«លោកចង់ឲ្យមានការរួបរួមជាតិ ជាធ្លុងមួយ ចង់ឲ្យមានការផ្សះផ្សារជាតិ មិនឲ្យខ្មែរឈ្លោះគ្នា។ លោកចង់​ប្រមូល​កម្លាំងខ្មែរដូចគ្នា ដើម្បីការពារប្រទេសជាតិយើង ឲ្យបានគង់វង្ស។ ខ្មែរមានសុខសន្តិភាព និងភាព​ថ្គំថ្កើង។» នេះ ជាការដងស្រង់សំដីលោក ជា ស៊ីម ដោយលោក សម រង្ស៊ី ក្នុងជំនួបរវាងលោកទាំងពីរ ក្នុង​ពេល​កន្លងមក ។

ថ្លែងទៅកាន់ក្រុមអ្នកសារព័ត៌មាន ក្នុងការគោរពវិញ្ញាណក្ខន្ន លោក ជា ស៊ី នាព្រឹកថ្ងៃទី១១ ខែមិថុនា ប្រធាន​គណបក្សសង្គ្រោះជាតិ លោក សម រង្ស៊ី បានថ្លែងឡើងថា ក្រោយការបោះឆ្នោតឆ្នាំ១៩៩៣ មក លោកតែង​គាំទ្រ នូវគោលជំហរ និងដឹងគុណ ចំពោះលោក ជា ស៊ីម ជានិច្ច។ លោកបានបកស្រាយថា លោក ជា ស៊ីម ជាថ្នាក់​ដឹកនាំកំពូលម្នាក់ នៃគណបក្សប្រជាជនកម្ពុជា ដែលតែងតែលើកតម្កើង ការផ្សះផ្សាជាតិ បង្រួបបង្រួម​ជាតិ​យ៉ាង​ស្មោះត្រង់។ លោកចង់ឲ្យខ្មែរទាំងអស់ ចេះស្រឡាញ់គ្នា ដើម្បីការពារផលប្រយោជន៍ជាតិតែមួយ។

ប្រធានគណបក្សប្រឆាំង ដ៏ធំជាងគេនៅកម្ពុជា បានលើកឡើងបន្តថា អ្វីដែល លោក ជា ស៊ីម បានលើកឡើង កន្លងមកនោះ វាជាឧត្តមគតិដែលគេចង់បាន។ លោក សម រង្ស៊ី បានថ្លែងឲ្យដឹងទៀតថា៖ «យើងមិនភ្លេច​បណ្តាំ របស់សម្តេចទេ។ យើងខិតខំបង្រួមបង្រួម ខ្មែរទាំងអស់ អ្នកស្នេហាជាតិទាំងអស់ ដើម្បីការពារទឹកដី​ឲ្យបាន​គង់វង្ស។ និងរៀបចំប្រទេសជាតិ ឲ្យបានល្អប្រសើរ ឲ្យប្រទេសយើង ក្លាយជាប្រទេសដ៏រុងរឿង។»

លោក សម រង្ស៊ី បានជួបជាមួយលោក ជា ស៊ីម កាលពីថ្ងៃទី៦ ខែតុលា ឆ្នាំ២០១៤ បន្ទាប់ពី«វប្បធម៌សន្ទនា» ត្រូវ​បានប្រកាសធ្វើឡើង រវាងគណបក្សនយោបាយធំៗទាំងពីរ នៅកម្ពុជា។ ជំនួបនោះ ជាជំនួប«ដំបូងងបំផុត» បើ​រាប់​ពីក្រោយការបោះឆ្នោត ឆ្នាំ២០០៨ អាណត្តិទី៤ តែវាបានក្លាយជាជំនួប «ចុងក្រោយបំផុត»ដែរ បន្ទាប់ពី​មរណៈភាព របស់លោក ជា ស៊ីម។

ប្រធានក្រុមតំណាងរាស្ត្រភាគតិច បានកោតសសើរ ពីវីរភាពរបស់លោក ជា ស៊ីម ដែលបានដង្ហែរតាម​ព្រះរាជ​តម្រិះ នៃអង្គព្រះបរមរតនកោដ្ឋ ព្រះបាទ នរោត្តម សីហនុ និងជាគម្រូល្អម្នាក់ សម្រាប់ប្រជាពលរដ្ឋទូទៅ។ លោក សម រង្ស៊ី បានថ្លែងឲ្យដឹងថា៖ «សម្តេច ជា ស៊ីម លោកបានចាត់ទុកដូចជា ជាបងប្អូនបង្កើត របស់​សម្តេច​ព្រះ​នរោត្តម សីហនុ។ ហើយយើងជាកូនចៅ សម្តេចព្រះនរោត្តម សីហនុ។ វីរៈបុរសទាំងពីរនាក់ តែងតែ​ផ្តល់​គំរូ​ល្អ​ឲ្យយើង យើងត្រូវតែធ្វើតាមគំរូនេះ។»

លោក ជា ស៊ីម បានចាប់កំណើត នៅភូមិពពែល ឃុំអំពិល ស្រុករមាសហែក ខេត្តស្វាយរៀង កាលពីថ្ងៃទី៤ ខែ​វិច្ឆិកា ឆ្នាំ១៩៣២។ លោកបានលាចាកលោកទៅវិញ នៅក្នុងសង្កាត់ទន្លេបាសាក់ ខណ្ឌចំការមន រាជធានី​ភ្នំពេញ កាលពីថ្ងៃទី៨ ខែមុថុនា ឆ្នាំ២០១៥ ដោយរោគាពាធ ក្នុងជន្មាយុ ៨២ឆ្នាំ។

សពលោក ជា ស៊ីម នឹងត្រូវធ្វើការបូជា នៅមុខវត្តបទុមវតី ដោយមានអង្គព្រះមហាក្សត្រ នរោត្តម សីហមុនី ប្រទានភ្លើង ក្នុងថ្ងៃទី១៩ ខែមិថុនាខាងមុខនេះ។ មេរុបូជាសព លោក ជា ស៊ីម ត្រូវបានសាងសង់ឡើង ក្នុង​កំពស់​២១ម៉ែត្រ ដែលមាន៣ថ្នាក់។ មេរុនេះ មានទំហំ២៤ម៉ែត្របួនជ្រុង ដែលមានក្បូរក្បាច់ រចនាលម្អ ស្រប​តាម​រចនាបទខ្មែរបុរាណ ជាមួយនឹងការបំពាក់ ដោយភ្លើងចម្រុះពណ៌៕