កាលពីថ្ងៃទី១៩ ខែតុលា ទីប្រឹក្សា​ក្រសួង​ព័ត៌មាន​លោក អ៊ុក គឹមសេង បាន​បង្ហាញ​សារ​រិះ​គន់​មួយ ទៅ​លើ​អាជីព​ជា​ពិធីករ​-​ពិធីការិនី​របស់​តារា​មួយ​ចំនួន ដោយ​ដាក់​អម​​​ដោយ​រូប​ថត​អ្នក​នាង ចន ច័ន្ទលក្ខណា ដែល​មាន​ន័យ​ថា៖ «បើក​ភ្នែក​ឃើញ និង​លឺ​សំភាសន៍ ។ សួរ​ដើម្បី​សួរ=និយាយ​ដូច​អត់​និយាយ។ គួរ​រៀន​របៀប​សំភាសន៍។ ត្រៀម​អ្វី​ខ្លះ ? សំណួរ​ផ្តើម​សេចក្តី សំណួរ​បិទ សំណួរ​បើក។» ខ្លឹមសារ​ក្នុង​ន័យ​ដាស់​តឿន និង​កែ​លម្អ ដោយ​មិន​សំដៅ​ទៅ​លើ​បុគ្គល​ណា​ម្នាក់​នេះ បាន​ធ្វើ​ឱ្យ​អ្នក​នាង ចន ច័ន្ទលក្ខណា ក្តៅ​ស្លឹក​ត្រចៀក​តែ​ម្តង។

ប្រតិកម្មរបស់អ្នកនាង ចន ច័ន្ទលក្ខណា ដែលគេហទំព័រ​ក្នុង​ស្រុក​មួយ​បាន​ធ្វើការ​ចុះ​ផ្សាយ បានឱ្យដឹងថា នេះ​ជាលើកទី១ហើយ ដែលនាងទទួលរង នូវការរិះគន់បែបនេះ ព្រោះថាកន្លងមកមាន ការរិះគន់​ពីទស្សនិក​ជន​មិត្តភក្តិ ក្នុងន័យស្ថាបនាទាក់ទង នឹងសំឡេងរបស់អ្នកនាង។ ម៉េម៉ាយសាច់ខ្ចីសម្តីស្អករូបនេះ បន្តថា​នាង​ទទួល​ស្គាល់ថា សំឡេងរបស់នាងមិនសូវពីរោះ និង​គ្មាន​ទឹកដម​ដូច​ពិធីការិនី​ដទៃ​ឡើយ ប៉ុន្តែនេះជាធម្មជាតិ​នៃ​សម្លេង​របស់នាង ព្រោះរូបនាងផ្ទាល់ក៏មិនអាចកែប្រែវាបាន។

អ្នកនាង ចន ច័ន្ទលក្ខិណា បានបន្ថែមទៀតថា នាងទទួលថា ការងារជាអាជីពពិធីការិនី របស់នាងគឺនៅមាន​កម្រិត ហើយនៅ ក្នុងនោះ នាងក៏ខំប្រឹងពង្រឹងសមត្ថភាព និងហាត់រៀនពីរៀមច្បងដែរ កាលពីពេល​កន្លង​មក គ្រាន់តែមនុស្សយើងម្នាក់ៗ មានជំនាញផ្សេងៗពីគ្នា មិនអាចមានជំនាញ និងពូកែគ្រប់ទាំងអស់ឡើយ តែង​តែ​មានខ្វះចន្លោះ ហើយគ្រាន់តែតិច និងច្រើនប៉ុណ្ណឹងឯង។

តារារាងខ្ពស់ស្រឡះរូបនេះ បាននិយាយទៀតថា៖ «សម្រាប់ខ្ញុំផ្ទាល់ ខ្ញុំគិតថា ប្រយោគរិះគន់ ដែលគាត់ (អ៊ុក គឹមសេង) សរសេររិះ គន់នោះ គឺប្រើប្រាស់ប្រយោគមិនសមរម្យទេ។ ការដែលខ្ញុំនិយាយបែបនេះ គឺខ្ញុំពិត​ជា​មិនយល់ ចំពោះសម្តីរបស់គាត់ ឬក៏និយាយ ម្យ៉ាងទៀតថា គាត់អ្នកចេះដឹងច្រើនជាងខ្ញុំ ទើបខ្ញុំមិនយល់​ក៏​មិន​ដឹង។»។

ឆ្លើយតបនឹងប្រតិកម្ម របស់ពីធីការិនីរបស់ស្ថានីយ៍ ទូរទស្សន៍បាយ័នខាងលើនេះ លោក អ៊ុក គឹមសេង ទីប្រឹក្សា​ក្រសួងព័ត៌មាន បានសរសេរនៅលើទំព័រហ្វេសប៊ុករបស់លោកថា៖ «ជាទូទៅ ប្រតិកម្មសុទ្ធ​តែ​ស្ថាបនា ថែមទាំងសុភាពរាបសារទៀតផង ។ បើមិននិយាយ វានៅតែអញ្ចឹងរហូត។» លោកសរសេរបន្តថា ចំពោះពាក្យសម្តីរបស់លោក មិនបានសំដៅលើ តែអ្នកនាង ចន ច័ន្ទលក្ខិណា តែម្នាក់នោះទេ ប៉ុន្តែ​អ្នក​នាង​ជាតួអង្គសំខាន់ មហាជនចាប់អារម្មណ៍។

លោកបន្ថែមថា៖ «ក្នុងកម្មវិធីនោះ ពិធីករ ពិធីការនី ព្យាយាមប្រាប់ពីរឿងរបស់គាត់ ជូនភ្ញៀវក្នុងកម្មវិធី រីឯ​ភ្ញៀវ​កំពុងតែប្រាប់ ពីបំណងពង្រីកបទចម្រៀង ខ្មែរជួយខ្មែរ ដល់ចឹងទៅ ខ្ញុំគិតថា ពួកគាត់មិនដឹងចង់ផ្ញើសារ​ណា​មួយ ជូនដល់សាធារណជន។ បែជាដណ្តើមភ្ញៀវនិយាយ។ រិះគន់អ្នកល្បី ទើបផ្ញើសារជូន។ រូបរបស់​គាត់ មិនបានចោទគាត់ទាំងស្រុងនោះទេ។ ចូលសាលាព័ត៌មានច្រើន ទើបដឹងពីសារសំខាន់ពីពិធីករ និង​វាគ្មិន។»

អ្នកប្រើប្រាស់បណ្តាញសង្គមហ្វេសប៊ុកម្នាក់ បានលើកឡើងថា ការរិះគន់របស់ទីប្រឹក្សាក្រសួងព័ត៌មាន ពិត​ជា​ត្រឹមត្រូវ មិនគួរណា អ្នកនាង ចន ច័ន្ទលក្ខណា បញ្ចេញប្រតិកម្មអញ្ចឹងទេ។ នាងគួរតែយកពាក្យរិះគន់នេះ ទៅស្ថាបនាខ្លួនឯង។ ប្រិយមិត្តរូបនោះ បានសរសេរឲ្យយោបល់បន្ថែមថា៖ «គាត់ជាតំណាងអោយ​ក្រសួង​សាម៉ី ត្រូវរិះគន់ពីចំណុចល្អ និងចំណុចអាក្រត់ខ្លះចឹងហើយ (ពេលខ្លះកម្មវិធីជជែក១ម៉ោង អត់ដឹង​ចង់​និយាយ​ពីមុំអ្វី អោយពិតប្រាកដ និយាយអានេះបន្តិច អានោះបន្តិចរកសាច់ការគ្មាន)»៕