ដង្ហែក្បួនទិវាសិទ្ធិមនុស្ស៖ អង្គការសង្គមស៊ីវិលសុំប្ដូរទិសដៅ
- ដោយ: មនោរម្យ.អាំងហ្វូ អត្ថបទ និងយកការណ៍៖ ឌីណា ([email protected]) - ភ្នំពេញថ្ងៃទី៣ ធ្នួ ២០១៥
- កែប្រែចុងក្រោយ: December 04, 2015
- ប្រធានបទ: សិទ្ធិ
- អត្ថបទ: មានបញ្ហា?
- មតិ-យោបល់
-
ការស្នើរសុំជាបន្ត ទៅកាន់ក្រសួងមហាផ្ទៃ បានធ្វើឡើងបន្ទាប់ពីសំណើរលើកទីមួយ របស់ពួកគេ ដែលសុំដើរដង្ហែជាក្បួន ពីពហុកីឡាដ្ឋានជាតិអូឡាំពិក ទៅសួនច្បារ មុខវត្តបទុមវត្តីនៅថ្ងៃទី១០ ខែធ្នូខាងមុខ ត្រូវបានសាលារាជធានីបដិសេធ និងប្រាប់ឲ្យប្ដូរទិសដៅ ត្រឹមតែពីមុខស្ថានីយអយស្ម័យាន ទៅកាន់ទីលានប្រជាធិបតេយ្យ ដែលមានចំងាយពីគ្នា ប្រមាណជា១០០ម៉ែត្រប៉ុណ្ណោះ។
តំណាងសម្ព័ន្ធអង្គការសង្គមស៊ីវិល និងជាប្រធានលេខាធិការ គណៈកម្មាធិការ នៃអង្គការសមាគមការពារសិទ្ធិមនុស្ស (CHRAC) លោក សួន ប៊ុនសក្តិ បានឲ្យដឹងថា ក្រុមអង្គការសង្គមស៊ីវិល នៅតែរក្សាជំហរ ក្នុងការហែក្បួន តែដើម្បីបញ្ចៀសការកកស្ទះចរាចរណ៍ ដូចការអះអាងរបស់សាលារាជធានីនោះ សង្គមស៊ីវិលបានសម្រេចផ្លាស់ប្តូរ ការប្រមូលផ្តុំ ទៅខាងមុខមន្ទីររដ្ឋសភាជាតិវិញ ហើយហែរទៅប្រមូលផ្តុំនៅលើទីលានប្រជាធិបតេយ្យវិញ ដោយធ្វើលិខិតជូនដំណឹងមួយ ទៅកាន់ក្រសួងមហាផ្ទៃ។
ប៉ុន្តែ លិខិតជូនដំណឹង របស់ក្រុមអង្គការសង្គមស៊ីវិល ត្រូវបានក្រសួងមហាផ្ទៃបដិសេធ មិនទទួលយក និងបានណែនាំ ឲ្យក្រុមអង្គការទាំងនេះ ស្នើសុំទៅសាលារាជធានីភ្នំពេញ ជាថ្មីទៀត។ នេះបើតាមការអះអារ របស់លោក អៀង ពេជ្រ លេខាធិការ CHRAC ដែលបានថ្លែងប្រាប់សារព័ត៌មានក្នុងស្រុក។
សូមបញ្ជាក់ដែរថា ក្រុមសម្ព័នអង្គការសង្គមស៊ីវិល បានស្នើទៅ សាលារាជធានីភ្នំពេញ ឲ្យអនុញ្ញាត ដល់សម្ព័ន្ធអង្គការសង្គមស៊ីវិល រៀបចំពិធីអបអរទិវាសិទ្ធិមនុស្ស លើកទី៦៧ ដោយមានទាំងការហែក្បួនដ៏វែងមួយផង។ កិច្ចប្រជុំដើម្បីជជែកពីសំណើរនេះ ត្រូវបានធ្វើឡើង រវាងតំណាងអង្គការសង្គមស៊ីវិលទាំងនោះ និងសាលារាជធានី កាលពីថ្ងៃទី៣០ ខែវិច្ឆិកា ឆ្នាំ២០១៥ ក្នុងសាលារាជធានី ដោយមានការចូលលរួម ពីលោក ឃួង ស្រេង អភិបាលរងរាជធានីភ្នំពេញ។
រីឯការបដិសេធ និងប្ដូរទិសដៅ កំណត់ដោយសាលារាជធានីនោះ ត្រូវបានលោកឡង់ ឌីម៉ង់ អ្នកនាំពាក្យសាលារាជធានីភ្នំពេញ បញ្ជាក់មូលហេតុ នៅក្នុងកំណត់ហេតុ នៃអង្គប្រជុំខាងលើថា ដើម្បីជៀសវាងការកកស្ទះចរាចរណ៍ និងការពារសន្តិសុខ កិច្ចប្រជុំសភាអន្តរជាតិ (APA) ដែលនឹងប្រព្រឹត្តិទៅ នៅរាជធានីភ្នំពេញ ចាប់ពីថ្ងៃទី៧ ដល់ថ្ងៃទី១២ ខែវិច្ឆិកា ឆ្នាំ២០១៥ ខាងមុខនេះ។ លោកបានពន្យល់បន្ថែមថា ម្យ៉ាងទៀត ចំនួនអ្នកចូលរួម មានដល់៥,០០០នាក់ ជាចំនួនដែលលើសពីសមត្ថកិច្ច របស់សាលារាជធានី ហើយសាលារាជធានីត្រូវដឹងថា តើសមាសភាពចូលរួមមកពីណាខ្លះ - បើមកពីខេត្ត សាលារាជធានីចង់ដឹង ទីតាំងស្នាក់នៅឲ្យបានជាក់លាក់៕