ពលរដ្ឋឃុំជីខក្រោមរងទឹកភ្នែកជាថ្មី ក្រោយចាញ់ក្តីក្រុមហ៊ុនហេងហ៊ុយ
- ដោយ: ប្រាថ្នា ដោយ ប្រាថ្នា ([email protected] ) - ភ្នំពេញ ថ្ងៃទី៣០ វិច្ឆិកា ២០១៤
- កែប្រែចុងក្រោយ: December 02, 2014
- ប្រធានបទ: វិបត្តិដីធ្លី
- អត្ថបទ: មានបញ្ហា?
- មតិ-យោបល់
-
សម្លេងខ្សឹបខ្សួលអួលដើមក បានបន្លឺឡើងចេញពីប្រជាពលរដ្ឋ រស់នៅភូមិព្រែកជីក ឃុំជីខក្រោម សារជាថ្មី បន្ទាប់ពីតុលាការកំពូល ក្នុងរាជធានីភ្នំពេញនៅថ្ងៃទី២៧ ខែវិចិ្ឆកា កន្លងមកនេះ បានសម្រេចសេចក្តីឱ្យលោក ឈឹម ផាន់ ដែលមានដីទំហំជាង៧ហិចតា និងអ្នកស្រី ឈុន រីម មានដីជាង២ហិចតា ឱ្យចាញ់ក្តីលោក ហេង ហ៊ុយ ជាប្រធានក្រុមហ៊ុន ហេងហ៊ុយ។
តុលាការកំពូលបានចាត់ទុក ការចោទប្រកាន់លើប្រជាពលរដ្ឋទាំងពីរខាងលើ តាមបណ្តឹងរបស់លោក ហេង ហ៊ុយ ថាបានទៅរស់នៅលើដីសម្បទាន ដែលរដ្ឋាភិបាលបានធ្វើសម្បទាន ឱ្យទៅក្រុមហ៊ុន ហេង ហ៊ុយ នៅភូមិបឹងឈូក ឃុំជីខលើ។ នេះតាមការបញ្ជាក់របស់អ្នកស្រី កើត ពៅ តំណាងពលរដ្ឋនៅភូមិព្រែកជីក ឃុំជីខក្រោម។
តំណាងពលរដ្ឋរូបនេះ បន្ថែមថា៖ «តុលាការកាត់ហើយ កាត់ឱ្យចាញ់លោក ហេង ហ៊ុយ ថាអត់មានភូមិព្រែកជីក ជាប់ផ្លូវជាតិលេខ៤៨ទេ។ គាត់ចោទថា លោក ឈឹម ផាន់ និងអ្នកស្រី ឈឹម រីម ហ្នឹងរស់នៅលើភូមិឈូក ឃុំជីខលើ ប៉ុន្តែពួកបងមានលិខិតបញ្ជាក់ដូចជា អាត្រានុកូលដ្ឋាន សៀវភៅគ្រួសារអត្តសញ្ញាណប័ណ្ណ ប័ណ្ណក្រីក្រ លិខិតបញ្ជាក់ដី និងក្រដាសបោះឆ្នោត ហ្នឹងហើយថា ពួកបងនេះពិតជាប្រជាពលរដ្ឋរស់នៅភូមិព្រែកជីក ភូមិជីខក្រោមពិតប្រាកដមែន។ អញ្ចឹងគាត់ថា ពួកបងនេះជាអ្នកក្លែងឯកសារ។ អញ្ចឹងបងអត់សុខចិត្តទេ បងអត់ចេះផលិតទេ។»
អ្នកស្រី កើត ពៅ បានបន្តថា បើតុលាការយុត្តិធម៌ពិតប្រាកដមែន តុលាការត្រូវតែទៅចាប់ក្រសួងមហាផ្ទៃ អាជ្ញាធរគ្រប់លំដាប់ថ្នាក់ ខេត្ត ស្រុក ភូមិ ឃុំ ព្រោះគាត់ គឺជាអ្នកចេញប័ណ្ណឱ្យប្រជាពលរដ្ឋ។
ចំពោះការសម្រេចនេះ ត្រូវបានប្រជាពលរដ្ឋ ដែលបានឈរតវ៉ានៅមុខតុលាការកំពូលផ្ទុះកំហឹងឡើង និងប្តេជ្ញាថា នឹងនៅតែបន្តការតវ៉ា រហូតទាល់តែមានដំណោះស្រាយ។ ថ្លែងឡើងទាំងកំហឹង ព្រមជាមួយសម្លេងខ្សឹបខ្សួលអួលដើមករ តំណាងពលរដ្ឋអ្នកស្រី កើត ពៅ បានអះអាងទៀតយ៉ាងដូច្នេះថា៖ «ពួកខ្ញុំស៊ូស្លាប់ នៅចំពោះមុខតុលាការកំពូល ពួកខ្ញុំនឹងអំពាវនាវកម្លាំង២៤ខេត្តក្រុង ក៏ដូចជាអាស៊ានទាំងដប់ដែរ មកជួយស្តាប់មើលតុលាការកំពូលប្រទេសកម្ពុជាយើងនេះ អយុត្តិធម៌ណាស់ ពុករលួយណាស់សម្រាប់ពួកបង ក៏ដូចជាសម្រាប់ប្រជាពលរដ្ឋ នៅទូទាំងព្រះរាជាណាចក្រកម្ពុជារបស់ពួកយើងដែរ»។
ទស្សនាវដ្ដីមនោរម្យ.អាំងហ្វូ មិនអាចសុំការអត្ថាធិប្បាយពីលោក ហេង ហ៊ុយ បានទេ ចំពោះករណីនេះ។
ជម្លោះដីធ្លីដ៏រ៉ាំរ៉ៃនៅក្នុងស្រុកស្រែអំបិល ខេត្តកោះកុង រវាងក្រុមហ៊ុន ហេង ហ៊ុយ និងប្រជាពលរដ្ឋ ដោយសារការបែងចែកព្រំប្រទល់ដីឃុំ មិនច្បាស់លាស់ បានបណ្តាលឱ្យមានបញ្ហាមិនចេះចប់ មិនចេះហើយ និងបង្កឱ្យប្រជាពលរដ្ឋរស់នៅទាំងព្រួយបារម្ភ និងភ័យខ្លាច បន្ទាប់ពីរដ្ឋាភិបាលបានធ្វើសម្បទានដីសេដ្ឋកិច្ច ឱ្យទៅក្រុមហ៊ុន ហេង ហ៊ុយចំនួន៧៧៩ហិចតាពីរដ្ឋាភិបាល នៅភូមិឈូក ឃុំជីខលើ ស្រុកស្រែអំបិល ខេត្តកោះកុងកាលពិឆ្នាំ២០០៩៕