តារាសម្តែង លោក អ៊ែន ឌី ត្រូវបានអ្នកនៅក្នុងហេតុការណ៍បញ្ជាក់ថា លោកបានបើករថយន្តម៉ាក កាមេរី ស៊េរី​ទំនើបមួយគ្រឿង ស្លាកលេខភ្នំពេញ ២R-២៥៨២ បើកបរដោយតារាសម្តែងខ្លួនឯង ហើយនៅក្នុងរថយន្ដ មាន​ស្រ្តីស្លៀកពាក់​សិចស៊ី ជិះជាមួយម្នាក់ទៀត។ នៅក្នុងហេតុការណ៍ គ្រោះថ្នាក់ចររាចរណ៍នេះ បណ្តាលឲ្យបុរស ជាម្ចាស់​ម៉ូតូ​ម៉ាក វីវ៉ាC១២៥ រងរបួសបាក់ជើងស្តាំ។

ប្រភពពីកន្លែងកើតហេតុ បានបញ្ជាក់ថា គ្រោះថ្នាក់នេះ បង្ករឡើងក្នុងទិសដៅបញ្ច្រាសគ្នា។ ក្នុងនោះ រថយន្ត​តារាខាងលើ បានធ្វើដំណើរបញ្ច្រាសទិស តាមផ្លូវលេខ៦៣ ជាផ្លូវឯកទិស ពីជើងទៅត្បូង ស្រាប់តែមកដល់​កន្លែងកើតហេតុ បានបុកម៉ូតូជនរងគ្រោះខាងលើ ពេញទំហឹង បណ្តាលឲ្យម្ចាស់ម៉ូតូ ដែលកំពុងធ្វើដំណើរ ស្រប​ទិស​ពីត្បូងទៅជើង រងរបួសទាំងខ្លួនប្រាណ ខូចខាតទាំងម៉ូតូ។

ហេតុការណ៍គ្រោះថ្នាក់នេះ បានកើតឡើង នៅសង្កាត់ចតុមុខ ខណ្ឌដូនពេញ រាជធានីភ្នំពេញ។ ភ្លាមៗ បន្ទាប់​ពីកើតហេតុ អ្នករបួសត្រូវបានម្ចាស់ឡាន ទូរស័ព្ទហៅឡានពេទ្យកាល់ម៉ែត្រ យកទៅសង្គ្រោះបន្ទាន់។ ឡាន និង​ម៉ូតូ ដែលរងការខូចខាត រៀងៗខ្លូន ត្រូវបានមន្រ្តីចររាចរណ៍ខណ្ឌដូនពេញ យកទៅរក្សាទុក នៅ​ការិយាល័យ​ចរាចរណ៍រាជធានី ដើម្បីធ្វើការដោះស្រាយ ទៅតាមផ្លូវច្បាប់។ យ៉ាងណាក៏ដោយ គេឃើញតារាសម្តែង លោក អ៊ែន ឌី នៅដោះស្រាយរហូត ជាមួយមន្រ្តីចររាចរណ៍ និងភាគីរងគ្រោះ ព្រោះឡានរបស់ខ្លូន បានបើកបញ្ច្រាស​ទិស នៅលើផ្លូវឯកទិស រហូតទៅបង្កឲ្យមានគ្រោះថ្នាក់៕