ករណីអគ្គីភ័យមួយ ដែលឆេះក្លិបការ៉ាអូខេ ស្កាយផត (Sky Port) បានកើតឡើង នៅវេលាម៉ោង២០ និង២០នាទី យប់ថ្ងៃទី ១៨ ខែ កញ្ញា ឆ្នាំ២០១៥ នៅតាមបណ្តោយផ្លូវ២០៤ ស្ថិតក្នុងភូមិត្រពាំងល្វា សង្កាត់កាកាប ខណ្ឌ​ពោធិ៍សែន​ជ័យ រាជធានីភ្នំពេញ បណ្តាលឲ្យខូចខាតសម្ភារមួយចំនួន។

តាមមេការម្នាក់ បានឲ្យដឹងថា គាត់បានបំរើភ្ងៀវ នៅជិតបន្ទប់ ២០៧ ដែលអគ្គីភ័យផ្តើមឆេះនោះ។ ហើយ​ពេល​បំរើភ្ងៀវរួច ចេញមកក្រៅវិញ ក៏ស្រាប់បានឃើញបន្ទប់ ២០៧ ដែលចាក់សោរចោលយូហើយនេះ មានផ្សែង​ភ្លើងកំពង់ឆាបឆេះ។ លោកមេការរូបនោះ បានស្រែកឡើង រហូតផ្អើលដល់បុគ្គលិកផ្សេងទៀត ហើយនាំគ្នា​ទៅ​យកបំពង់ពន្លត់អគ្គីភ័យមក ពន្លត់ តែមិនអាចពន្លត់ភ្លើងបាន ទើបហៅរថយន្តពន្លត់អគ្គីភ័យ មកជួយធ្វើការ​អន្តរាគមន៍។

ប្រភពព័ត៍មានដដែល បានបន្តទៀតថា អគ្គីភ័យនេះឆេះនៅជាន់ទី២ ក្នុងបន្ទប់ ២០៧។ ក្នុងហេតុការណ៍នេះ បណ្តាលឲ្យខូចខាត ទូរទឹកកក ទូរទស្សន៍ កំព្យូទ័រ និងសម្ភារមួយចំនួនទៀត តែមិនដឹងថាសរុបជា ទឹកប្រាក់​អស់ប៉ុន្មានឡើយ។ ប៉ុន្តែជាសំណាងល្អ ដែលមិនប៉ះពាល់ ដល់អាយុជីវិតមនុស្ស និងមិនរាលដាល ដល់ផ្ទះ​ប្រជា​ពលរដ្ឋផ្សេងទៀត នៅម្តុំនោះ។

បើតាមការអះអាង របស់មេបញ្ជាការ ខាងរថយន្តពន្លត់អគ្គីភ័យ បានឲ្យដឹងថា នៅក្នុងករណីឆាបឆេះនេះ ស្ថាប័នលោក បានប្រើប្រាស់រថយន្តពន្លត់ភ្លើង អស់ ១៩ គ្រឿង ទើបអាចពន្លត់ភ្លើងបានសម្រេច។ ចំណែក​មូលហេតុ ដែលបង្កឲ្យមាន អគ្គីភ័យនេះ គឺបណ្តាលមកពីការឆ្លង ចរន្តអគ្គីសនី៕