យឹម តាស្រង់ ថាអ្នកនិពន្ធជំនាន់ក្រោយមើលឃើញតែលុយ
- ដោយ: ប្រាថ្នា អត្ថបទ និងយកការណ៍៖ ប្រាថ្នា ([email protected]) - ភ្នំពេញ ថ្ងៃទី១៦ មករា ២០១៥
- កែប្រែចុងក្រោយ: January 16, 2015
- ប្រធានបទ: ចម្រៀង
- អត្ថបទ: មានបញ្ហា?
- មតិ-យោបល់
-
អ្នកនិពន្ធជំនាន់ក្រោយ តែងនិយាយថា ខ្លួនស្រឡាញ់បទនិពន្ធថ្មីមិនចម្លង ប៉ុន្តែបទភ្លេងថ្មីដែលនិពន្ធមិនទាន់ល្អផង បែរជាតម្លៃដែលដាក់មក មានកម្រិតហួសកបពពក។ ការគិតលុយជាធំនេះហើយ ជាហេតុផលដែល លោក យឹម តាស្រង់ មិនឆ្លើយតបនៅពេលអ្នកនិពន្ធក្មេងៗទាំងនោះ លក់បទភ្លេងនិពន្ធថ្មីឱ្យ។ នេះបើតាមការលើកឡើងរបស់អ្នកនិពន្ធវ័យក្មេងលោក យឹម តាស្រង់។
ការចម្លងបទចម្រៀងពីគេ ជាពិសេសពីប្រទេសជិតខាង ថៃ ចិន និងវៀតណាមជាដើម បានធ្វើឱ្យផលិតកម្មធំៗមួយចំនួន រងការរិះគន់ពីទស្សនិកជនយ៉ាងខ្លាំង។ ដោយយ៉ាងនេះហើយ ទើបអ្នកភ្លេងជំនាន់ថ្មី ព្យាយាមនិពន្ធទំនុកបទថ្មី ដោយខ្លួនឯង។ ប៉ុន្តែបើទោះបីជាពួកគេខិតខំ និពន្ធបទភ្លេងថ្មីជាច្រើនក៏ដោយ ក៏បទចម្រៀងដែលជាការនិពន្ធថ្មី របស់អ្នកនិពន្ធជំនាន់ក្រោយទាំងនោះ ហាក់មិនមាននៅលើទីផ្សារចម្រៀងនោះទេ។ មិនមានទីផ្សារ ទំនងមកពីកត្តាដូចលោក យឹម តាស្រង់ បានលើកឡើងថា មូលហេតុផលិតកម្មមិនទិញបទភ្លេងថ្មី ដែលជាការនិពន្ធសុទ្ធសាធរបស់កូនខ្មែរ ដោយសារតម្លៃថ្លៃ ហើយត្រូវយកមកកែកុនបន្ថែមទៀត។
លោក យឹម តាស្រង់ សរសេរនៅលើទំព័រហ្វេសប៊ុករបស់លោកថា៖ «អ្នកភ្លេងចាស់ៗ ជំនាញៗរាប់ឆ្នាំ បានពិក្សាគ្នាដើម្បីអោយមានការបញ្ចុះតម្លៃ ចំពោះការធ្វើភ្លេងថ្មីអោយទាប ស្ទើរតែស្មើរតម្លៃបទចម្លង ដើម្បីនាំឲ្យមានការលុបបំបាត់បទចម្លង។ ប៉ុន្តែក្រឡេកមើលប្អូនៗអ្នកភ្លេងថ្មីៗ តាមFacebookវិញ មិនទាន់ទាំងចេះ Mix ស្រួលបួលផង ដាក់តម្លៃសុទ្ធតែធ្វើភ្លេងថ្មី ១បទ $100 ខ្លះ$150 ខ្លះដាក់តម្លៃ $200 ខ្លះ $300 ខ្លះដល់ទៅ $400។ ហើយបទដែលទិញមកនោះ គឺមិនអាចយកបានតែម្តងទេ គឺក្រុមហ៊ុនអោយអ្នកភ្លេងជំនាញៗ សម្រួលបទគាត់ឡើងវិញ និង Mix ដែលក្រុមហ៊ុនត្រូវចំណាយលុយម្តងទៀត សម្រាប់បទដែលទិញមក។»។
លោកយល់ថា ការទារតម្លៃថ្លៃហួសពីសមត្ថភាពដូចនេះ វាប្រៀបដូចជារឿងកំប្លែងមួយ។ ការទារតម្លៃលើសមិនគប្បីនឹងសមត្ថភាពនេះ វាក៏ធ្វើឱ្យពួកគេបាត់ឱកាស ដែលបទភ្លេងនិពន្ធថ្មីរបស់គេមិនបានចេញលក់ផងដែរ។
លោកបន្ថែមថា៖ «ឱកាសគឺយើងចង់អោយណាស់។ តែប្អូនៗគួរវាស់ពីសម្ថតភាពខ្លួនឯងផង មុននឹងចង់បានតម្លៃខ្ពស់។ ហើយប្អូនៗកុំតូចចិត្ត ពេលគេមិនអោយឱកាស។ កុំចង់ដើរមួយជំហ៊ានដល់មេឃ។ អ្វីៗក៏ដោយ ត្រូវដើរតាមដំណាក់កាល។»៕