ចំងល់បានកើតឡើង នៅក្នុងចំណោមអាជីវករ នៃផ្សារដើមគ បន្ទាប់ពីប្រធានផ្សារ និងក្រុមការងារមួយចំនួន ពីសាលារាជធានីភ្នំពេញ បានមកវាស់វែងតូបរបស់ពួកគាត់។ អាជីវករខ្លះ បានលើកឡើងថា តាំងពីចាប់ផ្តើម​លក់ នៅផ្សារដើមគរនេះ ជាង១០ឆ្នាំមកហើយ ប្រធានផ្សារមុនៗ មិនដែលមានរឿងបែបនេះ កើតឡើងទេ ចុះ​ហេតុអ្វីនៅសុខៗ មានអ្នកចុះមកវាស់វែងតូប ក្នុងផ្សារដែលកំពុងលក់ដូរបែបនេះ។

អាជីវករលក់ស្បែកជើងម្នាក់ លោក ហាង សុធា នៅក្នុងវ័យ ៥២ឆ្នាំលោក បានស្រដីប្រាប់ទស្សនាវដ្តី​​មនោរម្យ.​អាំងហ្វូថា នៅថ្ងៃទី១៥ ខែកក្កដា ឆ្នាំ២០១៥នេះ ពិតជាមានគេមកវាស់វែង នៅកន្លែងលក់របស់លោកមែន។ អាជីវកររូបនេះ បានបញ្ជាក់ថា តាំងពីមុនមក លោកមិនដែលឃើញ ប្រធានផ្សារមុនៗ ធ្វើបែបនេះទេ ចុះ​មក​វាស់វែង ដោយមិនប្រាប់ហេតុផលច្បាស់លាស់ ធ្វើឲ្យអាជីវករព្រួយបារម្ភ។

មិនខុសគ្នា ពីអាជីវករខាងលើទេ អ្នកស្រី នួន ស៊ីថា អ្នកលក់ដូរក្នុងផ្សារនេះដែរ បានថ្លែងថា ពិតជាមានការ​ចុះវាស់វែងស្ងាត់ៗ ពីសំណាក់ប្រធានផ្សារ និងអ្នកផ្សេងទៀត ដែលលោកប្រធានផ្សារបញ្ជាក់ប្រាប់អ្នកស្រី​ថា ជាមន្ត្រីមកពី សាលារាជធានីភ្នំពេញ។ អ្នកស្រីមិនបានដឹងព័ត៌មាននេះ មុនសោះថា ប្រធានផ្សារ និង​សាលា​រាជធានីភ្នំពេញ ចង់ធ្វើអ្វី ព្រោះអ្នកស្រីបញ្ជាក់ថា បើតាមអាណត្ត គឺនៅរហូតដល់ឆ្នាំ២០២៦ទើបផុត។

ចំណែកអ្នកលក់ខោអាវម្នាក់ នៅតូបលេខ ៥២ អ្នកស្រី ពេជ្យ ផល្លា បានលើកឡើងថា នៅពេលអ្នកស្រី សួរ​ទៅកាន់ប្រធានផ្សារ ពេលកំពុងវ៉ាស់ លោកបានឆ្លើយថា គ្រាន់តែចង់ដឹងថា គម្លាតពីតូបទៅកន្លែងនីមួយ មាន​ទំហំប៉ុន្មានប៉ុណ្ណោះ។ តែក្រុមអាជីវករទាំងអស់ មិនជឿសម្តីនេះទេ ហើយអ្នកទាំងនោះ បានស្រុះស្រូលគ្នា ទៅ​តវ៉ាដល់ទីស្នាក់ការផ្សារ ព្រោះយល់ថា ការចុះវ៉ាស់ម្តងនេះ «មានអាថ៌កំបាំង» ហើយត្រូវបានប្រធានផ្សារ​បដិសេធ និយាយថាមិនដឹង ពីបញ្ហានេះទៀត។

ទស្សនាវដ្តីបានស្វែងរកការបំភ្លឺ ពីលោក សេង សារ៉ន ប្រធានផ្សារដើមគ ជុំវិញបញ្ហាទាំងអស់នេះ តែលោក​បានបដិសេធថា លោកមិនបានដឹង រឿងទាំងអស់នេះទេ ដោយលោកបង្វែ ឲ្យទៅសួរ សាលារាជធានី​ភ្នំពេញវិញ។ លោកបានថ្លែង នៅព្រឹក ថ្ងៃទី១៦ ខែកក្កដា ថា៖ «ខ្ញុំមិនដឹងរឿងនេះទេ បើចង់ដឹងទៅសួរ​អ្នក​វ៉ាស់ទៅ!»។ រីឯអ្នកនាំពាក្យ សាលារាជធានីភ្នំពេញ លោក ឡុង ឌីម៉ង់ វិញ ក៏មិនបានឆ្លើយ នឹងការសាកសួរ របស់ទស្សនាវដ្ដីដែរ។ លោកគ្រាន់តែបានថ្លែងថា លោករវល់ប្រជុំ៕