បោះឆ្នោតព្រឹទ្ធសភា នឹងធ្វើនៅថ្ងៃអាទិត្យ ទី១៤មករា២០១៨
- ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី១៦ មិថុនា ២០១៧
- កែប្រែចុងក្រោយ: June 16, 2017
- ប្រធានបទ: បោះឆ្នោតព្រឹទ្ធសភា
- អត្ថបទ: មានបញ្ហា?
- មតិ-យោបល់
-
នៅក្នុងកិច្ចប្រជុំគណៈរដ្ឋមន្ត្រី នាព្រឹកថ្ងៃសុក្រ ទី១៦ ខែមិថុនានេះ ដែលធ្វើឡើងក្រោមវត្តមាន របស់លោក ហ៊ុន សែន នាយករដ្ឋមន្ត្រី-ប្រធានគណបក្សប្រជាជនកម្ពុជា រដ្ឋាភិបាលកម្ពុជាបានកំណត់យកថ្ងៃអាទិត្យទី ១៦ ខែមករា ឆ្នាំ២០១៨ ជាថ្ងៃបោះឆ្នោតអសកល នៃការជ្រើសតាំងសមាជិកព្រឹទ្ធសភាជាតិ។ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានបញ្ជាក់កាលបរិច្ឆេទនេះ នៅតាមបណ្ដាញសង្គម បន្ទាប់ពីលោកចេញពីកិច្ចប្រជុំនោះ។
សេចក្តីស្នើច្បាប់ថ្មី ស្តីពីការបោះឆ្នោតជ្រើសតាំងសមាជិកព្រឹទ្ធសភា ដែលនឹងត្រូវរដ្ឋសភា គ្រោងបើកកិច្ចប្រជុំពិភាក្សា និងអនុម័ត នៅថ្ងៃទី២០ ខែមិថុនាខាងមុខ បានកំណត់ ឲ្យបន្ថែមសមាជិកមួយរូបទៀត ចាប់ពីអាណត្តិក្រោយនេះទៅ។ ពោល គឺសមាជិតព្រឹទ្ធសភា នឹងកើនចំនួនពី ៦១រូប ទៅ ៦២រូប ដែលនឹងត្រូវបោះឆ្នោតជ្រើសតាំង ដោយសមាជិកក្រុមប្រឹក្សាឃុំ-សង្កាត់ ក្រុង-ស្រុក-ខណ្ឌ រាជធានី-ខេត្ត តាមរយៈការបោះឆ្នោតអសកល (មិនមែនពលរដ្ឋ ជាអ្នកបោះឆ្នោតដោយផ្ទាល់ទេ)។
សេចក្ដីព្រាងធ្វើវិសោធនកម្មច្បាប់ដដែល ដែលត្រូវបានធ្វើឡើងតាមស្មារតី នៃកិច្ចព្រមព្រៀង បញ្ចប់ជម្លោះនយោបាយ រវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី២២ ខែកក្កដា ឆ្នាំ២០១៤ នោះ នៅមានការកែប្រែមាត្រាមួយចំនួនទៀត ដូចជា កាត់បន្ថយរយៈពេល យុទ្ធនាការឃោសនាបោះឆ្នោតព្រឹទ្ធសភា ពី ២១ថ្ងៃ មកនៅត្រឹម ១៤ថ្ងៃ ព្រមទាំងលើកពេលបោះឆ្នោត ព្រឹទ្ធសភា ពីចុងខែមករា ទៅចុងខែកុម្ភៈជាដើម (មិនទាន់អនុវត្តន៍សម្រាប់អាណត្តិក្រោយ)។
ជាការរំលឹកឡើងវិញ ព្រឹទ្ធសភាកម្ពុជា ត្រូវបានបង្កើតឡើង នៅក្រោយការបោះឆ្នោតជាសកល ជ្រើសតាំងតំណាងរាស្ត្រ នីតិកាលទី២ ឆ្នាំ១៩៩៨។ សមាជិកព្រឹទ្ធសភា នីតិកាលទី១ ទាំង៦១រូប ដែលចូលរួមបើកសម័យប្រជុំដំបូង របស់ព្រឹទ្ធសភានៅថ្ងៃទី២៥ ខែមីនា ឆ្នាំ១៩៩៩ សុទ្ធតែបានកើតចេញ ពីការតែងតាំង ពីក្នុងចំណោមឥស្សរជនជាន់ខ្ពស់ នៃគណបក្សនយោបាយ ដែលមានអាសនៈនៅក្នុងរដ្ឋសភា នីតិកាលទី២។ ព្រឹទ្ធសភានីតិកាលទី១ មានអាណត្តិ ត្រឹមតែ៥ឆ្នាំប៉ុណ្ណោះ។
ចាប់ពីនីតិកាលទី២មក ការបោះឆ្នោតជាអសកល ដើម្បីជ្រើសតាំងសមាជិកព្រឹទ្ធសភា ទាំង៥៧រូប ត្រូវបានធ្វើឡើងជារៀងរាល់៦ឆ្នាំម្ដង (ការបោះឆ្នោតសម្រាប់នីតិកាលទី២ ប្រព្រឹត្តិទៅនៅថ្ងៃទី ២២ ខែមករា ឆ្នាំ២០០៦ និងនីតិកាលទី៣ ប្រព្រឹត្តិទៅនៅថ្ងៃទី ២៩ ខែមករា ឆ្នាំ២០១២) ខណៈ ២រូបផ្សេង ជ្រើសតាំងដោយរដ្ឋសភា និង២រូបទៀត តែងតាំងដោយព្រះមហាក្សត្រ។ សមាជិកព្រឹទ្ធសភា នីតិកាលទី៣ (ពីឆ្នាំ២០១២ ដល់ឆ្នាំ២០១៨) ទាំង៥៧រូប ដែលកើតចេញពីការបោះឆ្នោត មាន៤៦រូប ជាប់ឆ្នោតមកពីគណបក្សប្រជាជនកម្ពុជា និង១១រូប ជាប់ឆ្នោតមកពីគណបក្សសមរង្ស៊ី៕