«វាជាការរើសអើង (...) បើកាលណាយើងច្បាស់ យើងមានចំនុចជាច្រើន ដែលជាចំនុចខ្សោយរបស់ក្រសួងការងារ ពាក់ព័ន្ធទៅនឹងអំពើពុករលួយ នៅក្នុងវិស័យឧស្សាហកម្មកាត់ដេរ។ អញ្ចឹងគេកម្រឱ្យយើង ទៅនិយាយហែកកេរ្ត៍​នៅក្នុងអង្គប្រជុំធំៗណាស់។» នេះជាការឡើកឡើង​របស់​លោក ជា មុន្នី ប្រធានសហជីពកម្មករដ៏ល្បីមួយ ដែល​បាន​ធ្វើការរិះគន់ ទៅលើក្រសួងការងារ ជុំវិញមិនអញ្ជើញសហជីព​របស់លោកឲ្យទៅចូលរួមក្នុងសិក្ខាសាលាថ្នាក់ជាតិ​មួយស្ដីពីប្រាក់ឈ្នួលអប្បបរមារបស់កម្មករ។

លោក​ ជា មុនី ប្រធានសហជីបសេរីកម្មកកម្ពុជា អោបរូបសំណាកលោក ជា វិជ្ជា បងប្រុសរបស់លោក។ (រូបថត MONOROOM.info)

សិទ្ធិ - ប្រធានសហជីពសេរីកម្មករ នៃព្រះរាជាណាចក្រកម្ពុជា លោក ជា មុន្នី បានប្រតិកម្មនៅថ្ងៃទី២៣ ខែមេសា ឆ្នាំ២០១៤ នេះថា ភាគច្រើនការងារប្រជុំធំៗ ពាក់ព័ន្ធទៅនឹងផលប្រយោជន៍កម្មករ ការអញ្ជើញលោកទៅចូលរួម​មានតិចតួចណាស់។ ប្រសិនបើហៅ លុះត្រាតែមានគំនាបពីខាងស្ថានទូត ពីអ្នកបញ្ជាទិញ ហើយជួនកាល​មាន​គំនាប ពីអង្គការពលកម្មអន្តរជាតិ ទើបមានការអញ្ជើញអោយចូលរួម។

ប្រតិកម្មរបស់ប្រធានសហជីពខាងលើ ក្រោយពីសហជីពរបស់លោក មិនត្រូវបានក្រសួងការងារអញ្ជើញទៅចូលរួម ក្នុងសិក្ខាសាលាថ្នាក់ជាតិ ស្តីពីការពីការស្វែងរកនូវយន្តការ និងប្រព័ន្ធនៃការគ្រប់គ្រង កំណត់ប្រាក់ឈ្នួលអប្បបរមា​នៅកម្ពុជានោះឡើយ។

លោក ជា មុន្នី បន្ថែមថា បើហៅដោយឆន្ទៈតាមកិច្ចការរដ្ឋបាល ត្រូវតែឱ្យអង្គការវិជ្ជាជីវៈ ដែលពាក់ព័ន្ធចូលរួមធ្វើ​ដោះស្រាយ រឿងបញ្ហារបស់កម្មករ ដូចជាបញ្ហាប្រាក់បៀរវត្ស និងសិទ្ធិកម្មករជាដើម គឺកម្រហៅទៅចូលរួមណាស់។ លោកថា បញ្ហាបែបនេះ វាកើតឡើងតាំងពីដើមឆ្នាំ២០១៤មក។

លោកថ្លែងពន្យល់ ពីមូលហេតុនេះថា៖ «ខ្ញុំច្បាស់ណាស់ ក្នុងវិស័យឧស្សាហកម្មកាត់ដេរ ហើយខ្ញុំធ្វើការងារ​អស់​រយៈពេល១៥ឆ្នាំហើយ បើកាលណាយើងច្បាស់ យើងមានចំនុចជាច្រើន ដែលជាចំនុចខ្សោយរបស់ក្រសួងការងារ ពាក់ព័ន្ធទៅនឹងអំពើពុករលួយ នៅក្នុងវិស័យឧស្សាហកម្មកាត់ដេរ។ អញ្ចឹងគេកម្រឱ្យយើង ទៅនិយាយហែកកេរ្ត៍​នៅក្នុងអង្គប្រជុំធំៗណាស់ ព្រោះអង្គប្រជុំនេះ ផ្តោតទៅលើការតម្លើងប្រាក់បៀវត្សសមរម្យរបស់កម្មករ។» លោក​បានហៅទង្វើនេះ ថាជាការរើសអើងសហជីព និងជាកំហុសដ៏ធ្ងន់ធ្ងរមួយរបស់ក្រសួង។

ឆ្លើយតបនឹងការចោទប្រកាន់ខាងលើ លោក ហេង សួរ អ្នកនាំពាក្យក្រសួងការងារ បានបញ្ជាក់ថា ក្រសួងបានចែក​ជូនលិខិតអញ្ជើញនេះ ទៅដល់គ្រប់សហជីពតាំងពីថ្ងៃច័ន្ទមកម្លេះ។ ការដែលលោក ជា មុន្នី មិនទាន់បានទទួល​លិខិតនេះ ប្រហែលជារដ្ឋបាលរបស់អង្គភាពគាត់ មិនទាន់ប្រគល់ឱ្យ ព្រោះបុគ្គលិករបស់គាត់​បានចុះហត្ថលេខា​ទទួលរួចហើយ៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី២៣ មេសា ២០១៤