យុទ្ធនាការតាមប្រមាញ់ រកអ្នកទម្លាយរូបស្រាត វ៉ាន់ នីឡា
- ដោយ: ដារី អត្ថបទ៖ ដាវី ([email protected]) - ភ្នំពេញ ថ្ងៃទី១០ មិថុនា ២០១៦
- កែប្រែចុងក្រោយ: June 10, 2016
- ប្រធានបទ: តារា
- អត្ថបទ: មានបញ្ហា?
- មតិ-យោបល់
-
«សូមប្រកាសរកម្ចាស់ រឺ Admin Page TV24HD-Hot news» នេះជាការលើកឡើង នៅក្នុងគណនីហ្វេសប៊ុករបស់លោក សុខ ជំនោរ អ្នកនិពន្ធទំនុកច្រៀង និងត្រូវជាបងប្រុសបង្កើត របស់កញ្ញា វ៉ាន់ នីឡា តារាចម្រៀងរងគ្រោះ ព្រោះការទម្លាយរូបអាក្រាតតាមបណ្ដាញសង្គម នៅក្នុងរយៈពេលចុងក្រោយនេះ។
រាប់ចាប់តាំងពីពីម្សិលម៉ិញ មកទល់នឹងព្រឹកថ្ងៃនេះ រូបថតអាក្រាតជាច្រើនសន្លឹក របស់កញ្ញា វ៉ាន់ នីឡា ត្រូវបានទំព័រហ្វេសប៊ុកមួយចំនួន យកមកបង្ហោះ និងទទួលបានការចែករំលែក យ៉ាងខ្លាំងក្លា ពីសំណាក់អ្នកប្រើប្រាស់បណ្ដាញសង្គម។ រូបថតទាំងនោះ ត្រូវបានតារាចម្រៀងវ័យក្មេង អះអាងទទួលស្គាលភ្លាមៗ នៅលើគណនីហ្វេសប៊ុករបស់នាង ថាពិតជារូបរបស់នាង។ ប៉ុន្តែមកទល់នឹងពេលនេះ ទំព័រទាំងនោះមួយចំនួន បានបាត់ស្រមោលពីចក្រវាឡហ្វេសប៊ុកទៅហើយ ដែលតាមទំនង អាចបណ្ដាលមកពីមូលហេតុចំនួនពីរ៖ (១) ម្ចាស់ទំព័របានផ្អាកការផ្សាយ និង(២) ទំព័រត្រូវបានពិន័យឲ្យផ្អាកការផ្សាយ ពីសំណាក់ក្រុមហ៊ុនហ្វេសប៊ុកផ្ទាល់តែម្ដង។
ប៉ុន្តែបើទោះជាយ៉ាងនេះក្ដី លោក សុខ ជំនោរ បានបង្ហើបប្រាប់សារព័ត៌មានក្នុងស្រុកមួយថា លោក (និងក្រុមអ្នកស៊ើបអង្កេត) កំពុងប្រមូលទិន្នន័យ ពី« Facebook» ហើយមានប្រិយមិត្ត និងមហាជន កំពុងផ្ញើរព័ត៌មាន (ភស្តុតាង) ពីទំព័រណា ដែលបង្ហោះរូបអាក្រាតទាំងនេះ ដើម្បីឈានទៅស្វែងរកប្រភព ដែលបានបញ្ចេញរូបថតទាំងនេះ មកក្នុងបណ្ដាញសង្គម។
អ្នកនិពន្ធទំនុកច្រៀងល្បីឈ្មោះ មិនបានបង្ហើបរឿងរ៉ាវ ទាក់ទងនឹងការស្រាវជ្រាវ វែកមុខអ្នកនៅពីក្រោយការទម្លាយនេះ ឲ្យបានលំអិតនោះទេ ដោយខ្លាចប៉ះពាល់ដល់ការស៊ើបអង្កេត។ តែលោកបានថ្លែងយ៉ាងខ្លីថា៖ «យើងមានតម្រុយ និងភស្តុតាង ល្មមចាត់ការបានហើយ»។
កាលពីមួយខែមុន កញ្ញា វ៉ាន់ នីឡា និងលោក សុខ ជំនោរ បានដាក់ពាក្យបណ្ដឹងមួយ ទៅកាន់ក្រសួងមហាផ្ទៃ បន្ទាប់ពីតារាចម្រៀងបានទទួលការគម្រាម ថានឹងមានការទម្លាយ រូបអាក្រាតរបស់នាង ចេញជាសាធារណៈ។ អ្នកទាំងពីរក៏ទើបតែចូលខ្លួន ទៅបំភ្លឺពីបណ្ដឹងរបស់ពួកខ្លួន តាមការកោះអញ្ជើញ របស់នគរបាលព្រហ្មទណ្ឌនៃក្រសួងមហាផ្ទៃ កាលពីម្សិលម៉ិញនេះដែរ។
សារព័ត៌មានក្នុងស្រុកមួយទៀត បានស្រង់សំដីរបស់លោក សុខ ជំនោរ មកសរសេររៀបរាប់ថា រឿងរ៉ាវបានផ្ទុះឡើង រហូតនាំទៅដល់មានពាក្យបណ្ដឹងនេះ គឺនៅបន្ទាប់ពីទំនាក់ទំនងស្នេហារ រវាងកញ្ញា វ៉ាន់ នីឡា និងមិត្តប្រុសរបស់នាង ដែលជាកូនមន្ត្រីពាក់ផ្កាយបី បានឈានទៅដល់ទីបញ្ចប់ ហើយតារាចម្រៀងបានទទួលការគំរាមកំហែង ពីភាគីខាងប្រុស ទាក់ទងនឹងការបញ្ចេញរូបថតអាក្រាត។
សារព័ត៌មាននោះ បានស្រង់ប្រតិកម្ម របស់អតីតមិត្តប្រុសរបស់តារាចម្រៀង ដែលគេស្គាល់ឈ្មោះ សិទ្ធិ ស័ក្ត អាយុ ២៦ ឆ្នាំ មានតួនាទីជាប៉ូលិសស័ក្ដិបួនកន្លះនោះ ថាលោក មិនបានជាប់ពាក់ព័ន្ធអ្វី នឹងការទម្លាយរូបអាក្រាតនេះទេ ហើយថាលោកក៏មិនបានដឹងរឿង ដែលកញ្ញា វ៉ាន់ នីឡា បានធ្វើការចោទប្រកាន់នោះដែរ។ ផ្ទុយទៅវិញ លោក សិទ្ធិ ស័ក្ត បានទម្លាក់កំហុសត្រឡប់មកវិញថា អ្វីដែលបានបានកើតឡើង គឺជាការប្រឌិតឡើង ដោយភាគីខាងស្រីប៉ុណ្ណោះ។
សូមបញ្ជាក់ដែរថា ការបង្ហោះរូបភាពអាសអាភាស ស្រាតស្រៀវស្រើប នៅលើហ្វេសប៊ុក ជាទង្វើល្មើសទៅនឹងលក្ខន្តិកៈរបស់ហ្វេសប៊ុក ហើយទាំងអ្នកបង្ហោះ ទាំងទំព័រដែលអ្នកបង្ហោះនោះកាន់ (ឬធ្វើជាអភិបាល) អាចទទួលទណ្ឌកម្ម ពីបណ្ដាញសង្គមដ៏ធំជាងគេមួយនេះ។ ទណ្ឌកម្មនោះ អាចមានការផ្អាកមិនឲ្យចេញផ្សាយ ហាមការបង្ហោះ ក្នុងមួយរយៈពេលខ្លី និងករណីខ្លះទៀត គណនីរបស់អ្នកបង្ហោះ ក៏ដូចជាទំព័រដែលបានបង្ហោះនោះ នឹងត្រូវហ្វេសប៊ុកបិទចោលជាស្ថាពរ។
សំខាន់បំផុតនៅពេលនេះ ដែលប្រិយមិត្តជាច្រើននាក់ ចង់ដឹងនោះ ថាតើសមត្ថកិច្ចក្រសួងមហាផ្ទៃ នៃប្រទេសកម្ពុជាមាន«សមត្ថភាព»អាចវែកមុខជនល្មើស បានឬយ៉ាងណា៕