បន្ទាប់ពីលទ្ធផលនៃជំនួបកំពូល ទាំង៧ចំនុចបានធ្លាក់ចុះមកនោះ ភ្លាមៗបន្តិចមក ប្រតិកម្មរបស់ក្រុមអ្នកគាំទ្រ ក៏​បានធ្លាក់ចុះមក​ព្រោងព្រាត តាមក្រោយជាបន្តបន្តាប់ដែរ។ នៅលើបណ្ដាញសង្គមហ្វេសប៊ុក ទីកន្លែងដែល​ព័ត៌មាន​នៃលទ្ធផលពីជំនួបកំពូលចេញផ្សាយលឿនបំផុតនោះ ក្រុមអ្នក​គាំទ្រទាំងសងខាង របស់គណបក្សទាំងពីរ បាន​សម្ដែង​ប្រតិកម្ម​ចុះ​មក​ខុសៗគ្នា។ តែក្នុងចំណោមនោះ មានមួយភាគធំ បាននាំមកជាមួយ នូវការ«ខកចិត្ត»។

ពីឆ្វេងមកស្ដាំខាងមុខគេ៖ លោក កឹម សុខា លោក សម រង្ស៊ី លោក ហ៊ុន សែន និងលោក គួយ ប៊ុនរឿន។ (រូបថត MONOROOM.info/ U. Bory)

នយោបាយ - សម្រាប់អ្នកគាំទ្រគណបក្សប្រជាជនកម្ពុជា របស់លោកនាយករដ្ឋមន្ត្រី ហ៊ុន សែន ពួកគេមិនដែល​គិត​ម្ដងណាឡើយ ថាគណបក្សកាន់អំណាចសព្វថ្ងៃនឹងចាញ់ប្រៀប ស្ថិតនៅក្រោមគណបក្សសង្គ្រោះជាតិនោះ។ នៅ​ក្នុង​គណនី​មួយហៅខ្លួនឯងថា «អង្គភាប្រតិកម្មរហ័ស» ដែលគេស្គាល់ថាជារបស់លោក ផៃ ស៊ីផាន មន្ត្រីទីស្ដីការ​គណរដ្ឋ​មន្ត្រី បានចាត់ទុកលទ្ធផល ដែលចេញពីការប្រជុំនេះ ថា៖ ជា«ការសម្រេចចិត្តដ៏ត្រឹមត្រូវនេះ គឺជាការ​បង្ហាញ​ឲ្យ​ឃើញ នូវការគិតគូរដ៏ខ្ពង់ខ្ពស់ ដល់ផលប្រយោជន៍ជាតិ»។ គណនីនេះបានសរសេរទៀតថា៖ «មានតែសម្តេចតេជោ ហ៊ុន សែន ទេ ដែលជាវិរៈបុរសនៃកម្ពុជា»។

ប៉ុន្តែការលើកឡើងរបស់លោក ផៃ ស៊ីផាន បានបង្កឲ្យមានប្រតិកម្មយ៉ាងច្រើនលើសលប់ ពីសំណាក់ក្រុម​អ្នកមិន​ចូលចិត្តលោក ផៃ ស៊ីផាន និងអ្នកគាំទ្រ​គណបក្សសង្គ្រោះជាតិ។ ម្ចាស់គណនីមួយឈ្មោះ Kopiko FC បាន​សរសរ​វាយបក​ថា៖ «វិរៈបុរសគេធ្វើពី ០ ទៅ ១០០ មិនមែនធ្វើពី ៩៣ នៅសល់ ៦៨ នោះទេ»។

ទាំងនេះ ជាអ្វីដែលបានកើតឡើង បន្ទាប់ពីលទ្ធផលចេញពីកិច្ចប្រជុំចរចា រវាងមេដឹកនាំកំពូល របស់លោក ហ៊ុន សែន នាយករដ្ឋមន្ត្រីកម្ពុជា និងលោក សម រង្ស៊ី ប្រធានគណបក្សសង្គ្រោះជាតិ កាលពីព្រឹកថ្ងៃទី២២ ខែកក្កដា ឆ្នាំ​២០១៤។ លទ្ធផលគួរឲ្យកត់សម្គាល់នោះ មានក្រុមតំណាងរាស្ត្រជាប់ឆ្នោត នៃគណបក្ស​សង្គ្រោះជាតិ​ នឹងយល់​ព្រម​ចូល​ប្រជុំ​ក្នុងរដ្ឋសភា រីឯគណៈកម្មាធិការជាតិ រៀបចំការបោះឆ្នោត នឹងត្រូវមានសមាសភាគ៩រូប៖ ៤រូប​មកពី គណបក្ស​ប្រជាជន​កម្ពុជា ដែលដឹកនាំរាជរដ្ឋាភិបាល ៤រូប​មកពី គណបក្សសង្គ្រោះជាតិ និង១រូបទៀតមាន ដោយ​មាន​ការ​យល់​ព្រម​ពីគណបក្ស ដែលមានអាសនៈ ក្នុងសភា។

តែប្រតិកម្ម និងពាក្យពេជ្រខកចិត្ត របស់ក្រុមអ្នកគាំទ្រគណបក្សសង្គ្រោះជាតិ បានកំពុងពន្លិចទំព័របច្ចុប្បន្នភាព នៃ​បណ្ដាញសង្គមហ្វេសប៊ុកដ៏ពេញនិយម។ យុវជន ស្និតនឹងគណបក្សសង្គ្រោះជាតិ ជាច្រើន បានផ្សាយនៅលើជញ្ជាំង​ហ្វេសប៊ុក របស់ពួកគេ សម្ដែងការមិនគាំទ្រលើការចរចា ដែលមានលក្ខណៈជាចំណាប់ខ្មាំងនយោបាយ ដូចព្រឹក​ម៉ិញ។

លោក ប៉ា សុខខឿន អ្នកគាំទ្រគណបក្សប្រឆាំងមិនចេះរីងស្ងួត បានលើកឡើង នៅលើគណនី«ខ្មែរ សុវណ្ណភូមិ»​របស់​លោក  ប្រកាសជំហរមិនគាំទ្រលទ្ធផល នៃការចរចាខាងលើថា គណបក្សសង្រ្គោះជាតិ បានបោះបង់ចោល ការទាម​ទារពីមុន រួមមានការរាប់សន្លឹកឆ្នោតឡើងវិញ និងការបោះឆ្នោតឡើងវិញឆាប់ៗ។ «ខ្មែរ សុវណ្ណភូមិ» បាន​សរសេរ​ទៀតថា កំណែទម្រង់ដែលបានធ្វើទៅលើ ស្ថាប័ន គ.ជ.ប នៅតែដដែល ដោយ «សមាសភាពថ្នាក់ដឹកនាំ នៅតែជា​កូតារបស់បក្ស»។

សម្រាប់ លោក ប៉ា សុខខឿន លោកបានហៅការចរចាព្រឹកម៉ិញនេះ ថាជាការចរចាបែបឆោតល្ងង់ ដោយយកការ​ដោះលែង​មនុស្ស​ទាំង៨នាក់ ជាថ្នូរនឹងការចរចារកដំណោះស្រាយ ផ្នែកនយោបាយ។ ហើយការធ្វើបែបនេះ ជា​នយោបាយ​​ស្រោច​ស្រង់ ឲ្យគណបក្សប្រជាជនកម្ពុជារឹងមាំឡើងវិញ ដូចឆ្នាំ១៩៩៣ ដូច្នេះដែរ។

ចំណែកយុវជន កែវ សាម៉ាឌី វិញ ដែលធ្លាប់ចេញមុខ ក្នុងយុទ្ធនាការឃោសនាបោះឆ្នោត ឲ្យគណបក្សសង្គ្រោះជាតិ បានថ្លែងការពារឧត្ដមគតិផ្ទាល់ខ្លួនថា លោកមិនមែនគាំទ្រគណបក្សសង្គ្រោះជាតិ ដោយផ្កាប់មុខនោះទេ ប៉ុន្តែ​គឺដើម្បី​ការផ្លាស់ប្ដូរតែប៉ុណ្ណោះ។ យុវជនរូបនេះ បានបញ្ជាក់ជំហររបស់ក្រុមខ្លួនបន្តទៀតថា៖ «នៅតែមានជំហរ ប្រឆាំង​សង្គម​ពុករលួយមួយនេះ ពួកខ្ញុំមិនមែនអ្នកនយោបាយ ឬបានចំណេញ ពីនយោបាយនោះទេ»។

រីឯយុវតីម្នាក់ទៀត ឈ្មោះ ភូ ទីតា បានចុះផ្សាយនៅលើគណនីរបស់ខ្លួន នូវកំណាព្យមួយបទ ដូចខាងក្រោម៖