ខ្សែភាពយន្តមួយទៀត ក្រោម​ស្នាដៃ​និពន្ធ​របស់​អ្នកស្រី ពាន់ ភួងបុប្ផា ដែល​និយាយ​ពីទឹក​ភ្នែក​របស់​ឈើ​មួយ​ប្រភេទ ដែល​កំពុង​រង​ការ​ទន្រ្ទាន​ពី​ឈ្មួញ​ទាំង​ឡាយ គឺ​ដើម​ក្រញូង នឹង​ចាក់​បញ្ចាំង ក្នុង​ថ្ងៃទី២៣ ខែតុលា​នេះ​ត​ទៅ។ ក្រៅ​ពី​ចង់​ពញ្ញាក់​​អារម្មណ៍ ដល់​ទស្សនិកជន ជា​ពិសេស​អ្នក​ដែល​រក​ជំនួញ ឱ្យ​គិតគូរ​ថែរក្សា​ព្រៃ​ឈើ  ប៉ុន្តែ​រឿង​នេះ នៅ​មាន​លាយ​ឡំ ឈុត​ឆាក​ស្នេហា​ឈឺ​ចាប់​ព្រាត់​ប្រាស់ និង​កំប្លុក​កំប្លែង​ផង​ដែរ។

ចំណែក​ឯ​តួ​សម្ដែង​វិញ សុទ្ធ​ជា​តារា​ល្បីៗ​ និង​មាន​បទ​ពិសោធ ក្នុង​នោះ​លោក អ៊ុន សិទ្ធា និងកញ្ញា តូតា ជា​តួ​ឯក និង​មាន​តួ​សម្តែង​ល្បីៗ​មួយ​ចំនួន​ទៀត ដែល​ចូលរួម​សម្តែង​ដូច​ជា​លោក ស៊ឹម សុភ័ណ្ឌ លោក ដួង សុខគា អ្នក​នាង ទូច ស្រីលក្ខណ៍ ឌីជេ​ឃ្លាំង នេន ទុំ និង​តារា​មួយ​ចំនួន​ទៀត។

បើតាមការអះអាងពីអ្នកស្រី ពាន់ ភួងបុប្ផា អ្នកនិពន្ធដ៏ល្បីឈ្មោះ បានឱ្យដឹងថា ភាពយន្តរឿង«វិញ្ញាណ​លោក​ម្ចាស់គ្រញូង» ចង់បង្ហាញឱ្យឃើញ ពីទុក្ខវេទនារបស់អំបូរឈើគ្រញូង។ អ្នកស្រីចំណាយពេល​យ៉ាង​យូរ ដើម្បី​ឱ្យខ្សែភាពយន្តមួយនេះ ចេញជាសាច់រឿងឡើង គឺចង់ធ្វើជាសារមួយដាស់តឿន ដល់អ្នកប្រព្រឹត្តិ​សកម្មភាព​កាប់បំផ្លាញព្រៃឈើ ឱ្យគិតគូឡើងវិញ ពីផលប្រយោជន៍របស់ព្រៃឈើ និងមានគំនិតស្រឡាញ់​ព្រៃឈើ ព្រោះព្រៃឈើបានផ្តល់ប្រយោជន៍ច្រើនណាស់ដល់មនុស្ស។ ម្យ៉ាង ព្រៃឈើវាក៏មានជិវិតដូច​មនុស្ស​ដែរ បើកាប់វាមួយដើម ប្រៀបដូចយើងសម្លាប់មនុស្សម្នាក់ដែរ ពួកគេនឹងត្រូវព្រាត់ប្រាស់គ្រួសារ បាត់ទី​ជម្រក រងទុក្ខខ្លោចផ្សាដូចគ្នា ។

តាមឈុតឆាកខ្លីនៃសាច់រឿង «វិញ្ញាណលោកម្ចាស់គ្រញូង» បានបង្ហាញថា រឿងនេះផ្ដើមចេញពីបុរស​អ្នក​ស្រុកភូមិម្នាក់ សម្តែងដោយនាយក្រូច ដែលចូលចិត្តលេងល្បែងភ្នាល់អុក។ ថ្ងៃមួយ គេបានលេងល្បែង​អុក​ភ្នាល់ឈ្នះ បានគ្រែគ្រញូងបុរាណមួយពី លោកដង្ខៅម្នាក់។ ហោរាបានទាយថា គ្រែគ្រញូងនោះមានដួង​វិញ្ញាណថែរក្សា អ្នកដែលអាចដេកលើនោះបាន មានតែស្រីក្រមុំតែប៉ុណ្ណោះ។ បុរសនេះនិងប្រពន្ធ ក៏បាន​ប្រគល់​គ្រែនោះឱ្យទៅប្អូនរបស់គេ ឈ្មោះនាង កែវ ដែលជាស្រីក្រមុំ ធ្វើឲ្យនាងសប្បាយចិត្តជាខ្លាំង។

ជារឿយៗ បុរសដែលជាបងថ្លៃ តែងតែលួចគយគន់ សម្រស់កែវជាប្អូនថ្លៃ។ បុរសនោះឃើញនាងជាប្អូនថ្លៃ​ស្រស់ស្អាត បានធ្វើឱ្យគេមានអារម្មណ៍ត្រេកត្រអាលជាខ្លាំង។ ដោយទ្រាំមិនបាន យប់មួយ បុរសចិត្តអាក្រក់​បាន​លួចចូលបន្ទប់ចាប់បង្ខំនាង តែរំពេចនោះ ស្រាប់តែដួងវិញ្ញាណថែរក្សាគ្រែ គឺលោកម្ចាស់​គ្រញូងចេញ​មក​រារាំង។ ម្ដងជាពីរដង លោកម្ចាស់គ្រញូង និងនាងកែវ បានចាប់ចិត្តស្រលាញ់គ្នា ប៉ុន្តែជាមួយគ្នានោះ ពួក​គេ​បានរងការឈ្នានីសពីអ្នកស្រុក ធ្វើឱ្យស្នហារបស់ពួកគេជួបឧបសគ្គជាច្រើន។

តើអត្ថន័យនៃការអប់រំឱ្យស្រលាញ់ព្រៃឈើ ក្តីឈឺចាប់របស់ឈើក្រញ៉ូង និងស្នេហាព្រាត់ប្រាស់រវាង​វិញ្ញាណ​លោកម្ចាស់ក្រញូង និងស្រីក្រមុំនោះ ទៅជាយ៉ាងណា?

ស្ពតផ្សាយរឿង «វិញ្ញាណលោកម្ចាស់គ្រញូង» ជាពីរវគ្គ៖