ប័ណ្ណទីមួយ (ផ្នែកប័ណ្ណព្រំដែន) ជាប័ណ្ណ សម្រាប់ឱ្យមន្រ្តីអន្តោប្រវេសន៍ ត្រួតពិនិត្យមុននឹងអនុញ្ញាតឱ្យចេញ។ ប័ណ្ណទីពីរ (ផ្នែកប័ណ្ណស៊ីជំពូ) ជាកាតសម្គាល់ខ្លូនជនអន្តោប្រវេសន៍ ដែលអ្នកឆ្លងដែនទាំងអស់ ត្រូវមាន​ដូច​គ្នា។ នៅពេលចូល ទៅដល់ទឹកដីប្រទេសថៃ ប័ណ្ណទាំងពីរសន្លឹក នឹងត្រូវមន្ត្រីអន្តោប្រវេសន៍ថៃ ត្រូតពិនិត្យ​សារ​ជាថ្មី មុននឹងអនុញ្ញាត ឱ្យចូលធ្វើការតាមកន្លែងផ្សេងៗគ្នា។

តែបញ្ហា នៅត្រង់ថា ពីមុនមក មិនដែលមានការលក់ប័ណ្ណរបៀបនេះ ក្នុងតម្លៃថ្លៃដ៏ខ្ពស់អញ្ចឹងទេ។ តែក្នុង​ពេល​នេះ ដើម្បីបានប័ណ្ណស៊ីជំពូមួយសន្លឹក ពលរដ្ឋត្រូវចំណាយថ្លៃ៣០០បាត ស្មើ៣ម៉ឺនបីពាន់រៀល។ ដោយឡែក​ប័ណ្ណ​​ព្រំដែនវិញ អ្នកដំណើរត្រូវចំណាយ១០០បាត ស្មើរនឹង១១០០០រៀលក្នុងមួយសន្លឹក ខណៈពីមុនមក ពលរដ្ឋ​​មិន​ដែល តម្រូវឲ្យបង់ប្រាក់ឡើយ។

ទាំងនេះ ជាការលើកឡើង របស់កម្មករចំណាក់ស្រុកម្នាក់ លោក ពែក វាសនា ដែលកំពុងធ្វើដំណើរ ជាមួយ​កម្មករប្រមាណ១០នាក់ទៀត ត្រឡប់ទៅខេត្តក្រចេះវិញ ដោយហេតុថា គ្មានប្រាក់បង់ ឱ្យនគរបាល​អន្តោ​ប្រវេសន៍ ទាក់ទងនឹងថ្លៃប័ណ្ណឆ្លងដែន ទាំងពីរប្រភេទ។ ពលរដ្ឋក្រីក្ររូបនេះ បានលើកឡើងថា មិនមែន​ជា​លើកទីមួយទេ ដែលលោកចេញចូល ទៅធ្វើការនៅប្រទេសថៃ តែម្តងនេះខុសប្លែកពីធម្មតា។ បច្ចុប្បន្ន លោក​គ្មានប្រាក់ សម្រាប់ធ្វើដំណើឆ្លងដែន ទៅដល់កន្លែងការងារចាស់វិញទេ ព្រោះនគរបាលអន្តោប្រវេសន៍ ច្រក​ទ្វារប៉ោយប៉ែតមិនអនុញ្ញាត ដោយសារលោកគ្មានប្រាក់គ្រប់គ្រាន់ បង់ថ្លៃប័ណ្ណទាំងពីរខាងលើ។ លោកបន្ថែម​ទៀតថា បើអស់ថ្លៃហើយបានទៅស្រួល នោះវាមិនប៉ុន្មានទេ។ តែនេះនៅមានលេសថា ទាល់តែមានក្រដាស​បញ្ជាក់ ពី«ហ៊ួនណា»​ ឬថៅកែនៅប្រទេសថៃ ទើបចូលបាន លោកថា កាលពីមុន មិនដែលមានបញ្ហាទាំង​នេះ​ទេ។

ឆ្លើយតបនឹងពាក្យពេជ្យទាំងនេះ លោក សេម មករា នាយផ្នែកសេនាធិការអន្តោប្រវេសន៍ ប្រចាំច្រកទ្វារ​ព្រំដែន​ប៉ោយប៉ែត បានបដិសេធមិនបំភ្លឺបញ្ហាទាំងនេះ ជាមួយទស្សនាវដ្ដីមនោរម្យ.អាំងហ្វូទេ។ នៅពេលលើកទូរស័ព្ទ​ដំបូង លោកមិនបាននិយាយអ្វីទាំងអស់ រួចចុចបិទទូរស័ព្ទ និងមិនព្រមទទួលទូរស័ព្ទ ជាលើកទីពីរទៀត​ឡើយ។

យ៉ាងណាក៏ដោយ លោក គោ ស៊ុំសារឿន អភិបាលខេត្តបន្ទាយមានជ័យ បានមានប្រសាសន៍នៅថ្ងៃទី០៩ ខែ​កញ្ញានេះថា ជាគោលការណ៍របស់រដ្ឋាភិបាល មិនអនុញ្ញាតឱ្យយកប្រាក់ច្រើនដូចនេះទេ។ លោកថា ចំពោះ​រឿង​អន្តោប្រវេសន៍គឺ អ្នកគ្រប់គ្រងផ្នែកអន្តោប្រវេសន៍ ជាអ្នកចាត់ចែងករណីនេះ ដោយខ្លូនឯង បើមានរឿង​បែបនេះ អគ្គនាយកដ្ឋានអន្តោប្រវេសន៍ គួរតែត្រូវបានរាយការណ៍ ដើម្បីចាត់វិធានការទប់ស្កាត់ ឱ្យបាន។ ចំពោះ​លោក​ផ្ទាល់ ដែលមាននាទី ជាអ្នកគ្រប់គ្រងរដ្ឋាបាលរួម នៅក្នុងខេត្តនេះ លោកនឹងធ្វើការប្រជុំ បើសិន​ជា​មាន​​រឿង​​បែប​នេះ​កើតឡើង ក្នុងអង្គភាពណាមួយ។

ដោយឡែក មន្ត្រីឃ្លាំមើល របស់សមាគមការពារសិទ្ឋិមនុស្ស អាដហុក ប្រចាំខេត្តបន្ទាយជ័យ លោក ស៊ុំ ចាន់គា បានមានប្រសាសន៍ថា មន្រ្តីនគរបាលច្រកទ្វារអន្តរជាតិ ប៉ោយប៉ែត មិនគួរណាធ្វើបែបនេះទេ។ លោក​បាន​ថ្លែង​ប្រាប់ថា ការជំរិតទារប្រាក់ ពីប្រជាពលរដ្ឋក្រីក្រ ដែលចំណាក់ស្រុកធ្វើកម្មករគេ វាផ្ទុយពី​គោលការណ៍​របស់​រដ្ឋាភិបាល។ ករណីខាងលើនេះ ជារឿងមួយ ក្នុងចំណោមរឿងជាច្រើន ដែលលោកបានទទួល ជារឿយៗ​មក​ហើយ។

លោក ស៊ុំ ចាន់គា បានថ្លែងឲ្យដឹងទៀតថា បញ្ហានេះ គួរតែមានកិច្ចអន្តរាគមន៍ ពីអង្គភាពប្រឆាំងអំពើ​ពុក​រលួយ ធ្វើការស៊ើបអង្កេត រកជនខិលខូចទាំងនោះ ដែលធ្វើឱ្យប៉ះពាល់ និងខូចខាតដល់សង្គម។ លោកសង្កេត​ឃើញ​ថា រហូតមកដល់ពេលបច្ចុប្បន្ន នៅមិនទាន់មានអង្គភាពប្រឆាំងអំពើពុករលួយ មានចំណាត់ការ ចំពោះ​បញ្ហា​ច្រក​ទ្វារព្រំដែន ប៉ោយប៉ែត នេះនៅឡើយ៕