ខៀវ កាញារីទ្ធ៖ CPP មិនទ្រមេឃុំ ចៅសង្កាត់ណាដែលធ្លាក់ឆ្នោត
- ដោយ: ដារា រិទ្ធ ([email protected]) - ភ្នំពេញ ថ្ងៃទី២ មករា ២០១៧
- កែប្រែចុងក្រោយ: January 03, 2017
- ប្រធានបទ: បោះឆ្នោតឃុំសង្កាត់
- អត្ថបទ: មានបញ្ហា?
- មតិ-យោបល់
-
មេឃុំ ចៅសង្កាត់ ដែលចាញ់ឆ្នោត និងមេឃុំ ចៅសង្កាត់ ដែលមិនឈរឈ្មោះ ក្នុងការបោះឆ្នោត មិនដូចគ្នាទេ។ នេះបើតាមការពន្យល់ របស់លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន តបទៅនឹងការចុះផ្សាយមួយ របស់វិទ្យុសម្លេងប្រជាធិបតេយ្យ (ឬហៅថា វីអូឌី «VOD») ដែលបានស្រង់សេចក្ដី នៅក្នុងលិខិតមួយ ចុះហត្ថលេខា ដោយសេនាធិការគណបក្ស អ្នកស្រី ម៉ែន សំអន មករាយការណ៍ថា គណបក្សប្រជាជនកម្ពុជា តម្រូវទៅមន្ត្រី«គ្រាក់ៗ» របស់ខ្លួន ដែលមានតំណែង ជារដ្ឋមន្ត្រី និងរដ្ឋលេខាធិការ ប្រមាណជា២៣នាក់ ឲ្យទទួលខុសត្រូវ ចំពោះមេឃុំ ឬចៅសង្កាត់ ដែលមិនជាប់ឈ្មោះ ក្នុងការបោះឆ្នោត។
លោក ខៀវ កាញារីទ្ធ បានចោទសួរ នៅលើគណនេយ្យហ្វេសប៊ុករបស់លោក ដោយចំអក ទៅកាន់ប្រព័ន្ធផ្សព្វផ្សាយនោះវិញថា៖ «ជាព័ត៌មាន ឬជាការបំពុលព័ត៌មាន? (...) ជួយខ្សិបប្រាប់ កុំឲ្យគេថាជាអ្នក ក្រ សែត នាំខូចពូជ។»។
ដូចជាកំប្លែងពេកទេដឹង?
បន្ទាប់មក រដ្ឋមន្ត្រីក្រសួងព័ត៌មាន ដែលមាននាទីដ៏សំខាន់ នៅក្នុងគណបក្សប្រជាជនកម្ពុជាដែរនោះ បានរៀបរាប់ថា៖ «ឃើញប្រព័ន្ធផ្សព្វផ្សាយមួយនិយាយថា ថ្នាក់ដឹកនាំគណបក្សប្រជាជន ណែនាំមន្ត្រីខ្លួន ជួយរកកន្លែងសំរាប់មេឃុំ ចៅសង្កាត់ ដែលមិនជាប់ឆ្នោត»។
លោក បានសរសេរពន្យល់មកវិញថា៖ «ដូចជាកំប្លែងពេកទេដឹង? បើមិនជាប់ឆ្នោត គឺខ្លួនគ្មានការគាំទ្រ របស់ប្រជាជនហើយ ទៅប្រឹងទ្រអីទៀត? ការណែនាំ (EDitor's Note៖ ចង់សំដៅទៅលិខិតរបស់អ្នកស្រី ម៉ែន សំអន) គឺមេឃុំ ឬ ចៅសង្កាត់ណា ដែលមិនឈរជាបេក្ខជនទៀត ក៏ត្រូវតែជួយទំនុកបំរុងគាត់ ជាព្រឹទ្ធាចារ្យម្នាក់ នៅក្នុងជួរ(គណ)បក្សឃុំ។»
មិនឈរឈ្មោះ ឬធ្លាក់ឆ្នោត?
ការលើកឡើង របស់លោក ខៀវ កាញារីទ្ធ មានភាពប្រហាក់ប្រហែលច្រើន ជាមួយនឹងការថ្លែងឡើង របស់លោក សុខ ឥសាន អ្នកនាំពាក្យរបស់គណបក្សប្រជាជនកម្ពុជា ដែលត្រូវបានស្រង់សំដី ដោយវិទ្យុ«វីអូឌី»ដដែល។ រដ្ឋមន្ត្រីក្រសួងព័ត៌មាន និយាយពីការ«ជួយទំនុកបំរុង» មេឃុំ ចៅសង្កាត់ ដែលមិនបានឈរឈ្មោះ ជាបេក្ខជន ឲ្យទៅជា«ព្រឺទ្ធាចារ្យ»ម្នាក់ នៅក្នុង«ជួរបក្សឃុំ» ខណៈលោក សុខ ឥសាន បានលើកឡើង ពី«ប្រាក់ឧបត្ថម្ភ» ដែលគណបក្សតម្រូវឲ្យមន្ត្រីទទួលខុសត្រូវ តាមតំបន់នីមួយៗ (ទាំង២៣រូប គ្រាក់ៗ ដែលមានឈ្មោះ នៅក្នុងលិខិត) ធ្វើការបរិច្ចាគទៅឲ្យ (អតីត)មេឃុំ ចៅសង្កាត់ទាំងនោះ។
ប៉ុន្តែអ្នកនាំពាក្យគណបក្សកាន់អំណាច ហាក់សង្កត់ករណីនេះ ទៅលើបេក្ខជន ដែលធ្លាក់ឆ្នោតទៅវិញ។ លោក សុខ ឥសាន បានថ្លែងប្រាប់វិទ្យសម្លេងប្រជាធិបតេយ្យថា៖ «អាហ្នឹង ស៊ីសងអាស្រ័យ លើការស្ម័គ្រចិត្ត របស់អ្នកទទួលខុសត្រូវហ្នឹងទេ។ ខ្ញុំយល់ថា វាមិនធ្ងន់ធ្ងរទេ ពីព្រោះនៅតាមឃុំ សង្កាត់ តាមខេត្តមួយចំនួន មិនមែនបេក្ខជនដែលឈរឈ្មោះ វាធ្លាក់ទាំងអស់ឯណា រាប់រយនាក់។ មួយពីរ តែប៉ុណ្ណឹងទេ។»៕