ជម្លោះផ្ទៃក្នុង របស់សម្ព័នសហជីព ប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខៅឌូ រវាង លោក អាត់ ធន់ និងលោក អ៊ុំ វិសាល បានក្លាយជារឿងគួរឲ្យចាប់អារម្មណ៍មួយ។ តែជម្ឈដានទូទៅដែលបានតាមដានបញ្ហានេះ បាន​យល់ថា បញ្ហានេះជាការ​បំបែក​បំបាក់ផ្ទៃក្នុង របស់អ្នកនយោបាយ ដើម្បីធើ្វអោយសហជីព​មួយនេះធ្លាក់ចុះ​ខ្សោយ។

លោក អាត់ ធន់ ផ្ដល់កិច្ចសម្ភាសឲ្យអ្នកសារព័ត៌មាននៅថ្ងៃទី២៦​ ខែមករា ឆ្នាំ២០១៤ នាទីលានប្រជាធិបតេយ្យ។ (រូបថត MONOROOM.info/ O. Vary)

ជម្លោះផ្ទៃក្នុង - មន្ត្រីជាន់ខ្ពស់មួយរូប ពីសមាគមការពារសិទ្ធិមនុស្សអាដហុក លោក ណៃ វ៉ង់ដា ដែលបាន​តាមដាន​វិវាទនៅក្នុង​សហជីព ស៊ីខៅឌូ រហូតមក បានថ្លែងពីការកត់សម្គាល់របស់លោកថា រាល់ការធ្វើសន្និសិទកាសែត ឬ​សេចក្តី​ថ្លែង​ការណ៍​​ណាមួយ​របស់លោក អ៊ុំ វិសាល តែងមានការផ្សព្វផ្សាយ នៅតាមទូរទស្សន៏ និងបណ្តាញ​សារព័ត៌មាន​​យ៉ាង​ទូលំទូលាយ។ ​បញ្ហានេះ គ្រប់គ្រាន់នឹងអាចបញ្ជាក់ឲ្យឃើញ ថាមានអ្វីដែលនៅពីក្រោយខ្នង ក្នុងការធ្វើអោយ ស៊ីខៅឌូ ​មានបញ្ហា។

សហជីព ស៊ីខៅឌូ បានដើរតួរយ៉ាងសំខាន់ និងបានចូលរួម​យ៉ាងខ្លាំងក្លា នៅក្នុងរលកកូដកម្ម ក៏ដូចជាការ​ចរចា​ទាមទារ របស់កម្មករនានា ក្នុងពេលកន្លងមក។ សហជីព ស៊ីខៅឌូ ដែលដឹកនាំដោយ លោក អាត់ ធន់ នេះដដែល ក៏បានចេញ​មុខបដិសេធមិនទទួលយក ការផ្ដល់ប្រាក់ខែគោល តែ៩៥ ដុល្លា នៅក្នុងកិច្ចប្រជុំជាមួយ​ក្រសួងការងារ​កាលពីចុងខែធ្នូរឆ្នាំទៅម៉ិញ ហើយបន្ទាប់មក បានប្ដេជ្ញាបន្តការតវ៉ាទាមទារ ឲ្យតម្លើងប្រាក់ខែគោលរបស់​កម្មករ​នយោជិក​ រហូតដល់ ១៦០ ដុល្លារ មកដល់សព្វថ្ងៃ។

កន្លងទៅថ្មីៗនេះ សហជីព ស៊ីខៅឌូ ក៏បានចូលរួមអំពាវនាវ ឲ្យមានការធ្វើកូដកម្មជា​ទូទៅមួយនៅបន្ទាប់ពី​បុណ្យ​ចូលឆ្នាំថ្មី ពីសំណាក់កម្មករនយោជិក ដើម្បីបន្តបុព្វហេតុទាមទារប្រាក់ខែគោល ១៦០ ដុល្លារ និងទាមទារឲ្យដោះ​លែងជនជាប់ឃុំ«ដោយមិនទាន់មានទោស»ទាំង២១នាក់នោះផង។ ជនទាំង២១ ដែលត្រូវបានអ្នកផងចាត់ទុកថា ជាកូន«ជឹងនយោបាយ»របស់រដ្ឋាភិបាល និងនយោជក ដើម្បីគម្រាមទៅដល់ចលនាទាមទារផ្សេងៗ នៅកម្ពុជា។

លោក ណៃ វង់ដា បានបន្តថា៖ «ដូចជាមានការជួនគ្នា ហាក់ដូចជាមានរឿងនយោបាយអីមួយ នៅខាងក្រោយ។ (...) អ្នកដែល​នៅ​ពីក្រោយខ្នង ដែលធ្វើឱ្យស៊ីខាវឌូមានបញ្ហានេះ គឺអ្នកនយោបាយ ព្រោះបណ្តឹងរបស់ស៊ីខាវឌូ ដែល​គាំទ្រខាង​រដ្ឋាភិបាល និងគាំទ្រខាងក្រុមរោងចក្រហ្នឹង មានការចាត់វិធានការភ្លាមៗ ដោយតុលាការរាជធានី។»

លោក អាត់ ធន់ បានទម្លាក់ ការទទួលខុសត្រូវ នៃការដាក់ពាក្យបណ្ដឹង របស់អតីតមន្ត្រីស្ថាបនិក របស់​សហជីព​លោក ថាមានបំណងចង់ឲ្យស៊ីខៅឌូ ធ្លាក់ចុះខ្សោយ។ លោកបាននិយាយថា «រឿងកម្មករអ៊ីហ្គាមិន វាជារឿង​ឯក​ជន​របស់គាត់។ តែរឿងសំខាន់គឺរឿងយកលសរបស់ពួកហ្នឹង ដើម្បី​ធ្វើអោយវាធំ ដើម្បីបង្ករឿង ឱ្យ​ស៊ីខៅឌូធ្លាក់ចុះ ព្រោះ​អីពួកយើងកំពុងទាមទារប្រាក់ឈ្នួល ជំរុញអោយដោះស្រាយ​រឿង​អ្នកទាំង​២១នាក់ និងមាន​ទាមទារអីៗខាង​មុខ​ទៀត។»

លោក អាត់ ធន់ បាននិយាយទៀតថា សកម្មភាពរបស់អតីតមន្ត្រីសហជីពទាំងពីរ ដែលត្រូវបានសហជីព​បណ្ដេញ​ចេញនោះ មានអ្នក«នៅពីក្រោយខ្នង»។ លោកបានថ្លែងទៀតថា៖ «ដូចជារឿងរោងចក្រអ៊ែសអ៊ិល​ ដែល​ចប់អស់​ហើយ ប្តឹងយើងឡើងវិញទៀត។ អញ្ចឹងបានន័យថា យើងអាចបញ្ជាក់ដឹងហើយថា អ្នកណានៅពីក្រោយ​ខ្នង។»

សម្រាប់លោក អ៊ុំ វិសាល វិញ បានថ្លែងឆ្លើយតបនឹងការចោទប្រកាន់ខាងលើថា លោកមានបង្អែករបស់លោក នោះ គឺច្បាប់​របស់​ស៊ីខៅឌូ និង​ភស្តុតាងដែលលោកមាន។ លោកបានចង្អុលត្រឡប់ទៅវិញថា គឺលោក អាត់ ធន់ នេះ​ហើយ ជា​អ្នក​បំបែកបំបាក់។ លោក និយាយថា «ខ្ញុំមិនអាចនៅស្ងៀមទេ បើសិនលោកឯងចាត់វិធានការណ៍ខ្ញុំ»៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី២២ មេសា ២០១៤