ស្របពេលដែលគណបក្សនយោបាយ បន្តជំនួបកំពូល ដោះស្រាយភាពជាប់គាំង នយោបាយនៅកម្ពុជា ក្រុម​សហព័ន្ធ​និស្សិតបញ្ញវន្តកម្ពុជា ព្រះសង្ឃខ្មែរកម្ពុជាក្រោម និងប្រជាពលរដ្ឋមួយចំនួនធំ នៅតែបន្តជំហររបស់ខ្លួន ក្នុង​ការទាមទារឲ្យអ្នកនាំពាក្យ ប្រចាំស្ថានទូតវៀតណាម កែតម្រូវខ្លឹមសារសំដីរបស់ខ្លួន។

ក្រុមមេដឹកនាំការតវ៉ា នៅមុខស្ថានទូតវៀតណាម ថ្ងៃទី២១ ខែកក្កដា ឆ្នាំ២០១៤។ (រូបថត ហ្វេសប៊ុក)

ទឹកដី - នាព្រឹកថ្ងៃទី២២ ខែកក្កដានេះ ប្រជាពលរដ្ឋ ព្រះសង្ឃខ្មែរកម្ពុជាក្រោម ក្រុមសហព័ន្ធនិស្សិតបញ្ញវន្តកម្ពុជា បានមកជួបជុំគ្នានៅមុខស្ថានទូតវៀតណាមជាថ្មី ក្រោយពេល«បរាជ័យ»ក្នុងការដាក់ញត្តិជាលើកទីពីរ កាលពី​ថ្ងៃ​ទី២១ ខែកក្កដា ម្សិលម៉ិញនេះ។ និងក្រោយពីបដិសេធ មិនទទួលញ្ញាតិលើកទី«ទីមួយ» កាលពីថ្ងៃទី៨ ខែកក្កដា ឆ្នាំ​២០១៤កន្លងមក។

នេះជាលើក«ទីបី»ហើយ ដែលសហព័ន្ធនិស្សិត បញ្ញវន្តកម្ពុជា រួមជាមួយក្រុមយុវជន និស្សិត ប្រជាពលរដ្ឋ និង​ព្រះសង្ឃខ្មែរក្រោមមួយចំនួន បានមកជួបជុំគ្នានៅមុខស្ថានទូតវៀតណាម។ ប៉ុន្តែការព្យាយាម និងបន្តដាក់ញត្តិនេះ នៅតែត្រូវបរាជ័យដដែល ដោយមិនមានការចេញមកទទួលយកញត្តិ ពីខាងស្ថានទូតវៀតណាម។

ប្រធានសហព័ន្ធនិស្សិតបញ្ញវន្តកម្ពុជា លោក ម៉ៅ ពិសេស កាលពីថ្ងៃទី២១ ខែកក្កដាម្សិលម៉ិញនេះ​បានលើកឡើង​ថា៖ «យើងទាមទារឲ្យមន្រ្តីស្ថានទូតរូបនេះ ទទួលស្គាល់ការពិត។ (...) និងធ្វើការសុំទោសជាសាធារណៈ។ (...) យើង​រួមគ្នា យុវជនយើងមិនមែនតូច ដូចលោក ទ្រឹង វ៉ាន់ថុង និយាយនោះទេ។ បើលោក ទ្រឹង វ៉ាន់ថុង មិននិយាយសុំ​ទោស​ទេ យើងនឹងនៅតវ៉ាបន្តទៀត។»

ហេតុការណ៍ដែលនាំឲ្យមានការជួបជុំ ការតវ៉ា នៅមុខស្ថានទូតវៀតណាមនេះ ក៏ព្រោះតែប្រជាពលរដ្ឋខ្មែរ​មួយ​ចំនួនធំ ពិសេសខ្មែរកម្ពុជាក្រោម មិនអាចទទួលយកបាន នូវការលើកឡើងរបស់អ្នកនាំ​ពាក្យស្ថានទូត​វៀតណាម​លោក ត្រឹង វ៉ាន់ថុង កាលពីថ្ងៃទី៦ ខែកក្កដា ឆ្នាំ២០១៤។ កាលនោះ អ្នកនាំពាក្យស្ថានទូតមួយនេះ បានលើកឡើង​ថា៖ «ទឹកដីខ្មែរកម្ពុជាក្រោម ជាទឹកដីរបស់វៀតណាមតាំងពីដូនតា។ បារាំងមិនបានកាត់ទឹកដី ខ្មែរកម្ពុជាក្រោម ឲ្យ​វៀតណាមនោះឡើយ»។

មកទល់នឹងពេលនេះ ស្ថានទូតវៀតណាម ឬអ្នកនាំពាក្យរូបនោះ នៅមិនទាន់មានការបកស្រាយ ឬកែតម្រូវជា​សាធារណៈ ឲ្យបានច្បាស់លាស់នៅឡើយ។ ហើយការដាក់ញត្តិរបស់ក្រុមអ្នកតវ៉ាកម្ពុជានោះ ក៏មិនត្រូវបានទទួល​ដោយស្ថានទូតវៀយណាមនោះដែរ។ មន្រ្តីម្នាក់នៃស្ថានទូតនេះបានរុញ ឲ្យក្រុមអ្នកតវ៉ាយកញត្តិ ទៅដាក់នៅសាលា​រាជធានីភ្នំពេញវិញ។

អ្នកនាំពាក្យស្ថានទូតវៀតណាម បានបោះពាក្យជាថ្មីមកថា លោកមិនចាប់អារម្មណ៍ ចំពោះសកម្មភាពតវ៉ារបស់​សហព័ន្ធនិស្សិតបញ្ញវ័ន្តកម្ពុជានោះទេ ព្រោះ«គ្មានប្រយោជន៍»។ អ្នកនាំពាក្យរូបនេះ ក៏បានបង្គាប់ទៅរដ្ឋភិបាល​កម្ពុជា ដោយហាមឃាត់ជាដាច់ខាកមិនឲ្យមានការជួបជុំ ឬតវ៉ាអ្វីទាំងអស់ នៅមុខស្ថានទូតវៀតណាមឡើយ។

អ្នកតាមដានស្ថានការសង្គម បានសង្កេតឃើញថា បើទោះជាមានការកំហែងចាប់ក្រុមអ្នតវ៉ា ដោយប្រព័ន្ធ​តុលាការ​កម្ពុជាក៏ដោយ តែវត្តមាននៃអ្នកចូលរួមក្នុងការតវ៉ានេះ កានតែមានចំនួនកើនឡើង ជាមួយនិងការស្រែកតវ៉ា​គ្មាន​ខ្លាច​រអាឡើយ។ ឯក្រុមសមត្ថកិច្ច ក៏បានបន្ថែមកម្លាំងរបស់ខ្លួនកាន់តែច្រើន ជាមួយនិងរនាំងដែក កាំភ្លើង ដំបង និងខែល​រាប់រយនាក់បានដាក់ពង្រាយ ស្ទើរជុំជិតស្ថានទូតវៀតណាមទាំងមូល ដើម្បីការពារសុវត្ថិភាពស្ថានទូត។

សម្រាប់លោក កែម ឡី អ្នកវិភាគឯករាជ្យ កាលពីថ្ងៃទី២១ ខែកក្កដា ម្សិលម៉ិញនេះដែរ លោកបានបញ្ជាក់ថា ការ​លើកឡើងរបស់អ្នកនាំពាក្យនៃស្ថានទូតវៀយណាមរឿងទឹកដីខ្មែរកម្ពុជាក្រោមនោះ មិនមែនជាការ​«ចៃដន្យ»​ឡើយ។ លោកចាត់ទុកថានេះជារឿងនយោបាយ ក្នុងការល្បង និងការស្ទៀបស្ទង់កម្លាំងប្រតិកម្ម​របស់ប្រជាពលរដ្ឋ​កម្ពុជាចំពោះរឿងនេះ៕