មន្រ្តីជាន់ខ្ពស់មួយរូប របស់គណបក្សសង្គ្រោះជាតិ បានថ្លែងប្រាប់ទស្សនាវដ្តីមនោរម្យ.អាំងហ្វូ ថា តាមអ្វី ដែល​លោកបានដឹង ផែនទីទាំងបី (របស់រដ្ឋាភិបាល - UN និងរបស់​គណបក្សសង្គ្រោះជាតិ) ពិតជាដូចគ្នា ព្រោះ​ផែនទី​ទាំងនោះ «អាច»ជាប្រភេទផែនទី តែមួយដូចគ្នា ដែលប្រើប្រាស់ក្នុងសម័យសង្គ្រាម គឺក្នុង​សម័យ​ខ្មែរ​ប្តឹង​ទៅ​អាមេរិក រឿងអាមេរិកទម្លាក់គ្រាប់បែក លើទឹកដីកម្ពុជាប៉ុណ្ណោះ។

ការថ្លែងជាទស្សនៈផ្ទាល់ខ្លួន របស់មន្ត្រីរូបនេះ បានធ្វើឡើង បន្ទាប់ពីរដ្ឋាភិបាលរបស់លោក ហ៊ុន សែន បាន​ប្រកាសជាសាធារណៈ នៅក្រោយពិធីពិនិត្យ និងផ្ទៀងផ្ទាត់ផែនទី កម្ពុជា និង UN កាលពីថ្ងៃទី២០ ខែសីហា ឆ្នាំ២០១៥ នៅទីស្តីការគណរដ្ឋមន្រ្តីថា គ្រប់ផែនទីទាំងអស់ មានលក្ខណៈដូចគ្នាទាំងអស់ ហើយរដ្ឋាភិបាល អាចបន្តបោះបង្គោលព្រំដែន ជាមួយវៀតណាមជាបន្តបាន។ ក្នុងព្រឹត្តិការណ៍ជាបន្តបន្ទាប់នោះ រដ្ឋាភិបាល​ថែម​ទាំង បានព្រមានចាត់វិធានការ ដល់ជនណា ឬក្រុមណាក៏ដោយ ដែលលើកឡើងថា រដ្ឋាភិបាលបានប្រើ​ប្រាស់​ផែនទីក្លែងក្លាយ។

នៅក្រោយការប្រកាស របស់រដ្ឋាភិបាលនោះ លោក សុខ ទុច ប្រធានក្រុមស្រាវជ្រាវ បញ្ហាព្រំដែននៃរាជ​បណ្ឌិត​សភាកម្ពុជា ក៏បានប្រកាសដែរថា មានតែផែនទីរដ្ឋាភិបាលទេ ដែលយកជាការបាន ក្នុងការ​បោះ​បង្គោល​​សីមា។ តែលោក សុខ ទូច ទទួលស្គាល់ថា ផែនទីរបស់អង្គការសហប្រជាជាតិនោះ មិនមែន​ជា​ផែនទី​ផ្លូវការ ដែល​កម្ពុជា​យកទៅទុក នៅអង្គការសហប្រជាជាតិ ឆ្នាំ១៩៦៤នោះឡើយ។

ភាពប្រទាំងប្រទើសគ្នានេះ បានបង្កឲ្យមានចំងល់ស្រាយមិនចេញ នៅក្នុងចំណោមសាធារណៈមតិមួយចំនួន។ លោក ជុន ចាន់បុត្រ នាយករងការផ្សាយ ផ្នែកខេមរៈភាសា របស់វិទ្យុអាស៊ីសេរី បានលើកជាចម្ងល់ថា៖ «ផែនទី​ដែល អ.ស.ប អោយខ្ចីនេះ មិនមែនជាផែនទី ដែលរដ្ឋាភិបាលចង់ខ្ចីទេ។ ឥឡូវរបស់ដែលគេមិនចង់​បាននោះ ស្រាប់តែគេថាវាដូចគ្នា ទៅនឹងផែនទីដែលរដ្ឋាភិបាលបានប្រើ។ អញ្ចឹងតើវាមានន័យយ៉ាងណាទៅ​វិញ?។ (...) រដ្ឋាភិបាលធ្លាប់ថា ផែនទី UN ជាផែនទីដែលខ្មែរធ្លាប់ប្រើប្រាស់ តវ៉ាប្រឆាំងនឹងសហរដ្ឋអាមេរិក ក្នុង​ការ​ទម្លាក់​គ្រាប់​បែក នៅតាមព្រំដែនរវាងកម្ពុជា និងវៀតណាម គឺពុំមែនជាផែនទីខ្សែព្រំដែន កំណត់​អធិបតេយ្យ​ភាព​កម្ពុជា​ទេ។ ក្រោយផ្ទៀងផ្ទាត់ទៅ ផែនទី UN នេះដូចគ្នា នឹងផែនទីដែលរដ្ឋាភិបាល​ប្រើ​ប្រាស់ សំរាប់រៀបចំ​ព្រំដែន។ ដូចនេះ​មិន​បានសេចក្តីថា ផែនទីដែលរដ្ឋាភិបាល ប្រើសំរាប់កំណត់ព្រំដែន ដូចគ្នា​ទៅ​នឹង​ផែនទី ដែល​មិន​សំរាប់​កំណត់​ព្រំដែន​ទៅហើយ?»

សម្រាប់មន្ត្រីជាន់ខ្ពស់របស់គណបក្សសង្គ្រោះជាតិខាងលើ ដែលបានថ្លែងក្នុងលក្ខខណ្ឌមិនបញ្ចេញឈ្មោះ បាន​បន្តការអះអាង ផ្ទុយនឹងសេចក្ដីសន្និដ្ឋានរបស់រដ្ឋាភិបាលថា៖ «ផែនទីដែលកម្ពុជាត្រូវបង្ហាញ និងយកជា​គោល សម្រាប់ការវាស់វែង ព្រំដែនកម្ពុជា-វៀតណាមនោះ ត្រូវតែជាផែនទី ដែលអាជាជ្ញាធរ សម័យបារាំង ជា​អ្នក​ចុះ​វាស់វែងដោយផ្ទាល់ នឹងកន្លែង ហើយមានកំណត់ត្រា និងកំណត់ហេតុត្រឹមត្រូវ មិនមែនជាផែនទី ដែល​បាញ់​ដោយ​ម៉ាស៊ីនស្វ័យប្រវត្តិ (GPS) នោះទេ។ (...) ទាំងផែនទី និងកំណត់ហេតុនៃការវាស់វែង ព្រំដែន​កម្ពុជា​-វៀតណាម អំឡុងពេលបារាំងគ្រប់គ្រង និងបែងចែកតំបន់រដ្ឋបាល នាសម័យនោះ អាចរកបាននៅ​ប្រទេស​បារាំង ព្រោះ​គេរក្សាទុកទាំងអស់ មិនមានបាត់បង់ទេ។»

សម្រាប់អ្នកស្រាវជ្រាវផ្នែកសង្គម លោក កែម ឡី វិញ បានប្រៀបធៀប តាមបែបបញ្ឆិតបញ្ឆៀងថា៖ «គោនិង​ក្របី​​មិនដូចគ្នា គ្រាន់តែមានរាងនិងកន្ទុយដូចគ្នា»។ លោក កែមឡី មិនបានសរសេរលំអិតនៅលើជញ្ជាំង នៃទំព័រ​ហ្វេសប៊ុក​របស់​លោក ពីការភាពខុសគ្នា យ៉ាងណានោះឡើយ តែលោកបានសរសេរថា៖ «សំខាន់​រដ្ឋាភិបាល ត្រូវស្នើឲ្យអគ្គលេខាធិការ របស់អង្គការសហប្រជាជាតិ ចេញលិខិតបញ្ជាក់ ឲ្យបានច្បាស់ថា តើវីរបុរសខ្មែរ បាន​យកផែនទី ទៅដាក់នៅអង្គការសហប្រជាជាតិដែរឬអត់? ករណីដែល​អង្គការសហ​ប្រជា​ជាតិ រក​ពុំ​ទាន់​ឃើញ ត្រូវ​ផ្តល់ពេលវេលាគ្រប់គ្រាន់ ដល់ភ្នាក់ងារអង្គការសហប្រជាជាតិ ក្នុងការផ្តល់​ផែនទី​ផ្លូវការ ស្របច្បាប់​រដ្ឋ​ធម្មនុញ្ញ​មាត្រា២ និងមានការទទួលស្គាល់ ជាលក្ខណៈអន្តរជាតិ។»៕