«អាជ្ញាធរនៅទល់ដែន មិនបានឃុបឃិតលក់សំបុត្រ ក្នុងតម្លៃថ្លៃ ដូចពលរដ្ឋមួយចំនួនបាននិយាយនោះទេ» នេះ ជា​ការ​លើកឡើង របសលោក ហាំ វណ្ណៈ មេបញ្ជាការវរៈសេនាតូច នគរបាល ប្រចាំនៅប៉ោយប៉ែត ដែលមានព្រំប្រទល់ នៅ​ជាប់​នឹងវត្ត«គោកស្បែក» ក្នុងប្រទេសថៃ កាលពីថ្ងៃទី២០ ខែមេសា ឆ្នាំ២០១៥។ លោកបានថ្លែងឡើងថា នៅរៀងរាល់ឆ្នាំ ពិត​ជា​មានការលក់សំបុត្រមែន តែដោយឡែក នៅក្នុងឆ្នាំ២០១៥នេះ មិនមានទៀតទេ ព្រោះមានបទបញ្ជា ពីចៅហ្វាយ​ខេត្ត​បន្ទាយមានជ័យ បានអនុញ្ញាតឲ្យទៅលេង នៅវត្តក្នុងទឹកដីថៃ ដោយមិនឲ្យសមត្ថកិច្ចខ្មែរលក់សំបុត្រ ដោយគ្រាន់​តែ​មាន​សិទ្ធ មើលការខុសត្រូវ ពីសន្តិសុខ សុវត្តិភាព នៅទីនោះប៉ុណ្ណោះ។

ការថ្លែងរបស់លោក ហាំ វណ្ណៈ បានធ្វើឡើង បន្ទាប់ពីមានពលរដ្ឋជាច្រើននាក់ បានសម្ដែងការរអ៊ូរទាំ ថាដើម្បីចូល​ទៅ​លេង​បុណ្យចូលឆ្នាំថ្មី នៅក្នុងវត្ត«គោកស្បែក» ដែលជាវត្តថៃ នៅក្បែរព្រំដែននោះ ពលរដ្ឋត្រូវបង់ប្រាក់ ឲ្យសមត្ថកិច្ចខ្មែរ នូវតម្លៃមួយថ្លៃហួសហេតុុ។ អ្នកដែលចូលរួម ក្នុងពីធីបុណ្យចូលឆ្នាំម្នាក់ លោក ពែក ចាន់រ៉ា រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ បានឲ្យដឹងថា សមត្ថកិច្ចខ្មែរ បានសរសេរផ្លាក ជាអក្សរខ្មែរ យក​ថ្លៃ ក្នុងម្នាក់៥០បាត សម្រាប់មនុស្សធំ និងសម្រាប់កូនក្មេង ២០បាត។ ពលរដ្ឋរូបនេះ បានឲ្យដឹងថា តម្លៃនេះ មាន​កម្រិត​ថ្លៃខ្លាំង បើធៀបទៅនឹងរាល់ឆ្នាំ ដែលលោកធ្លាប់ទៅលេង។

លោក ពែក ចាន់រ៉ា បានពន្យល់ទៀតថា បើមនុស្សម្នាក់ ដែលបានចូលទៅលេងវត្តខាងលើ ហើយចេញមកយកបងប្អួន នៅខាងក្រៅ ពេលចូលទៅវិញ ត្រូវគេយកលុយថ្លៃសំបុត្រសារជាថ្មី។ លោកបញ្ជាក់ថា មានមនុស្សច្រើនណាស់ ដែល​បានទៅលេងនៅទីនោះ ហើយក៏មានមនុស្សច្រើនដែរ ដែលមិនបានទៅ ព្រោះគ្មានថវិកាគ្រប់គ្រាន់ បង់ថ្លៃសំបុត្រ។

តែសម្រាប់ លោក លោកមេបញ្ជាការ ហាំ វណ្ណៈ វិញ បានបញ្ជាក់ថា ចំពោះផ្លាក ដែលដាក់យកប្រាក់លក់សំបុត្រក្នុងម្នាក់ ៥០បាត សម្រាប់មនុស្សធំ និងម្នាក់២០បាត សម្រាប់ក្មេងនោះគឺ ជារបស់សមត្ថកិច្ចថៃ គ្មានពាក់ព័ន្ធ ជាមួយ​សមត្ថកិច្ច​នគរបាល​ខ្មែរទេ។ រីឯមូលហេតុ ដែលនាំឲ្យមានតម្លៃ ថ្លៃជាងឆ្នាំមុនៗនោះ ត្រូវបានលោកអះអាងទៀតថា ដោយសារ​តែ​ឆ្នាំ​នេះ មានការប្រគុំតន្ត្រី ដែលជួលពីស្រុកខ្មែរថ្លៃ មិនដូចរាល់ឆ្នាំ មានតែតន្រ្តីនៅថៃប៉ុណ្ណោះ។ លោកបានបញ្ជាក់ថា មន្ត្រី​នគរបាល បានធ្វើការសហការ ដើម្បីសុវត្តិភាពអ្នកចូលរួម និងដើម្បីអបអរបុណ្យចូលឆ្នាំ ប្រពៃណីខ្មែរ តែមិនមានអ្វី ដូច​ដែល​ពលរដ្ឋ បាននិយាយនោះទេ៕