ទីបំផុតទៅគណបក្សសង្រ្គោះជាតិ បានសម្រេចជាផ្លូវការហើយ ថានឹងចូលប្រជុំសភានីតិកាលទី៥នេះ។ ការសម្រេច​ចូលប្រជុំសភា​ បានធ្វើឡើង ក្រោយពីការចរចា ជាមួយគណបក្សប្រជាជនកម្ពុជា នៅព្រឹកថ្ងៃទី២២ ខែកក្កដានេះ។ តែ​យ៉ាងណាក៏ដោយ ក៏គណបក្សសង្រ្គោះជាតិ នៅមិនទាន់កំណត់ពេលវេលា ចូលប្រជុំនេះឲ្យបានច្បាស់នៅ​ឡើយ។

លោក សម រង្ស៊ី និងលោក ហ៊ុន សែន បន្ទាប់ពីជំនួបកំពូល ថ្ងៃទី២២ ខែកក្កដា ឆ្នាំ២០១៤។ (រូបថត MONOROOM.info/ U. Bory)

នយោបាយ - ការព្រមព្រៀង៧ប្រការ ត្រូវឯកភាពគ្នា ហើយត្រូវចុះហត្ថលេខាទទួលស្គាល់ ដោយថ្នាក់ដឹកនាំកំពូល របស់គណបក្សសង្រ្គោះជាតិ និងគណបក្សប្រជាជនកម្ពុជា បន្ទាប់ពីកិច្ចចរចានយោបាយ ត្រូវបានបញ្ចប់​នៅម៉ោង​៣រសៀល ថ្ងៃទី២២ ខែកក្កដា ឆ្នាំ២០១៤នេះ។

ក្នុងនោះ រួមមានជាអាទិ៍ ការបែងចែកអំណាចនៅក្នុងរដ្ឋសភា - ការកែទម្រង់គណៈកម្មាធិការជាតិ រៀបចំការ​បោះ​ឆ្នោត - បន្តការចរចាកំណត់​ពេលបោះឆ្នោតឡើងវិញ - ពិនិត្យឡើងវិញលើការកំណែទម្រង់ព្រឹទ្ធសភា បែងចែង​អំណាច​សភា និងរដ្ឋាភិបាលឲ្យដាច់ពីគ្នាបានច្បាស់ ត្រួតពិត្យឡើងវិញ នូវក្បាលម៉ាស៊ីនព្រឹទ្ធសភា - គណបក្ស​ទាំងពីរ​ឯកភាពត្រួតពិនិត្យឡើងវិញ និងពង្រឹងស្ថាប័នឯករាជ្យសំខាន់ៗ និងប្រការចុងក្រោយ បក្សទាំងពីរធានា​ឲ្យ​បាន នូវយន្តការអនុវត្ត កិច្ចព្រមព្រៀងខាងលើនេះ។

តែចំណុចស្នូលក្នុងកិច្ចព្រមព្រៀង ឬជាចំណុចដែលធ្វើឲ្យបញ្ចប់ ការជាប់គាំងនយោបាយ គឺកំណត់ក្នុងប្រការទី១ ដោយចែងថា៖ «គណបក្សទាំងពីរបានឯកភាពគ្នា លើដំណោះស្រាយនយោបាយ ដោយចូលរួមធ្វើការជាមួយគ្នា នៅក្នុងស្ថាប័នរដ្ឋសភា ដើម្បីឈានទៅដោះស្រាយបញ្ហានានា របស់ប្រទេសជាតិ ស្របតាមគោលការណ៍លិទ្ធិ​ប្រជាធិបតេយ្យ និងនីតិរដ្ឋ»។

តែលោក សម រង្ស៊ី ប្រធានគណបក្សសង្រ្គោះជាតិ បានថ្លែងខ្លីដល់អ្នកសារព័ត៌មាន នៅក្រោយការចរចាកំពូល​ព្រឹក​ម៉ិញ​នេះថា គណបក្សសង្រ្គោះជាតិ នៅមិនទាន់កំណត់ពេលវេលាចូលប្រជុំសភា ឲ្យបានច្បាស់លាស់នៅឡើយទេ។

លោកព្រំ សុខា មន្រ្តីជាន់ខ្ពស់របស់គណបក្សប្រជាជនកម្ពុជា បានហៅការចរចាកំពូល រវាងគណបក្សប្រជាជន​កម្ពុជា និងគណបក្សសង្រ្គោះជាតិ នៅថ្ងៃនេះថា ជាដំណឹងល្អសម្រាប់ពលរដ្ឋកម្ពុជា។ បើតាមមន្ត្រីជាន់ខ្ពស់​របស់​គណបក្សប្រជាជនកម្ពុជារូបនេះ បានអះអាងនៅក្រោយការចរចានេះថា បេក្ខជនជាប់ឆ្នោតរបស់គណបក្ស​សង្រ្គោះ​ជាតិ នឹងស្បថចូលកាន់មុខតំណែងនៅរដ្ឋសភា ក្នុងពេលដ៏ឆាប់៕