តុលាការ​​សម្រេច​មិន​​ឲ្យ​​នៅ​​ក្រៅ​​ឃុំ៖​ ដើម​បណ្ដឹង​ថា​មិន​​សម​​ហេតុ​ផល

គ្រួសារជនត្រូវចោទទាំង២៣នាក់ បានសម្តែងការខកចិត្តជាខ្លាំង ចំពោះការសម្រេចរបស់សាលាដំបូងរាជធានីភ្នំពេញ នៅថ្ងៃទី០៤ ខែមេសានេះ ទៅនឹងសំណើរសុំនៅក្រៅឃុំ បណ្តោះអាសន្ន ដើម្បីទៅព្យាបាលជំងឺ ខណៈពេលដែលជំងឺរបស់ប្តី និងកូនរបស់ពួកគាត់កំពុងតែធ្ងន់ធ្ងរទៅៗ ដោយមិនមានការព្យាបាលឲ្យបានដិតដល់។
Loading...
  • ដោយ: ប្រាថ្នា
  • កែប្រែចុងក្រោយ: April 04, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

គ្រួសារជនត្រូវចោទទាំង២៣នាក់ បានសម្តែងការខកចិត្តជាខ្លាំង ចំពោះការសម្រេចរបស់សាលាដំបូង​រាជធានី​ភ្នំពេញ នៅថ្ងៃទី០៤ ខែមេសានេះ ទៅនឹងសំណើរសុំនៅក្រៅឃុំ បណ្តោះអាសន្ន ដើម្បីទៅព្យាបាលជំងឺ ខណៈពេល​ដែលជំងឺរបស់ស្វាមី និងកូនរបស់ពួកគាត់កំពុងតែធ្ងន់ធ្ងរទៅៗ ដោយមិនមានការព្យាបាលឲ្យបានដិតដល់។


ទិដ្ឋភាពនៅមុខសាលាដំបូងរាជធានី ថ្ងៃទី៣១ខែតុលាឆ្នាំ២០១៣។ (រូបថត MONOROOM.info/ O.Vary)

ប្រព័ន្ធយុត្តិធម៌ - បន្ទាប់ពីស្វាមីរបស់អ្នកស្រី ត្រូវបានតុលាការសម្រេចបដិសេធ មិនអោយនៅក្រៅឃុំ ដើម្បីយក​ទៅព្យាលបាលជំងឺតាមការស្នើសុំនោះមក អ្នកស្រីប្រាក់ សុវណ្ណារី ភរិយារបស់លោក វន់ ពៅ បានសម្តែងការខក​ចិត្តថា «តុលាការមិនគោរពច្បាប់ មិនផ្អែកទៅលើច្បាប់ តុលាការត្រឹមតែបំពោរមាត់ខ្លួនឯង ចេះតែនិយាយថា​លោក វន់ ពៅ អត់មានជំងឺ ចុះតុលាការអត់មានទៅមើលរាងកាយរបស់គាត់ថា គាត់មានជំងឺពិតប្រាកដអត់ ហើយ​អត់​មើលក្រដាស់ចេញពីមន្ទីពេទ្យថាលោក វន់ ពៅ មានជំងឺពិតប្រាកដដែរឬទេ?»

អ្នកស្រី ប៉ាន់ ស៊ីណា ជាម្តាយរបស់លោក សុគន្ធ សម្បត្តិពិសិទ្ធិ ដែលត្រូវបានតុលាការបដិសេធដែឬនោះ បានរៀប​រាប់​ទាំងទឹកភ្នែកថា កូនអ្នកស្រីបា​នបាក់កដៃ ព្រមទាំងម្រាមទាំងបួនផងដែរ អំឡុងពេលទៅថតរូប​ក្នុងព្រឹត្តិការណ៍ ទាមទារប្រាក់ខែ១៦០ដុល្លា របស់កម្មករកាត់ដេរ។ អ្នកស្រីថ្លែងបន្តថា អ្នកស្រីបានស្នើសុំតុលាការ​ដើម្បីយកកូនប្រុស​អ្នកស្រី ទៅវះកាត់ដៃនៅប្រទេសថៃចំនួន៥ថ្ងៃ តែតុលាការបែរជាមិនអនុញ្ញាត អោយដោយលើកឡើងថា របួសកូន​អ្នកស្រីគ្មានអ្វីធ្ងន់ធ្ងរ ហើយមិនអាចយកទៅព្យាលបាលនៅឯណាបានទេ។

ម្តាយរបស់ជនត្រូវចោទ សុគន្ធ សម្បត្តិពិសិទ្ធិ រូបនេះ បានអោយដឹងទៀតថា អ្នកស្រីបានធ្វើការស្នើសុំតុលាការដើម្បី​យកកូនទៅព្យាបាលចំនួនបីដងហើយ។ កាលពីមុនស្នើសុំ១០ថ្ងៃ ៧ថ្ងៃគេមិនអនុញ្ញាត ហើយលើកនេះស្នើសុំតែ៥ថ្ងៃ តុលាការនៅតែបដិសេធទៀត។

ស្រ្តីវ័យ៥៣ឆ្នាំរូបនេះ បានបង្ហាញក្តីខកចិត្តចំពោះការសម្រេច បដិសេធសំណើជាលើកទីបីរបស់អ្នកស្រីថា «ខ្ញុំអស់​សង្ឃឹមណាស់ តុលាការគ្មានឯករាជ្យចំពោះជនរងគ្រោះ ដែលគ្មានទោសកំហុសអ្វីសោះ គ្រាន់តែគ្នាជាមន្រ្តី​ទៅថត​យកព័ត៌មាន នៅកន្លែងកម្មករតវ៉ាយកប្រាក់ខែ១៦០»។

សូមបញ្ជាក់ថា នៅព្រឹកថ្ងៃទី៤ ខែមេសា ឆ្នាំ២០១៤នេះ បន្ទាប់ពីបើកសវនការរយៈពេលជិតមួយម៉ោង ដោយជំនុំទៅ​លើពាក្យស្នើសុំនៅក្រៅរបស់លោក វន់ ពៅ ប្រធានសមាគមឯករាជ្យ ប្រជាធិបតេយ្យនៃសេដ្ឋកិច្ចក្រៅប្រព័ន្ធ និង​លោក សុគន្ធ សម្បត្តិពិសិទ្ធិ មកពីមជ្ឈមណ្ឌលកម្ពុជាដើម្បីសិទ្ធិការងារ តាមការស្នើសុំរបស់គ្រួសារ ដើម្បីយកទៅ​ព្យាបាលជំងឺ តុលាការនៃសាលាដំបូងរាជធានីភ្នំពេញ បានសម្រេចបដិសេធពាក្យសុំ នៅក្រៅឃុំបណ្តោះអាសន្ននេះ ដោយលើកឡើងថា ជំងឺអ្នកទាំងពីរនោះមិនមានអ្វីធ្ងន់ធ្ងរទេ

រីឯលោក យួម សុគន្ធ ជាឪពូករបស់ជនត្រូវចោទខាងលើ បានបញ្ជាក់ថា កូនប្រុសរបស់លោកជាមន្រ្តីនៅអង្គការក្លារី ទើបតែចូលធ្វើការបានប៉ុន្មានថ្ងៃទេ ហើយគេបានចាត់តាំងអោយទៅសង្កេតការណ៍ ក្នុងពេលកម្មករធ្វើបាតុកម្មកាល​ពីខែមករា។ លោកយល់ថា ការសម្រេចរបស់តុលាការនៅក្នុងរឿងនេះ មិនបានពិនិត្យមើលច្បាស់លាស់ មិនសម​ទៅ​តាមភាពជាក់ស្តែងនោះទេ ក្នុងខណៈពេលដែលដៃកូនរបស់លោក កំពុងរងគ្រោះ។

លោកពន្យល់យ៉ាងដូច្នេះទៀតថា ប្រសិនបើមិនធ្វើការព្យាលបាល អោយបានដិតដល់នោះទេ ដៃរបស់កូនលោក​នឹងបន្តស្វិត ព្រោះដៃម្ខាងបានចាប់ផ្តើមស្វិតបណ្តើរៗហើយ។ ចំណែកពេទ្យ នៅក្នុងពន្ធនាគារ ក៏មិនបានព្យាបាល​ដិតដល់ដែរ។

ឪពុកជនត្រូវចោទរូបនេះ បានទទូចអោយរដ្ឋាភិបាលភិបាល ក៏ដូចជាតុលាកាពិនិត្យរឿងក្តីនេះឡើងវិញ ព្រោះកូន​លោកមិនមានកំហុស ដូចការការចោទប្រកាន់របស់តុលាការនោះទេ។ លោកបានថ្លែងថា «កូនខ្ញុំមិនមែនជាជន​បង្ក​លក្ខណៈញុះញង់អីទេ ព្រោះកូនខ្ញុំទៅហ្នឹង ក្នុងនាមជាលក្ខណៈសង្កេតការណ៍ មិនមែនជាអ្នកបង្កបាតុកម្ម និងញុះ​ញង់​ដូចតុលាការចោទប្រកាន់»ឡើយ៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ០៤ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...