ករណីបង្កការភ្ញាក់ផ្អើល ដោយពូម្នាក់បានលេង ជាមួយក្មួយប្រុស បណ្តាលឲ្យស្លាប់នេះ បានកើតឡើង កាលពី​វេលាម៉ោង ៣ និង៥០នាទីរសៀលថ្ងៃទី ០៦ ខែសីហា ឆ្នាំ២០១៥ នៅភូមិត្រពាំងស្វាយ សង្កាត់ព្រែកកំពឹស ខណ្ឌ​ដង្កោ រាជធានី​ភ្នំពេញ។ តាមការបញ្ជាក់ ពីមេភូមិព្រែកកំពឹស លោក គីម ស្រ៊ុន ពីក្នុងពេល​ពិធីបុណ្យសព ក្មេងប្រុសខាងលើ នៅថ្ងៃទី០៧ ខែសីហា​នេះ បានឲ្យដឹងថា កុមារារងគ្រោះឈ្មោះ កាន់ សុខហេង អាយុ ៧ឆ្នាំ រស់នៅ​ជា​មួយឪពុកម្តាយ ក្នុងទីតាំងកើតហេតុខាងលើ។

មេភូមិរូបនេះ បានបញ្ជាក់បន្ថែមថា លោកមិនបានដឹងច្បាស់ថា ការបាញ់ខ្យល់ចូល ក្នុងខ្លូនកុមារងគ្រោះ តាម​ណានោះទេ នៅផ្ទះកើតហេតុអ្នកខ្លះនិយាយថា បាញ់ចូលលតាមរន្ធគូទ ខ្លះនិយាយថាបាញ់ចូលតាមមាត់ ដោយ​​គេនៅមិនទាន់បានចម្លើយសារភាព ពីបុរសជាពូជីដូនមួយ ដែលជាជនបង្កនៅឡើយ។ តាម​ប្រសាសន៍ របស់មន្រ្តីនគរបាលប៉ុស្តិ៍ព្រែកកំពឹស លោក ផា សំណាង ប្រាប់ទស្សនាវដ្តីមនោរម្យ.អាំងហ្វូថា ជន​បង្ក​ឈ្មោះ ទិត្យ ម៉ាក អាយុ ៣២ឆ្នាំ ជាជាងប៉ះកង់ឡាន រស់នៅភូមិជាមួយកុមារងគ្រោះនោះ ដែលត្រូវជាពូជីដូនមួយ។

មន្ត្រីនគរបាលប៉ុស្ដិ៍ដដែល បានថ្លែងឲ្យដឹងទៀតថា ក្រោយកើតហេតុ សមត្ថកិច្ចបានចុះទៅសួរនាំ និង​ធ្វើ​កំណត់​ហេតុ រួចបានបញ្ជូនឪពុកមារ លេងសើចខុសរឿងរូបនេះ ទៅកាន់ខណ្ឌដង្កោរ។ យ៉ាងណាក៏ដោយ គេ​នៅមិនទាន់ដឹងពីការការបាញ់ខ្យល់ បញ្ជូលក្នុងពោះកុមារារងគ្រោះ រហូតដល់ស្លាប់នេះ តាមផ្លូវខាងណា​នោះ​ទេ ប៉ុន្តែសម្រាប់ការសន្នីដ្ឋានជំហ៊ានដំបូង បានអះអាងថា ខ្យល់ត្រូវបានបាញ់ចូល តាមប្រហោងគូទ។

រីឯលោក ជុំ ឈាង ចៅសង្កាត់ព្រែកកំពឹស បានអះអាងទៀតថា មកទល់ពេលនេះ ជនបង្កជាពូជីដូនមួយ ត្រូវ​បានឃាត់ខ្លូន បន្ទាប់ពីធ្វើការត្រួតពិនិត្យ ទៅលើសាកសពរួច។ លោកថា បច្ចុប្បន្នឈ្មោះ ទិត្យ ម៉ាក ត្រូវ​បាន​បញ្ជូនខ្លូន ទៅកាន់ការិយាល័យខណ្ឌដង្កោហើយ ដើម្បីស៊ើបសួរបន្ថែម៕