«មកពីរត់ម៉ូតូកង់បី មិនទាន់ផ្លាស់ខោទឹកនោម ឲ្យកូនហើយផង ស្រាប់តែ ចោរលួចគាស់ផ្ទះ ខំស្រែកឲ្យអ្នកជិត​​ខាងជួយ សំណាងហើយ ដែលអ្នកជិតខាងចាប់បាន ប្រគល់ឲ្យប៉ូលិសភ្លាមៗ កុំអីមិនដឹងថា ទៅគាស់ ផ្ទះអ្នក​ណា​ខ្លះទៀតនោះទេ» នេះជាការឧទានឡើង របស់ម្ចាស់ផ្ទះរងគ្រោះ ដោយការលួចគាស់ផ្ទះ បន្ទាប់ពីខ្លួនទើប​នឹង​ត្រឡប់ មកពីប្រកបរបររត់កង់បីរួចមក។

បុរស ដែលត្រូវបានចោរដៃឆើតម្នាក់ លួចគាស់ផ្ទះនោះ ស្នាក់នៅជាមួយប្រពន្ធ និងកូន ក្នុងផ្ទះលេខ៥៧S ផ្លូវ ២៦១ សង្កាត់ទឹកល្អក់៣ ខណ្ឌទួលគោក រាជធានីភ្នំពេញបច្ចុប្បន្ន ជាអ្នករត់រឺម៉កកង់បី។ ដោយមិនបានប្រាប់​ឈ្មោះ បុរសអ្នករត់កង់បីរូបនេះ បានរៀបរាប់ថា ខ្លូនបានត្រឡប់ ពីប្រកបរបរទទួលទាន់ នៅវេលាម៉ោង ប្រមាណ​ជា១២ជាង។ ពេលនោះ លោកបានចតម៉ូតូ និងរថកង់បី ដាក់ក្នុងផ្ទះហើយ រួចក៏បានចាក់សោស្រួលបួល ដូច​សព្វ​មួយដងដែរ។

នៅពេលដែលលោក បានចូលទៅជួយដូរខោទឹកនោម ឲ្យកូនជាមួយប្រពន្ធ ស្រាប់តែលឺសម្លេង ចេញពីខាង​ក្រៅ (ក្រេះ ក្រោស ៗ) បង្កឲ្យមានចង្វល់ឡើង ទើបលោកបានចេញទៅមើល ស្រាប់តែឃើញសកម្មភាព របស់​ចោរ​ម្នាក់ កំពុងគាស់ទ្វារផ្ទះលោក ពីខាងក្រៅ។

ចោរម្នាក់នេះ ដែលត្រូវបានគេស្គាល់អត្តសញ្ញាណនោះ មានឈ្មោះ ឱ សម្ផស្ស អាយុ២៤ ឆ្នាំរស់នៅសង្កាត់​ទឹកថ្លា ខណ្ឌសែនសុខ រាជធានីភ្នំពេញ ដែលសព្វថ្ងៃ គ្មានមុខរបរពិតប្រាកដនោះ នៅពេលដឹងខ្លួនថាម្ចាស់​ផ្ទះ​ឃើញ បានព្យាយាមរត់គេច តែអកុសល ត្រូវបានអ្នកនៅទីនោះជាច្រើន ឡោមព័ទ្ធចាប់ខ្លួនបាន រួចប្រគល់​ឲ្យ​នគរបាលនៅវេលាម៉ោង១ និង៣០នាទីយប់ថ្ងៃទី១១ ខែមិថុនាឆ្នាំ២០១៥ នៅចំណុចកើតហេតុ តាមបណ្តោយ​ផ្លូវ២៦១ ក្នុងសង្កាត់ទឹកល្អក់បី ខណ្ឌទួលគោក រាជធានីភ្នំពេញ។

ក្រុមនគរបាលបានរកឃើញ វត្ថុតាងមួយចំនួន ដែលនៅសេសសល់ ជាប់នឹងខ្លូនជនសង្ស័យ បន្ទាប់ពីការត់​គេច​ខ្លូន។ ក្នុងនោះ មានដែកកេះសម្រាប់ដុត កូនសោរមួយសម្រាប់ចាក់ ដែកស្រួចតូចមួយទៀត ដែលធ្វើឲ្យ​គេ​យល់​ថា នោះជាឧបករណ៍ សម្រាប់គាស់ទ្វារផ្ទះ។ បច្ចុប្បន្ន ជនដៃដល់គាស់ទ្វារខាងលើ ត្រូវបានបញ្ជូនខ្លួន ទៅឃុំ​ជា​បណ្តោះ​អាសន្ន នៅក្នុងប៉ុស្តិ៍រដ្ឋាបាលទឹកល្អក់ទីបី និងធ្វើសុំនុំរឿងទៅថ្នាក់លើ នៅពេលព្រឹកឡើង ដើម្បី​ដោះ​ស្រាយ​ទៅ​តាម​ផ្លូវច្បាប់៕