«នៅសហរដ្ឋអាមេរិក យើងមានបញ្ហាក្នុងការងារ អស់រយៈពេល រាប់សតវត្សមកដែរ។ ជាលទ្ធផល នៅពេល​នេះ យើងមានក្រុមអាជ្ញាកណ្តាល ​មួយចំនួន ដើម្បីជួយដោះស្រាយជម្លោះ ជៀសជាងការធ្វើកូដកម្ម និងការ​ដែលថៅកែបិទរោងចក្រ ហើយកម្មករ មិនព្រមធ្វើការ។» នេះជាការលើកឡើង របស់អ្នកស្រី រីបាកា ប្លេក (Rebacca Black) ប្រធានភ្នាក់ងារ USAID នៅក្នុងកម្មវិធីប្រកាស ស្តីពីជំនួយឧបត្ថម្ភរបស់ USAID ផ្តល់​ជា​មូលនិធិ ដល់ក្រុមប្រឹក្សា អាជ្ញាកណ្តាលកម្ពុជា សម្រាប់កម្មវិធី «លើកម្ពស់សិទ្ធការងាររបស់ស្ត្រី និងបុរស​នៅ​កម្ពុជា» នារសៀលថ្ងៃទី ៦ ខែសីហា ឆ្នាំ២០១៥ នេះ។

នៅក្នុងការពិភាក្សា លើការផ្តល់នូវការស្វែងរក ដំណោះស្រាយ នៃជម្លោះ ប្រកបដោយយុត្តិធម៌ តម្លាភាព និង​សន្តិភាពនោះ អ្នកស្រី រីបាកា ប្លេក បានសម្ដែងនូវសេចក្តីសង្ឃឹមថា មូលនិធិរបស់ USAID ជូនដល់ ក្រុមប្រឹក្សា​អាជ្ញាកណ្តាលនេះ ត្រូវបានចាត់ទុកជាគំរូ និងជាក្តីសង្ឈឹម ដល់ប្រទេសកម្ពុជា ពិសេសកម្មករ និងនិយោជក ប្រកបដោយការប្រើប្រាស់ នូវសិទ្ធិសេរីភាព ជាមួយនឹងការទំនាក់ទំនងល្អ ក្នុងការងារ។

អគ្គនាយករង នៃអគ្គនាយកដ្ឋានការងារ របស់ក្រសួងការងារ និងបណ្តុះបណ្តាលវិជ្ជាជីវៈ លោក អ៊ិន ខេមរា បាន​ថ្លែងរំលឹកថា ក្រុមប្រឹក្សាអាជ្ញាកណ្តាល ជាស្ថាប័នជាតិមួយ កើតឡើងនៅឆ្នាំ២០០៣ ដែលបាន​ដើរតួនាទី​យ៉ាងចម្បង ក្នុងការជួយភាគីកម្មករនិយោជត និងនិយោជក ក្នុងការដោះស្រាយវិវាទការងាររួម។

លោក ខេមរា បានបន្តថា មកដល់ពេលនេះ សំណុំរឿងវិវាទ ដែលទទួលបាន មានចំនួន ២.២៧៥ ដែលក្នុង​នោះវិវាទ មកពីវិស័យផ្សេងៗដូចជា វិស័យវាយណភណ្ឌកាត់ដេរ និងស្បែកជើង, សេវាកម្មដឹកជញ្ជូន, សេវាកម្ម​សន្តិសុខ, ក្រុមហ៊ុនផលិតភេសជ្ជៈ, ក្រុមហ៊ុនប្រេងឥន្ធនៈ, ក្រុមហ៊ុនផលិតស៊ីម៉ងត៍, ក្រុមហ៊ុនដំណាំកៅស៊ូ, ក្រុមហ៊ុន​ផលិតគ្រឿងអេឡិចត្រូនិចជាដើម។

អគ្គនាយករង នៃអគ្គនាយកដ្ឋានការងារ បានបញ្ជាក់ថា៖ «ពង្រឹងយន្តការដោះស្រាយវិវាទការងារ តាំងពី​ចាប់​ផ្តើម រហូតដល់ការដោះស្រាយ នៅក្រុមប្រឹក្សាអាជ្ញាកណ្តាល។ (...) រក្សានិរន្តរភាពក្រុមប្រឹក្សាអាជ្ញា​កណ្តាល។ តាមរយៈការដោះស្រាយវិវាទការងារ នៅក្រុមប្រឹក្សាអាជ្ញាកណ្តាល សិទ្ធិរបស់កម្មករ និងនិយោជិក ត្រូវ​បាន​លើក​កំពស់ ស្របតាមបទបញ្ញត្តិច្បាប់ ស្តីពីការងារ។»

ឯនាយកប្រតិបត្តិស្តីទី នៃមូលនិធិក្រុមប្រឹក្សាអាជ្ញាកណ្តាល លោក ម៉ែន និម្មិត បានថ្លែងថា ក្នុងរយៈកាល​កន្លងមកនេះ ជំនួយរបស់ USAID បានចូលរួម ក្នុងការលើកកំពស់សិទ្ធិការងារ នៅកម្ពុជា ពិសេសដល់ស្រ្តីនៅ​កម្ពុជា។ លោកបានទទួលស្គាល់ថា តាមរយៈមូលនិធិនេះ នាពេលលកន្លងមក ក៏បានជម្រុញ ទ្រទ្រង់ និង​ស្ថាបនា នូវដល់ក្រុមប្រឹក្សាអាជ្ញាកណ្តាលនេះឡើង។

លោក ម៉ែន និម្មិត បានថ្លែងឲ្យដឹងថា៖ «បន្តជំនឿទុកចិត្តរបស់ USAID មកលើប្រព័ន្ធដោះស្រាយវិវាទការងារ របស់ក្រុមប្រឹក្សាអាជ្ញាកណ្តាល ដែលប្រកបដោយប្រសិទ្ធភាព តម្លាភាព និងឯករាជភាព។ ការជួយជ្រោម​ជ្រែង ដើម្បីឲ្យក្រុមប្រឹក្សាអាជ្ញាកណ្តាល អាចសម្រេចបាននូវនិរន្តរភាព។ ក្រុមប្រឹក្សាអាជ្ញាកណ្តាល មានមោទន​ភាព ក្នុងការបន្តកិច្ចសហប្រតិបត្តិការជាមួយ USAID ព្រមទាំងក្រសួងការងារ សហជីពកម្មករ សមាគម​និយោជក និងភាគីពាក់ព័ន្ធជាច្រើនទៀត។»

សូមបញ្ជាក់ថា គម្រោង «លើកម្ពស់សិទ្ធិការងារ របស់ស្ត្រី និងបុរសនៅកម្ពុជា» មានរយៈពេល ៣ឆ្នាំ និង​ត្រូវ​ចំណាយប្រាក់ ចំនួន៧សែនដុល្លារអាមេរិក។ គម្រោងនេះ ធ្វើការទៅលើ ដំណោះស្រាយជម្លោះ ក្នុងការងារ, តស៊ូមតិដើម្បីសិទ្ធិ និងសេរីភាព លទ្ធភាពរបស់កម្មករ និយោជិតទទួលសេវានានា ជាទីទុកចិត្ត, និងនិរន្តរភាព​ស្ថាប័ននៃក្រុមប្រឹក្សាអាជ្ញាកណ្តាលជាដើម។

រីឯក្រុមប្រឹក្សាអាជ្ញាកណ្តាលវិញ ក្នុងឆ្នាំ២០១៤ ទទួលបានពាក្យបណ្តឹង ចំនួន៣៦០។ មកដល់ខែសីហា ឆ្នាំ​២០១៥ ពាក្យបណ្តឹងជិត២០០ ត្រូវបានក្រុមប្រឹក្សាអាជ្ញាកណ្តាល ទទួលមកដោះស្រាយ ក្នុងនោះភាគច្រើន ជាវិវាទបែបប្រាក់ខែ និងវិវាទ នៃការបញ្ឈប់បុគ្គលិកជាដើម៕