គេនៅចាំបានថា កាលពីឆ្នាំ២០១៣ មុនពេលអ្នកនាង សារ៉ាយ សក្ខណា មិនទាន់ចូលរោងការ ជាមួយ​បុរស​ខ្មែរ-អាមេរិកាំង អ្នកនាងត្រូវបានគេចាត់ទុកថា ជាតារាសម្តែងស្រីដ៏ឆ្នើម ដែលមានភាពលេចធ្លោ និងមាន​ប្រជាប្រិយភាព លោតខ្លាំងជាងគេ ក្នុងចំណោមអ្នកសិល្បៈ។ អ្នកនាងត្រូវបានអ្នកដឹកនាំរឿង​នៅផលិតកម្ម​នានា ក៏ដូចជាស្ថានីយទូរទស្សន៍មួយចំនួន ហៅទៅថតស្ទើដកខ្លួនមិនរួច។

ប៉ុន្តែ នៅក្នុងឆ្នាំ២០១៤នេះ ក្រោយពីតារាសម្តែងស្រីដ៏មានប្រជាប្រិយភាព អ្នកនាង សារ៉ាយ សក្ខណា បាន​សម្រេចចិត្តផ្អាកដើរចេញពីវិថីសិល្បៈ ទស្សនិកជនសង្កេតឃើញថា តារាសម្តែងសម្បុរស្រអែម កញ្ញា ឌុច លីដា ក៏ចាប់ផ្តើមមានទីផ្សារថតរឿង បន្តវេនពីតារាសម្ដែងជំនាន់មុន។

ខ្សែភាពយន្ត ដែលតារាសម្តែងដែល​មានទម្រង់មុខកូនកាត់រូបនេះ ទទួលថតភាគច្រើន គឺសុទ្ធសឹង​តែជា​រឿងខ្នាតធំ និងលំដាប់អន្តរជាតិ ដូចជារឿង«ស្បែកគង់» និងរឿង«ដំរីមរកត« ដែលថតជាមួយ តារាសម្តែង​ប្រុសល្បីឈ្មោះរបស់សឹង្ហបុរីជាដើម។

យល់ស្របនឹងករណីនេះដែរ ម៉ាណា ជាកូនជាងក្នុងហាងកែសម្ផសមួយក្នុងរាជធានីភ្នំពេញ បាន​លើកឡើង​ដូច្នេះដែរថា៖ «កាលបីមុន ធ្លាប់តែឃើញរឿងភាគច្រើន សម្តែងដោយ សារ៉ាយ សក្ខណា តែឥលូវភាគច្រើន គឺឌុច លីដា។ ថ្មីៗនេះ នាងឡើងកូដខ្លាំងណាស់។»

ម៉ាណា ប្រិយមិត្តអ្នកស្រឡាញ់សិល្បៈរូបនេះ បានបន្តថា ដើមឡើយ ក្រោយពីអ្នកនាង សក្ខណា បញ្ចប់​អាជីព​សិល្បៈ គេរំពឹងទុកថាតំណែង តារាស្រីឆ្នើម នឹងត្រូវតារាសម្តែងស្របាលនឹងនាងឆក់បាន ដូចជាកញ្ញា នី មុនីនាថ ម៉ាក សែនសូនីតា មាន សូនីតា គង់ ចាន់ស្រីមុំជាដើម និងតារាសម្តែងស្រីល្បីៗ មួយចំនួនទៀត ដែលមានបទពិសោធ ជាច្រើនឆ្នាំ។ ប៉ុន្តែ តំណែងតារាស្រី ដែលមានប្រជាប្រិយភាពបន្តពី អ្នកនាង សារាយ សក្ខណា បែរជាបានទៅលើតារាសម្តែងពន្លកថ្មី កញ្ញ ឌុច លីដា ទៅវិញ។ ​«ខ្ញុំគិតថា ឆ្នាំនេះនាងប្រាកដ​ជា​អាចក្លាយជាម្ចាស់ពាន តារាសម្តែងឆ្នើម របស់អាណាចក្រតារា​ក្នុងឆ្នាំ២០១៤នេះ» កញ្ញាម៉ាណា បាន​សម្ដែង​ការជឿជាក់បន្ថែម៕