ក្រោយពីការចរចានៅព្រឹកនេះរវាង ថ្នាក់ដឹកនាំកំពូល នៃគណបក្សជាប់ឆ្នោតទាំងពីរទទួលបានជោគជ័យ តំណាង​រាស្រ្ត​ទាំង៧ និងយុវជនម្នាក់ទៀតដែលបានចាប់ខ្លួន ក្រោយព្រឹត្តិការណ៍ថ្ងៃទី១៥ កក្តដា នឹងត្រូវបានដោះលែង​ឱ្យ​មាន​សេរីភាព បណ្តោះអាសន្នវិញដែរក្នុងថ្ងៃនេះ។

នាង កឹម មនោរវិទ្យា (ខាងឆ្វេង) ដែលជាកូនស្រីលោក កឹម សុខា កំពុងឈរចាំ នៅមុខពន្ធនាគារព្រៃសរ។ (រូបថត ហ្វេសប៊ុក)

ប្រព័ន្ធយុត្តិធម៌ - តាមរយៈបណ្តាញសង្គមហ្វេសប៊ុក របស់លោក យឹម សុវណ្ណ តំណាងរាស្រ្ត និងជាមន្ត្រីជាន់ខ្ពស់​មកពី​គណបក្ស​សង្រ្គោះជាតិ បានឱ្យដឹងថា បេក្ខជនតំណាងរាស្រ្តរបស់គណបក្សសង្រ្គោះជាតិ ទាំង៧រូប រួមទាំង​យុវជន​មួយទៀត នឹងត្រូវដោះលែងក្នុងសៀលនេះនាពេលបន្តិចទៀត។

ដំណឹងនៃការដោះលែង ជនជាប់ឃុំទាំង៨នាក់ បានកើតឡើងភ្លាមៗ ក្នុងខណៈពេលដែលថ្នាក់ដឹកនាំកំពូលៗ​នៃ​គណបក្ស​ប្រជាជនកម្ពុជា និងគណបក្សសង្គ្រោះជាតិ កំពុងចរចាគ្នានៅវិមានព្រឹទ្ធសភានាព្រឹកនេះ បានឯកភាព​លើ​ដំណោះ​ស្រាយនយោបាយ ដែលបានជាប់គាំងអស់រយៈពេលជិតមួយឆ្នាំមកហើយ។

រីឯនៅ ពន្ធនាគារព្រៃសឯណោះវិញ បើតាមសេចក្តីរាយការណ៍បានឱ្យដឹងថា ប្រជាពលរដ្ឋប្រមាណជាង៤រយនាក់ កំពុងឈរនៅខាងមុខពន្ធនាគារព្រៃសរ ដើម្បីរងចាំបំពាក់កម្រងផ្កាកុលាបព័ណ៌ស ជូនបេក្ខជនជាប់ឆ្នោត​ជាតំណាង​រាស្ត្រ​ទាំង៧នាក់ និងយុវជនម្នាក់ទៀត ក្រោយការដោះលែងចេញពីពន្ធនាគារ។

សូមបញ្ជាក់ថា តំណាងរាស្ត្រទាំង៧នាក់ និងយុវជន បានចាប់ខ្លួនកាលពីថ្ងៃទី១៥ ខែកក្កដា រួមមាន លោកស្រី មូរ សុខហួរ លោក ហូរ វ៉ាន់ លោករៀល ខេមរិន្ទ្រ លោកមែន សុថារិន្ទ លោក ឡុង រី លោក នុត រំដួល លោកកែវ ភារម្យ និងយុវជនលោក អឿ ណារិត។ អ្នកទាំង៨នាក់នោះ ត្រូវបានចោទពីបទ ញុះញង់ឱ្យមានបទឧក្រិដ្ឋ និងបង្កកុបកម្ម​(ឬបំបះបំបោរ) ប្រឆាំង​មន្ត្រីរាជការសាធារណៈ៕