ការមិនបន្តទិដ្ឋាការ ឲ្យ អាឡិច រស់នៅកម្ពុជាបន្ត គឺជាការំលោភច្បាប់។ នេះជាការលើកឡើង របស់លោក នី ចរិយា ប្រធានផ្នែកសិទ្ធិមនុស្ស និងច្បាប់របស់សមាគម ការពារសិទ្ធិមនុស្ស អាដហុក ថ្លែងនៅមុខរដ្ឋសភា​ជាតិ​ កាលពីព្រឹកថ្ងៃទី២០ ខែកុម្ភៈនេះ។

លោក ចរិយា បានពន្យល់ថា ច្បាប់ស្តីអំពីជនអន្តោរប្រវេសន៍ បានបែងចែកជាបីផ្សេងៗគ្នា ទីមួយ គឺជនបរទេស​អន្តោរប្រវេសន៍ ទីពីរជនបរទេស មិនអន្តោរប្រវេសន៍ និងទី៣ជនបរទេសជាវិនយោគិន។ ហើយអាឡិច ជាជន​បរទេសមិនអន្តោរប្រវេសន៍ បើនិយាយពីចំនុចទីពីរ នៅក្នុងច្បាប់ស្តីអំពីជនអន្តោរប្រវេសន៍នោះ។ ដូច្នេះរដ្ឋ​គ្មាន​សិទ្ធិ​ដេញជននេះចេញ ពីប្រទេសរបស់ខ្លួននោះទេ ព្រោះលោក អាឡិច មកកម្ពុជា ដោយមានវីសារ ជាវីសារ​មិន​អន្តោប្រវេសន៍។

លោកបញ្ជាក់យ៉ាងដូច្នេះថា រដ្ឋមិនអាចបន្តជនបរទេស ឲ្យរស់នៅកម្ពុជាបាន លុះត្រាណាតែជនបរទេសនោះ ចូល​មករស់នៅដោយមិនស្របច្បាប់ ម្យ៉ាងវិញទៀត លោក អាឡិច មិនបានអនុវត្តបទល្មើសផ្សេងៗ ដែលធ្វើឲ្យ​មាន​ផលប៉ះពាល់ ចំពោះប្រទេសកម្ពុជា។ដូច្នេះក្រសួងមហាផ្ទៃ មិនមានហេតុផលអ្វី ក្នុងការមិនបន្តទិដ្ឋាការឲ្យ​លោក អាឡិច នោះឡើយ។

លោកបានរំលឹកបន្ថែមថា អនុប្រធានទី១ នៃរដ្ឋសភាបានថ្វាយញតិ្ត ទៅព្រះមហាក្សត្ររួចទៅហើយ ក្នុងការ​សុំឲ្យ​ព្រះអង្គពិចារណា និងធ្វើអន្តរាគមន៍ ចំពោះការសុំបន្តទិដ្ឋាការរបស់លោក អាឡិច បន្តរស់នៅកម្ពុជាទៀត។ លោក​ថា បើរឿងមួយកំពុងស្ថិតនៅក្នុងព្រះបរមរាជវាំង ដែលព្រះមហាក្សត្រកំពុងធ្វើការដោះស្រាយនោះ ក្រសួង​មហាផ្ទៃមិនគួនឹងអនុវត្តន៍នោះទេ ព្រោះបើអនុវត្តន៍មានន័យថា យើងរំលោភលើអង្គព្រះមហាក្សត្រ និង​ម៉ាក់ងាយ​ទៅដល់ព្រះមហាក្សត្រជាមិនខាន។

ក្រសួងមហាផ្ទៃកម្ពុជា បានចាត់ទុកលោក អាឡិច ដែលជាអនុប្រធាន អង្គការចលនាមាតាធម្មតា បានប្រព្រឹត្ត​ខុស​ទៅ​នឹង​លក្ខន្តិកៈរបស់អង្គការ ដែលតម្កល់ទុកនៅក្រសួងមហាផ្ទៃ ដោយបានធ្វើសកម្មភាពរារាំង ការគ្រប់​គ្រង​រដ្ឋបាល​សាធារណៈ របស់​អាជ្ញាធរ ខេត្តកោះកុង តាមរយៈការញុះញង់ប្រជាជន ឱ្យចូលរួមបិទ​ផ្លូវ​សាធារណៈ មិនឱ្យ​ក្រុមការងារ ចុះ​ទៅ​ជួប​ប្រជាពលរដ្ឋ នៅឃុំថ្មដូនពៅ ឃុំប្រឡាយ និងឃុំជំនាប់ ក្នុងស្រុក​ថ្ម​បាំង។ នេះបើ​តាម​លិខិតជាផ្លូវការមួយ ផ្ញើរតបទៅលោក សម រង្ស៊ី ប្រធានតំណាងរាស្ត្រភាគតិច ក្នុងរដ្ឋសភា និងជាប្រធាន​គណបក្សសង្គ្រោះជាតិ កាលពីថ្ងៃទី១៨ ខែកុម្ភៈ៕