសនា ផ្ទាល់ នឹងក្លាយជាវាគ្មិន​ដោះស្រាយវិបត្តិស្នេហ៍ ទៅដល់ជនណាទាំងឡាយ ដែលចង់​បាន​មតិ​យោបល់ ពីលោក។

យ៉ាងណាក៏ដោយ ក៏តួនាទីរបស់លោក នៅក្នុងកម្មវិធីថ្មី ត្រូវបានលោក ខឹម វាសនា ខ្លួនលោកបកស្រាយថា ជា​ការ​សាក​ល្បងមួយ ដើម្បីក្លាយ​ជាវាគ្មិន​​ធ្វើ​កិច្ចការងារ​នេះ​ ដោយធ្វើការផ្សាយផ្ទាល់ តាមហ្វេសប៊ុក។ ប្រធាន​គណបក្ស​​សម្ព័ន្ធ ដើម្បីប្រជាធិបតេយ្យ បានសរសេរ នៅលើគណនីហ្វេសប៊ុក របស់លោកថា៖ «អ្នកណា​ក៏​ដោយ ឲ្យ​តែ​មាន​វិបត្តិស្នេហ៍ អញ្ជើញចូលមកចុះ​ ពូសាកល្បង ជួយឲ្យយោបល់សាកមើល។ ចង់រកមុខ​របរ​បន្ថែម​​មួយ​​ទៀត ដើម្បីបង្កើនប្រាក់ចំណូល។»។

ប្រធានគណបក្សជួង បានសរសេរនៅពេលក្រោយបន្តិចមក ទាក់ទងនឹងកម្មវិធីថ្មីរបស់លោកទៀត​ថា៖ «មិន​មាន​​ប្រធានបទអីទេ​ តែបើឲ្យដាក់ប្រធានបទ គឺនឹងដាក់ថា​ "មនុស្សស្រីណាចូលចិត្ត​ឲ្យ​មនុស្ស​ប្រុស​លួងលោម ​ នោះ​​គឺ​​មនុស្ស​​ស្រី​នោះ ចូលចិត្តឲ្យ​មនុស្ស​ប្រុស​បោក"»។

ដំណោះស្រាយ? ទៅរកគ្រូស្នេហ៍ទៅ!

បន្ទាប់ពីកម្មវិធីថ្មីនេះ បានពន្លេចជារូបរាងរួច មានប្រិយមិត្តជាយុវជនមួយចំនួន បានហៅចូលទៅ​ជជែក​លេង​ ជា​មួយលោក ខឺម វាសនា ទាក់ទងនឹងទុក្ខកង្វល់ ឬបញ្ហាមួយចំនួន ដែលបានកើតឡើង​ចំពោះ​ខ្លួន​គេ​ផ្ទាល់ ក៏​ដូច​ជា​​កើតមានជាទូទៅ។ ការជជែកនោះ ក៏បានអនុញ្ញាត ឲ្យប្រធានគណបក្សរូបនេះ យកប្រវត្តិ​របស់​គ្រួសារ​លោក ជា​ពិសេស​ឪពុកលោក មកនិយាយជាសាធារណៈនោះដែរ។

ចំពោះយុវជនម្នាក់ ដែលបានប្រកាសក្ដីស្នេហ៍របស់ខ្លួន ទៅលើស្ត្រីមេម៉ាយម្នាក់ តែបែរជាត្រូវខាងស្រីមិន​សូវ​ពេញចិត្ត ហើយយុវជនរូបនោះ បានសម្រេចចិត្តចេញពីស្ត្រី ទាំងចិត្តនៅអាល័យដៃអ្នកមេម៉ាយ ពេញណែន​ក្នុង​ដើម​ទ្រូង​​នៅ​ឡើយ។ ករណីនេះ ត្រូវបានលោក ខឺម វាសនា បញ្ជូនយុវជន«រារែក»រូបនោះ ឲ្យទៅដើររក​«គ្រូ​ស្នេហ៍»​​វិញ។ លោកថា បើអ្នកមេម៉ាយនោះ​មិនយកខ្លួន ជាការត្រឹមត្រូវហើយ «កុំមកចង់តោងនោះ»៕