អគ្គនាយកអគ្គិសនីកម្ពុជា សុំពេលពីរសប្តាហ៍ដើម្បីទិញសម្ភារៈ ពីប្រទេសដ៏ទៃ
- ដោយ: ក. សោភណ្ឌ អត្ថបទ និងយកការណ៍៖ ក.សោភ័ណ្ឌ ([email protected]) - ភ្នំពេញថ្ងៃទី១៤ មករា ២០១៥
- កែប្រែចុងក្រោយ: January 15, 2015
- ប្រធានបទ: កម្មករ
- អត្ថបទ: មានបញ្ហា?
- មតិ-យោបល់
-
ដើម្បីជួយសំរួលដល់ការប្រើប្រាស់ភ្លើង របស់កម្មករកម្មការិនី ទៅតាមអ្វីដែលលោក ហ៊ុន សែន នាយករដ្ឋមន្ត្រីបានថ្លែងឡើងកន្លងមកនោះ អគ្គសនីកម្ពុជាបានបង្ហាញឲ្យដឹងថា ខ្លួនកំពុងចាត់វិធានការទៅលើករណីនេះហើយ។ ប៉ុន្តែដោយសារតែមានបញ្ហាផ្នែក«បច្ចេកទេស» ស្ថាប័នស្វ័យតមួយនេះសុំឲ្យគេទុកពេលឲ្យខ្លួន ចំនួនពីរសប្ដាហ៍ទៀតសិន។
លោក កែវ រតនៈ អគ្គនាយកអាជ្ញាធរអគ្គិសនីកម្ពុជា បានថ្លែងកាលពីថ្ងៃចន្ទថា ក្នុងពេលឆាប់ៗនេះ កម្មករកម្មការិនីដែលធ្វើការនៅភ្នំពេញ នឹងទទួលបានការបញ្ចុះតម្លៃអគ្គិសនី មកត្រឹម៦១០រៀល ប្រសិនបើប្រើប្រាស់ក្រោម៥០គីឡូវ៉ាត់ក្នុងមួយខែ។ លោកមានប្រសាសន៍ថា ខាងអគ្គិសនី នឹងជួយសម្រូលដល់កម្មករ ដោយមិនឲ្យកម្មករទាំងនោះ មកបំពេញឯកសារនៅទីតាំងអគ្គិសនីនោះទេ គឺក្រុមការងាររបស់អគ្គិសនីកម្ពុជានឹងចុះទៅផ្ទាល់ដើម្បីបំពេញទម្រង់បែបបទផ្សេងៗ នឹងតភ្ជាប់ភ្លើងឲ្យតែម្តង។ ជាពិសេសស មិនឲ្យប៉ះពាល់ដល់ម៉ោងកាងារ របស់កម្មករទៀតផង និងមានការទាក់ទងភ្លាមៗដោយសេរី នៅពេលមានបញ្ហាក្នុងការប្រើប្រាស់។
ចំពោះការសុំពន្យាពេលពីរសប្តាហ៍នេះ ត្រូវបានអគ្គនាយកអាជ្ញាធរអគ្គិសនីកម្ពុជារូបនេះអះអាងថា នឹងរកទិញសម្ភារៈអគ្គិសនីមួយចំនួន ដែលមានគុណភាពខ្ពស់ សម្រាប់ប្រជាជនកម្ពុជា។ ដោយទិញរបស់អស់ទាំងនោះពីក្រៅប្រទេស ក្នុងគម្រោងនៃការចមណាយជាងពីរ លានដុល្លា លោក កែវ រតនៈ បានថ្លែងឡើងថា៖ «ថវិកាមានហើយ តែយើងត្រូវការពេលវេលាដើម្បីធ្វើ»។
កម្មការនីម្នាក់ ស្រី ច័ន្ទ ធ្វើការនៅក្នុងរោងចក្រមួយ នៅចក្រអង្រែលើ នៅក្នុងរាជធានីភ្នំពេញ បានឲ្យទស្សនាវដ្ដីមនោរម្យ.អាំងហ្វូដឹងថា នាងសប្បាយចិត្តខ្លាំងណាស់ បើសិនជានាយករដ្ឋមន្ត្រី និង អគ្គនាយកអាជ្ញាធរអគ្គិសនី អនុវត្តន៍បានយ៉ាងដូច្នេះ នាងសង្ឃឹម នឹងរំពឹងចាំ ហើយទទួលយកដោយរីករាយ។ នាងថាទោះជារាល់ថ្ងៃ នាងមិនសូវប្រើភ្លើងអស់ច្រើនក៏ដោយ ក៏វាបានកាត់បន្ថយមួយចំណែកដែរ ពីការចុះតម្លៃភ្លើងនេះ។
ស្រដៀងគ្នានេះដែរ សេចក្ដីថ្លែងការណ៍របស់សម្ពន្ធ័សហជីពចលនាកម្មករ ដែលចុះផ្សាយថ្ងៃទី១៣ ខែមករា ឆ្នាំ២០១៥ ក៏បានស្វាគមន៍ចំពោះការបញ្ចុះតម្លៃអគ្គិសនីនេះដែរ។ សេចក្ដីថ្លែងការណ៍បានបន្ដថា បច្ចុប្បន្ននេះ កម្មករនយោជិតបានចំណាយថ្លៃអគ្គិសនី ចន្លោះពី២០០០រៀលទៅ២៥០០រៀលក្នុងមួយគីឡូវ៉ាត់ តាមការកំណត់តម្លៃរបស់ម្ចាស់ផ្ទះជួល។
គួររំលឹកថា លោកនាយករដ្ឋមន្ត្រី ហ៊ុន សែន បានអះអាងថា កម្មករមានចំនួនប្រមាណ១៥០០០០នាក់ ដែលបានជួលផ្ទះដើម្បីស្នាក់នៅ ពេលបំពេញការងារក្នុងរាជធានីភ្នំពេញ ក្នុងនោះអាចមានអ្នកជួលដល់៣០០០០បន្ទប់។លោកនាយករដ្ឋមន្រ្តីបានថ្លែងថា ចាប់ពីឆ្នាំ២០១៥ ដល់ឆ្នាំ២០២០ រាជរដ្ឋាភិបាលនឹងបញ្ចុះតម្លៃអគ្គិសនីជាបន្តបន្ទាប់ ចាប់ពី៨២០រហូតដល់៧៣០រៀល ក្នុងមួយគីឡូវ៉ាត់ម៉ោង ដើម្បីទាក់ទាញវិនិយោគ និងសម្រួលដល់តម្រូវការចាំបាច់ក្នុងជីវភាពរស់នៅរបស់ពលរដ្ឋ៕