ពលរដ្ឋក្នុងតំបន់អភិវឌ្ឍន៍បឹងកក់ ដែលបានរងគ្រោះ នឹងការបណ្ដេញចេញ បានថ្លែងលើកឡើង ពីការត្អូញត្អែរ​របស់​ពួក​គេថា មកដល់ពេល ក្រោយចូលឆ្នាំថ្មីនេះហើយ តែពួកគាត់នៅតែរង់ចាំ ការដោះស្រាយ របស់សាលារាជធានីភ្នំពេញ ដែល​មិនទាន់ដាច់ស្រេចនោះ ដដែល។

រស់នៅក្នុងខ្ទម លើតំបន់អភិវឌ្ឍន៍បឹងកក់ ដែលមានទំហំប្រមាណ ៩០ ហិកតា និងមកដល់សព្វថ្ងៃ នៅសល់តែវាលខ្សាច់ គ្មានអ្វីទាំងអស់នោះ លោក ឃិន ចន្ថា បានប្រាប់ឲ្យទស្សនាវដ្តីមនោរម្យ.អាំងហ្វូដឹង នៅថ្ងៃទី២០ ខែមេសា ឆ្នាំ២០១៥ថា គ្រួសារលោកមានកូន៤នាក់ កំពុងរស់នៅលើដី ដែលត្រូវបានក្រុម ស៊ូកាគូ ចាក់បំពេញ និងកំពុងរង់ចាំសំណងសមរម្យ ពីសាលារាជធានីភ្នំពេញ។ ប៉ុន្តែមួយលើក ជាពីរលើក សាលារាជធានី នៅតែបន្តនិយាយ ទាំងមិនច្បាស់លាស់ និយាយ​បាតដៃខ្នងដៃ ម្តងថាឲ្យ៣ប្លង់ ម្តងថាមិនឲ្យ។ លោកបានពន្យល់ថា អ្នកទាំង៨គ្រូសារ ដែលហ៊ានទទួលយកដីនោះ ដោយ​សារតែដី ដែលពួកគាត់នៅពីមុន មានតិចជាងពីរប្លង់ ចំណែកឯគ្រួសារគាត់ មានរហូតដល់ទៅ៤ប្លង់ ទើបគាត់មិន​អាច​យក​សំណង​នេះ​បាន។

ពលរដ្ឋ ដែលកំពុងបន្តរស់នៅ លើដីរបស់ខ្លួន ស្ថិតក្នុងភូមិន២២ សង្កាត់ស្រះចក់ ខណ្ឌដូនពេញ រាជធានីភ្នំពេញ រូបនេះ បានថ្លែងបញ្ជាក់ថា សាលារាជធានីភ្នំពេញ បានហៅពួកគាត់ ទៅដោះស្រាយ ជាមួយអ្នកភូមិ១០គ្រួសារទៀត តែយល់​ព្រម​បានតែ៨គ្រួសារប៉ុណ្ណោះ។ ចំណែកឯពីរគ្រួសារទៀត ដែលមានគ្រួសារលោកមួយដែរ មិនព្រមទទួលយកដំណោះ​ស្រាយនេះទេ ដោយហេតុថា វាបានតិចជាងអ្វី ដែលលោកបានបាត់បង់ គឺលោកចង់បាន ដីនោះ៤ប្លង់មកវិញ។

លោក ឃិន ចន្ថាលើកឡើងថា៖ «ខ្ញុំមើលឃើញថា សាលារាជធានីភ្នំពេញ មានឆន្ទៈដោះស្រាយ តែគ្មានបានការអីទេ។ ដដែលជាដដែល។ លើកទី១ថា ឲ្យខ្ញុំ១ប្លង់។ លើកទី២ថា ឲ្យខ្ញុំជិត៣ប្លង់ និងលុយមួយចំនួន។ លើកទី៣ថា ឲ្យ១ប្លង់​ដដែល។ ដល់លើកទី៤ ចៅហ្វាយក្រុងភ្នំពេញថា ប្រញាប់ណាស់ ឲ្យខ្ញុំមួយប្លង់ដដែល។ និយាយបាតដៃខ្នងដៃបែប​នេះ ប្រជាជន​ណា​ទទួល​យក​បាន។»។

រីឯអ្នកស្រី ងួន វណ្ណា ដែលជាភរិយា បានរៀបរាប់ថា អ្នកស្រីនឹងស្វាមី មិនអាចចាកចេញ ពីទីនេះបានទេ ព្រោះ​មិន​ទាន់​មាន​សំណងសមរម្យ ទោះបីជាសព្វថ្ងៃ គេបានផ្តាច់ទឹកភ្លើង ពីគ្រួសារគាត់ក៏ដោយ ក៏អ្នកស្រីអាចទ្រាំរស់នៅទាំងវេទនា ទាំងគ្មានរបស់របរប្រើប្រាស់ ស្ទើគ្មានអាហារហូបប្រចាំថ្ងៃ ព្រោះតែចង់បានសំណងដីមកវិញ។ ពលរដ្ឋរូបនេះ បាន​បន្ថែម​ទៀតថា ពួកគាត់ គ្មានរបរអ្វីសំរាប់ចិញ្ចឹមគ្រួសារទេ ក្រៅពីលក់អេតចាយបន្តិចបន្តួច ដើម្បីបានប្រាក់ មកទិញ​អាហារ​ហូប​ចុក​ប្រចាំថ្ងៃ។ លោកបានថ្លែងថា៖ «ខ្ញុំរាល់ថ្ងៃ ធ្លាក់ដុនដាបខ្លាំងណាស់ នៅរើសអេតចាយកំប៉ិកកំប៉ុក ដើម្បីចិញ្ចឹមកូន»។

មិនអាចទាក់ទង មន្ត្រីអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ដើម្បីបកស្រាយ នៅលើបញ្ហានេះ បាន​ភ្លាមៗ​ទេ៕