ជីវិត- រដ្ឋលេខាធិការ និងជាអ្នកនាំពាក្យសម្បូរវោហារ ដ៏ឆ្នើមមួយរូបរបស់ទីស្តីការគណៈរដ្ឋមន្ត្រី លោក ផៃ ស៊ីផាន នឹងក្លាយជាកូនកម្លោះក្នុងពេលឆាប់នេះ ដែលលោកនឹងចូលរោងការជាមួយកូនក្រមុំដ៏ស្រស់ស្អាត នៅថ្ងៃ​សៅរ៍​ទី​២៦ កក្កដា ចុងសប្តាហ៍នេះ នៅភោជនីយដ្ឋានពិភពថ្មី អគារ D ។ លោក រស់ ចន្ត្រាបុត្រ ជាទេសរដ្ឋមន្ត្រី និង​ភរិយា គឺជាមេបារបស់លោក។

អនាគតភរិយា របស់លោក ផៃ ស៊ីផាន គឺកញ្ញា ង៉ែត ពត ត្រូវបានគេដឹងថា គឺបុគ្គលិកនៅធនាគារ ហើយកញ្ញាជា​កូនស្រីរបស់គ្រួសារសាមញ្ញ មិនមែនជាគ្រួសាររបស់អ្នកធំមានអំណាចណានោះឡើយ។

លិខិតអញ្ជើញ ដែលមានឈ្មោះកូនកម្លោះឈ្មោះ ផៃ ស៊ីផាន និងកូនក្រមុំឈ្មោះង៉ែត ពត ដែលត្រូវបានគេបង្ហោះ​ក្នុងទំព័រហ្វេសប៊ុក កំពុងបានក្លាយជាទីចាប់អារម្មណ៍យ៉ាងខ្លាំង របស់អ្នកប្រើប្រាស់បណ្តាញសង្គមហ្វេសប៊ុក។ ចាប់​អារម្មណ៍ដោយសារតែ គេសង្កេតឃើញថា អ្នកនាំពាក្យរបស់រដ្ឋាភិបាលរូបនេះ មានវ័យចំណាស់ណាស់ទៅហើយ បើគិតមកដល់ឆ្នាំនេះ លោកមានអាយុ៦១ឆ្នាំហើយ។ អ្វីដែលធ្វើឱ្យអ្នកប្រើប្រាស់បណ្តាញហ្វេសប៊ុក ផ្សព្វផ្សាយ​ធៀប​ការរបស់លោក និងមានការចែកចាយពីគណនីមួយ ទៅគណនីមួយទៀត ដោយសារតែលោកត្រូវបានគេ​ចាត់ទុក​ថា​មន្ត្រីអ្នកនាំពាក្យរបស់រដ្ឋាភិបាល និងតារាហ្វេសប៊ុក ដែលរងការរិះខ្លាំងខ្លា ពីអ្នកប្រើប្រាស់បណ្តាញសង្គមមួយចំនួន។

ប៉ុន្តែមើលទៅលោក ផៃ ស៊ីផាន មិនសូវសប្បាយចិត្តប៉ុន្មាននោះទេ នៅពេលដែលរឿងឯកជនរបស់លោក ត្រូវបាន​គេយកមកធ្វើការផ្សព្វផ្សាយ និងមានការជជែកដេញដោល ក្នុងបណ្តាញសង្គមហ្វេសប៊ុកបែបនេះនោះ៕

នេះជាធៀបការរបស់លោក ផៃ ស៊ីផាន ដែលត្រូវបានគេផ្សាយនៅលើបណ្ដាញសង្គម៖