កាលពីយប់ថ្ងៃចន្ទ កន្លងមកនេះ និស្សិត​អាយុ១៩ឆ្នាំម្នាក់ បានប្រើកាំបិត​ចាក់ឲ្យរបួស បុរសស្ត្រីពីរនាក់ប្ដី​ប្រពន្ធ នៅក្នុងក្រុង ម៉ាតាំង (Martin) នៃរដ្ឋផ្លរីដា (Florda) ភាគខាងត្បូង​សហរដ្ឋអាមេរិក។ បន្ទាប់មកភ្លាមៗនោះ យុវជន​ល្មើស​ដែលក្រោយមក ត្រូវបានស្គាល់ឈ្មោះ «Austin Harrouff» បានប្រើធ្មេញរបស់ខ្លួន ខាំទាញ​សាច់​មុខ​របស់​បុរសជាប្ដី យកមកទំពារលេប ជាមួយនឹងសម្លេងគ្រហឹម ហាក់ដូចជាសត្វដ៏​សាហាវ​មួយ​ក្បាល។

បន្ទាប់ពីទទួលសេចក្ដីរាយការណ៍ ពីអ្នកនៅជិតខាង ទាក់ទងនឹងហេតុការណ៍នេះ ក្រុមនគរបាលបានប្រញប់​ប្រញាល់ ទៅកាន់កន្លែងកើតហេតុ ហើយបានប្រទះករណីនេះ ដែលសឹងមិនគួរឲ្យជឿ ប្រសិនជាមិនបាន​ឃើញ​ផ្ទាល់​ភ្នែក៖ យុវជន «Austin Harrouff» កំពុងប្រើធ្មេញ ខាំហែកស៊ី​មុខលោក «John Stevens» ដែល​ជា​ជន​រងគ្រោះម្នាក់ ពីក្នុងចំណោមជនរងគ្រោះពីរនាក់ (ម្នាក់ទៀតជាភរិយា គឺអ្នកស្រី «Michelle Mishcon»)។ កង​កម្លាំង​អាជ្ញាធរ បានប្រើភ្នាក់ងារជាច្រើនរូប ឆ្កែមួយក្បាល និងកាំភ្លើេងខ្លីមួយដើមផង ដើម្បីបង្ខំឲ្យ​យុវជន​នោះ ព្រលែង​សាច់​មនុស្ស ពីក្នុងមាត់របស់ខ្លួន។

គ្មានអារម្មណ៍ថាឈឺចាប់...

នាយនគរបាលតំបន់ ម៉ាតាំង បានពន្យល់ក្រោយពេលកើតហេតុថា យុវជនល្មើស ដែលកំពុងស៊ី​សាច់​មនុស្ស​នោះ មានកម្លាំងខ្លាំងក្លាណាស់ ហាក់ដូចជាមានអ្វីសណ្ឋិត ឬត្រូវថ្នាំ។ លោកបានអះអាងថា៖ «ជននោះ មិន​ទទួល​អារម្មណ៍ឈឺចាប់ទេ ហើយក៏មិនខ្វល់ខ្វាយ ពីការខាំប្រតាយប្រតប់ ពីសំណាក់សត្វឆ្កែបង្វឹក ឬពី​សំណាក់​កាំភ្លើង​ឆក់ ​របស់នគរបាលដែរ។ នគរបាលត្រូវបានប្រើកម្លាំង ដល់ទៅ៤នាក់ ដើម្បីបង្ក្រាប​ជន​នេះ​បាន។»

ការត្រួតពិនិត្យឈាម របស់យុវជនចម្លែក មិនបានរកឃើញថា យុវជននេះ រងឥទ្ធិពលពីគ្រឿងញៀន ដូច​យ៉ាង​ម្សៅ​កូកាអ៊ីន ឬហេរ៉ូអ៊ីនឡើយ។ ហើយការបង្ហើបឲ្យដឹង ពីមូលហេតុដែលឈានទៅដល់ការសម្លាប់ ដើម្បីស៊ី​សាច់​ជន​រង​គ្រោះ​នេះ ក៏នៅមិនទាន់ត្រូវបាននគរបាលទម្លាយឲ្យដឹងដែរ ដោយហេតុថាការស៊ើបអង្កេត ទើប​នឹង​ចាប់​ផ្ដើម​ធ្វើ។ ប៉ុន្តែនគរបាលបានសង្ស័យថា យុវជនទំនង​ជាបាន​ប្រើប្រាស់ថ្នាំញៀន ដែល​មាន​តម្លៃ​ថោក និង​ផលិត​នៅ​ប្រទេស​ចិន មានឈ្មោះថា «flakka»។ ថ្នាំញៀនប្រភេទនេះ ដែលកំពុងចរាចរណ៍​ដោយ​ខុស​ច្បាប់ នៅ​ក្នុង​តំបន់​នោះ បានផ្ដល់ទៅឲ្យអ្នកប្រើប្រាស់វា មានកម្លាំងដ៏ខ្លាំងក្លា និងភាពវង្វេងវង្វាន់ បាត់​បង់​សតិ លែង​គ្រប់គ្រង​ខ្លួន​បាន​ត​ទៅទៀត។

ករណីស៊ីសាច់មនុស្ស ក្រោមឥទ្ធិពលនៃថ្នាំញៀនស្រវឹង មិនមែនទើបនឹងកើតជាលើកទីមួយទេ នៅសហរដ្ឋ​អាមេរិក ជាពិសេសនៅក្នុងរដ្ឋផ្លរីដា​នេះតែម្ដង។ កាលពីខែឧសភា ឆ្នាំ២០១២ បុរសម្នាក់ បានធ្វើ​អោយ​រំជួល ពេញ​ទាំង​ទីក្រុង មីអាមី (Miami) ក្នុងរដ្ឋផ្លរីដា បន្ទាប់ពីបុរសនេះ បានធ្វើ​សកម្មភាព​​ស៊ីសាច់មុខ របស់ជន​គ្មាន​លំនៅដ្ឋាន​ម្នាក់ នៅកណ្ដាលដងផ្លូវ។ នៅពេលនោះ បុរសល្មើសខាងលើ ដែលត្រូវបាននគរបាល​បាញ់សម្លាប់ នៅ​ផ្ទាល់​កន្លែង បានជាប់ឈ្មោះ​ពីអ្នកផងថាជា «Miami Zombie (ឬមនុស្សខ្មោច នៅមីអាមី)»៕

» សន្និសីទសារព័ត៌មាន របស់នាយនគរបាលតំបន់ ម៉ាតាំង ស្ដីពីករណីយុវជន «Austin Harrouff» ដូច​ខាង​ក្រោម៖