រថយន្ដដែលរងការខូចខាត ត្រូវបានស្គាល់ថា មានម៉ាក ជ្ជិហ្វ បើកបរដោយបុរសម្នាក់ មិនស្គាល់​អត្តសញ្ញាណ បើកនៅតាមបណ្តោយផ្លូវ ចូលទៅបុរី ខេមកូស៊ីធី ក្នុងសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។ ករណី​នេះ បានបង្ករការភ្ញាក់ផ្អើល កាលពីវេលា ម៉ោង១១ យប់ថ្ងៃទី ៣០ ខែកក្កដា ឆ្នាំ២០១៥។ ក្នុងនោះ រថយន្តមួយ​គ្រឿងខាងលើ បានរងការខូចខាត ដោយឆេះផ្ទុះចេញ ជាភ្លើង ខ្លោចខ្ចេចគ្មានសល់ ផ្នែកសោភណ័ភាពខាង​ក្រៅ។

អ្នកឃើញហេតុការណ៍ម្នាក់ បានប្រាប់ឲ្យដឹងថា ហេតុការណ៍នេះ មិនទាន់មានអ្នកណាម្នាក់ អាចបញ្ជាក់ថា មក​ពីមូលហេតុអ្វីនោះទេ។ ប៉ុន្តែនៅពេលកើតហេតុ អ្នកនៅជិតហេតុការណ៍ បានឃើញបុរសអ្នកបើករថយន្ត រត់​គេច​ចេញ ពីឡានរបស់ខ្លូន ដោយសុវត្តិភាព។ សាក្សីបានអះអាងទៀតថា ឡានខាងលើ ត្រូវបានផ្ទុះ​ឆេះខ្ទេច​ភ្លាមៗ ដោយគ្មានមូលហេតុ ខណៈដែលអ្នកបើកបរ នៅខាងក្នុង កំពុងបញ្ជាយានយន្ដ។

តាមការបញ្ជាក់ របស់មន្រ្តីចរាចរណ៍រាជធានីម្នាក់ ដែលបានទៅដល់ក ន្លែងកើតហេតុ ក្រោយពេលភ្លើងឆេះ​នោះ បាន​ឲ្យដឹងថា ឡានដែលផ្ទុះឆេះ នៅសល់តែគ្រោងឆ្អឹងប៉ុណ្ណោះ ចំណែកម្ចាស់ ក៏មិនត្រូវបានសមត្ថកិច្ច រកឃើញអត្តសញ្ញាណដែរ។ បន្ទាប់ពីមានការអន្តរាគមន៍ ពីមន្រ្តីមានសមត្ថកិច្ច ភ្លើងដ៏សន្ធោសន្ធៅ​ត្រូវបាន​រលត់ ហើយរថយន្ដត្រូវបានស្ទូច បញ្ជូនទៅទុកជាវត្ថុតាង រងចាំម្ចាស់ទៅធ្វើការដោះស្រាយ៕