ហេតុការណ៍ដ៏ភ្ញាក់ផ្អើលនេះ បានកើតឡើង នៅវេលាម៉ោង១ និង៣០នាទី យប់ព្រហាម ថ្ងៃទី០៥ ខែកញ្ញា ឆ្នាំ​២០១៥ នៅតាមបណ្តោយផ្លូវលេខ ៣១៨ សង្កាត់ទួលស្វាយព្រៃទី១ ខណ្ឌចំការមន រាជធានីភ្នំពេញ។

យោងតាមការបញ្ជាក់ របស់លោក លី សុខលីម ជាម្ចាស់ផ្ទះរងគ្រោះ បានប្រាប់ឱ្យដឹងថា មូលហេតុបណ្តាល​មកពី ផ្ទុះប្រអប់ភ្លើងលេខ ២០២ បន្ទាប់មកធ្លាក់រងើកភ្លើង មកលើឥវ៉ាន់ ក្នុងផ្ទះរបស់លោក ទើបបាន​ឆាប​ឆេះ ជាអណ្ដាតភ្លើងធំតែម្តង។ លោកបន្ថែមថា ក្រុមគ្រួសារប្រពន្ធកូន និងម្តាយលោក មិនបានរងរបួសអ្វីទេ តែ​ទ្រព្យ​សម្បត្តិ នៅក្នុងមួយល្វែងផ្ទះ បានឆេះស្ទើរទាំងស្រុង ក្នុងនោះមានម៉ូតូ បីគ្រឿង រថយន្តទំនើបមួយគ្រឿង និង​សម្ភារៈ​ជាច្រើនទៀត សរុបជាទឹកប្រាក់ ប្រមាណ ៤៨ម៉ឺនដុល្លារ។

លោកបានរៀបរាប់ថា ដើមដំបូងឡើយ លោកមិនបានឃើញ ព្រិត្តិការណ៍ដោយផ្ទាល់ទេ គឺអ្នកស្រីជាម្តាយ​លោក ជាអ្នកឃើញ រួចបានចូលទៅហៅលោក។ តែពេលភ្ញាក់ឡើង កំឡុងម៉ោងជាង ១ រំលងអាធ្រាតនោះ អណ្តាតភ្លើង បានឆាបឆេះយ៉ាងសន្ធោសន្ធៅ និងបានឆេះអស់ទ្រព្យសម្បត្តិលោក មួយចំនួនទៅហើយ។ លោក​មានតែនាំគ្រួសារ ចេញប៉ុណ្ណោះ។

អ្នកស្រី ជិន ណារី ជាគ្រួសារជនរងគ្រោះមួយទៀត បានឱ្យដឹងថា នៅយប់កើតហេតុ អ្នកស្រីមិនបានចូល​សម្រាក​ឆាប់ ដូចសព្វមួយដងទេ ព្រោះរវល់រៀបចំឥវ៉ាន់ ទៅលក់នៅផ្សារ។ តែនៅពេលបានចូលសម្រាកបន្តិច ក៏ស្រាប់តែ មានហេតុការណ៍នេះកើតឡើងតែម្ដង។ ពេលនោះ ផ្ទះអ្នកស្រីបិទទ្វារជិត មិនអាចចេញបានឡើយ បង្ខំឲ្យអ្នកស្រី និងគ្រួសារ ត្រូវរត់ចេញតាមផ្ទះអ្នកជិតខាង ដើម្បីគេចពីអំណាចភ្លើង។

នៅក្រោយហេតុការណ៍ប្រមាណមួយម៉ោង ក្រុមអ្នកពន្លត់អគ្គីភ័យ បានធ្វើការពន្លត់ភ្លើើងទាំងនេះបានសម្រេច ដោយការប្រើប្រាស់​រថយន្តពន្លត់អគ្គីភយ័ អស់ចំនួន៤គ្រឿង ហើយបញ្ចប់នៅម៉ោង២ និង៤០នាទី ទាបភ្លឺ ថ្ងៃ​ដដែល។ ទស្សនាវដ្ដីមនោរម្យ.អាំងហ្វូ មិនទាន់អាចសុំការបញ្ជាក់ ពីខាងមមន្ត្រីជំនាញ ខាងការពន្លត់អគ្គិភ័យ ដើម្បីដឹងពីមូលហេតុផ្លូវការ នៃហេតុការណ៍នេះនៅឡើយ៕