លោក អេង ឆៃអ៊ាង មន្ត្រីជាន់ខ្ពស់របស់គណបក្សសង្រោះជាតិ បានអះអាងថា លោក កឹម សុខា អនុប្រធាន​គណបក្ស​សង្គ្រោះ​ជាតិ និងជា​បេក្ខភាព​ប្រធានរដ្ឋសភា ក្នុងពេល​ឃោសនា​បោះឆ្នោត​កន្លងមក ​នឹង​ត្រូវ​ចូលកាន់​តំណែង​ជា​អនុប្រធាន​ទី​១ រដ្ឋសភា​ ក្នុងពេលខាងមុខ។

លោក កឹម សុខា (ខាងឆ្វេង) ចាប់ដៃលោក ហ៊ុន សែន បន្ទាប់ពីជំនួបកំពូលថ្ងៃទី២២ ខែកក្កដា ឆ្នាំ២០១៤។ (រូបថត MONOROOM.info/ U. Bory)

នយោបាយ - មន្ត្រីជាន់ខ្ពស់​គណបក្ស​សង្គ្រោះ​ជាតិ លោក អេង​ ឆៃអ៊ាង បានថ្លែងនៅបន្ទាប់ពីជំនួបកំពូល ថ្ងៃទី២២ ខែកក្កដា ឆ្នាំ២០១៤នេះថា  នេះថា បេក្ខជន​ជាប់ឆ្នោត​តំណាងរាស្ត្រ ទាំង ៥៥ រូប របស់​គណបក្ស​សង្គ្រោះ​ជាតិ ​នឹង​ចូល​ក្នុង​ព្រះបរមរាជវាំង នៅព្រឹក​ថ្ងៃ​ព្រហស្បតិ៍ ទី​២៤ ខែកក្កដា ឆ្នាំ​២០១៤ ដើម្បី​ចូល​ក្រាប​បង្គំ​គាល់​ព្រះមហាក្សត្រ សម្តេចព្រះ​បរមនាថ នរោត្តម សីហ​មុនី​។

ការ​កំណត់​ថ្ងៃ​ចូលស្បថនេះ ត្រូវបាន​លើក​ឡើង​ មុន​ពេល​បញ្ចប់​កិច្ចប្រជុំ​ ចរចា​ថ្នាក់​កំពូល នៅ​រសៀល​ថ្ងៃ​នេះ​ ហើយ​លោក អេង ឆៃអ៊ាង បានបញ្ជាក់ទៀថា ពេលវេលានេះត្រូវអាស្រ័យ​លើ​ព្រះករុណា ព្រះ​រាជានុញ្ញាត​ជាមុនសិន។​

លោក កឹម សុខា អនុប្រធាន​គណបក្ស​សង្គ្រោះ​ជាតិ នឹង​ត្រូវ​ចូលកាន់​តំណែង​ជា​អនុប្រធាន​ទី​១ រដ្ឋសភា​។ ការចូល​ទៅកាន់តំណែងនេះ ជា​សេចក្តីសម្រេច​របស់​គណ​បក្ស​សង្គ្រោះ​ជាតិ ដោយហេតុថា ​លោក​កឹម​សុខា គឺ​ជា​បេក្ខភាព​ប្រធានរដ្ឋសភា ក្នុងពេល​ឃោសនា​បោះឆ្នោត​កន្លងមក ។

​តែផ្ទុយទៅវិញ សម្រាប់ថ្ងៃ​ចូល​ប្រជុំ​រដ្ឋសភា​ មន្ត្រីគណបក្សប្រឆាំងរូបនេះ មិនទាន់បានបញ្ជាក់ ថានៅថ្ងៃណានោះ​នៅ​ឡើយ​។ រីឯបេក្ខភាពរបស់លោក សម រង្ស៊ី ដើម្បីក្លាយជាតំណាងរាស្ត្រនោះ មិនត្រូវបានលោក អេង ឆៃអ៊ាង និយាយ​បែបណានោះនៅឡើយ ដោយគ្រាន់តែបញ្ជាក់ថា «រឿង​នេះមិន​សំខាន់​ទេ» សម្រាប់​លោក​ សម ​រង្ស៊ី។​

ការថ្លែងអះអាងរបស់មន្ត្រីគណបក្សសង្គ្រោះជាតិ បានធ្វើឡើងបន្ទាប់ពីជំនួបកំពូល នៅថ្ងៃទី២២ ខែកក្កដា នេះ ដើម្បី​ជម្រះវិបត្តិនយោបាយ ដែលបានជាប់គាំងអស់រយៈពេលជិត១ ឆ្នាំមកហើយ រវាងថ្នាក់ដឹកនាំកំពូល មកពីគណបក្ស​ជាប់ឆ្នោតទាំងពីរ នៅវិមានព្រឹទ្ធសភា៕