នៅព្រឹកថ្ងៃទី២០ ខែមករានេះ លោក សុខ ឈុនអឿន ប្រធានស្ដីទីសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ ត្រូវ​បានស្នងការ​រាជធានីភ្នំពេញដោះលែងវិញហើយ បន្ទាប់ពីបានឃាត់ខ្លួនកាលពីល្ងាចថ្ងៃទី១៩ខែមករា ម្សិលមិញ​នេះ។ ជាការឃាត់ខ្លួនមួយ ដែលត្រូវបានធ្វើបានធ្វើឡើងយ៉ាងទាន់ហន់ គ្មានទាំងដីកាចាប់ខ្លួន និងគ្មានទាំងការ​បញ្ជាក់ពី​មូលហេតុអ្វីទាំងអស់។

លោក សុខ​ ឈុនអឿន អនុប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ។ (រូបថត MONOROOM.info/ O.Vary)

ប្រព័ន្ធយុត្តិធម៌ - រហូតដល់ម៉ោង ១០ព្រឹកថ្ងៃទី២០ ខែមករានេះ លោក សុខ ឈុនអឿន ទីប្រធានស្ដីទីសមាគម​ប្រជាធិបតេយ្យ​នៃសេដ្ឋកិច្ចក្រៅប្រព័ន្ធ ត្រូវបានស្នងការរាជធានីភ្នំពេញដោះលែងវិញហើយ បន្ទាប់ពីលោក​ត្រូវ​បានឃាត់ខ្លួនអស់មួយយប់ ។ ខណៈពេលដែលលោក ចេញពីស្នងការរាជធានីភ្នំពេញ លោក សុខ ឈុនអឿន បានថ្លែងយ៉ាងខ្លីថា «គេមិនបានបញ្ជាក់​ពីទោស​កំហុសអីនោះ គេគ្រាន់តែបញ្ជាក់ថា លើកក្រោយមិន​អោយមាន​ការជួបជុំគ្នានៅទីសាធារណៈទៀត»។

ឯខាងស្នងការរាជធានីភ្នំពេញ ក៏មិនបានបញ្ជាក់អោយបានច្បាស់លាស់ដែរ ពីការឃាត់ខ្លួន អនុប្រធាន​សមាគម​ប្រជាធិបតេយ្យនៃសេដ្ឋកិច្ចក្រៅប្រព័ន្ធរូបនេះ។

សូមបញ្ជាក់ថាកាលពីល្ងាចថ្ងៃទី១៩ ខែមករាឆ្នាំ២០១៤ លោកសុខ ឈុនអឿន ប្រធានស្តីទីសមាគម​ប្រជាធិបតេយ្យ​នៃសេដ្ឋកិច្ចក្រៅប្រព័ន្ធ ដែលកាន់ការជំនួសលោក វន់ ពៅ ត្រូវបានកម្លាំងសមត្ថកិច្ចរាជធានីភ្នំពេញចាប់ខ្លួន ខណៈ​រូបលោកចូលរួមធ្វើពិធីបួងសួងនៅមុខព្រះអង្គដងកើ សូមឲ្យវត្ថុសក្ដិសិទ្ធិជួយបន្ទន់ចិត្ត​រដ្ឋាភិបាលឲ្យ​ដោះលែង​មនុស្ស ២៣នាក់ដែលជាប់ពន្ធនាគារត្រពាំងផ្លុង។

ចំពោះហេតុការណ៍នៃការចាប់ខ្លួននេះ គេនៅមិនទាន់ដឹងមូលហេតុអ្វីនៅឡើយទេ។ ពាក់ព័ន្ធនឹងបញ្ហានេះ អ្នកស្រី ប្រាក់ សុវណ្ណារី ភរិយា លោកវន់ ពៅ បាននិយាយដោយការហួសចិត្តថា «គ្មាននរណាគ្រប់គ្នាដឹងថា មូលហេតុអី​បានជាគេចាប់ខ្លួនគាត់នោះទេ ព្រោះរាល់ដងគាត់មិនដែលបញ្ចេញសកម្មភាព ចេញមុខចេញមាត់នោះទេ ហើយ​ភាគច្រើនគាត់តែងកាន់អាយកូមមួយ ដើរនៅក្នុងហ្វូងសមត្ថកិច្ច។ នៅពេលដែលគេឃើញអញ្ចឹង​ម្នាក់ៗសើចហួស​ចិត្តគ្រប់គ្នា។»

អ្នកស្រីយល់ថា ជាការគម្រាបមិនអោយធ្វើការតវ៉ាតទៅទៀត។ នេះជាការបញ្ជាក់របស់អ្នកស្រី «ខ្ញុំមិនដឹងថា តើគេ​ចាប់ហ្នឹងដើម្បីគម្រាមឬយ៉ាងណានោះទេ តែខ្ញុំគិតថាប្រហែលជាគេចាប់ប្រធានហើយ ចង់ចាប់អនុប្រធាន​ទៀត​ដើម្បីបំបាក់ទឹកចិត្តសកម្មជន ឬសមាជិករបស់ប្តីខ្ញុំ»។

«បើទោះបីជាចាប់គេខ្លួន ទាំងប្តីខ្ញុំ និងលោកសុខ ឈុនអឿនក៏ដោយ ប៉ុន្តែសកម្មជនខ្ញុំ នៅតែមិនខ្លាចមិនចុះញ៉ម ព្រោះដល់ដំណាក់កាលនេះហើយ អត់មានអីត្រូវខ្លាចទៀតនោះទេ ព្រោះរដ្ឋាភិបាល មិនដែលផ្តល់​តម្លៃអោយ​ប្រជា​ពលរដ្ឋផង» នេះជាការអះអាងរបស់ អ្នកស្រី ប្រាក់ សុវណ្ណារី។

ទាក់ទងនិងការចាប់ខ្លួនខាងលើនេះដែរ លោកអំ សំអាត ប្រធានផ្នែកបច្ចេកទេសស៊ើបអង្កេត របស់អង្គការ​សិទ្ធិ​មនុស្សលីកាដូ និងជាអ្នកឃ្លាំមើលសកម្មភាពនោះបានអោយដឹងថា «បើសិនជាមិនមានដីការចាប់ខ្លួនណាផ្សេងទេ បើគ្រាន់តែប៉ុណ្ណឹងវាជាការចាប់ខ្លួនដោយខុសច្បាប់ ពីព្រោះសិទ្ធិសេរីភាពនៃការជួបជុំដោយសន្តិវិធី តាមរយៈ​នៃការ​បួងសួង តាមព្រះពុទ្ធសាសនាគឺមិនមាននៅក្នុងច្បាប់បាតុកម្មទេ វាជាសិទ្ធិសេរីភាពរបស់ពលរដ្ឋទៅ»។

-----------------------------------------------
ដោយ ក. ចាន់នីតា និង អ៊ុម វ៉ារី (ទំនាក់ទំនង៖ [email protected]) - ភ្នំពេញ ថ្ងៃទី ២០ ខែមករា ឆ្នាំ២០១៤