ការវាយប្រហារ ដោយពាក្យសំដី នៃអ្នកតំណាងរាស្រ្តពីរនាក់ មកពីគណបក្សផ្សេងគ្នា បានធ្វើឲ្យល្បីរន្ទឺរ កក្រើក​ពេញពិភពកម្ពុជា ព្រោះម្ខាង ចង់ការពារប្រធានរដ្ឋសភា និងម្ខាងទៀត ចោទប្រកាន់ប្រធានរដ្ឋសភា ថា​បាន​រំលោភរដ្ឋធម្មនុញ្ញ។

នៅក្នុងសន្និសីទសារព័ត៌មាន កាលពីថ្ងៃទី១៧ ខែកក្កដានេះ លោក ឈាង វុន តំណាងរាស្ត្រ មកពីគណបក្ស​ប្រជាជនកម្ពុជា អ្នកនាំពាក្យ និងជាប្រធានគណៈកម្មការ កិច្ចការបរទេស សហប្រតិបត្តិការអន្តរជាតិ ឃោសនាការ និង​ព័ត៌មាន​នៃរដ្ឋសភា បានចោទប្រកាន់តំណាងរាស្រ្តមួយរូប មកពីគណបក្សសង្គ្រោះជាតិ ពីករណី«ថ្លើមធំ» ប៉ុនប៉ងប្តឹងប្រធានរដ្ឋសភា លោក ហេង សំរិន ទៅក្រុមប្រឹក្សាធម្មនុញ្ញ។ លោកថា បើតំណាង​រាស្រ្ត អ៊ុំ សំអាន ដែលល្បីខាងបញ្ហាព្រំដែននោះ មិនដកចិត្ត មិនដកបណ្តឹង ប្តឹងប្រធានរដ្ឋសភានោះទេ គណៈ​កម្មាធិការអចិន្ត្រៃយ៍រដ្ឋសភា នឹងធ្វើការជំនួសសភាពេញអង្គ ដើម្បីឈានទៅដកអភ័យឯកសិទ្ធិសភា ពីលោក អ៊ុំ សំអាន មុននឹងប្រគល់លោក ឲ្យទៅតុលាការកម្ពុជាកាត់ទោស។

» សូមអានអត្ថបទដែលទាក់ទងឡើវិញ ដោយចុចនៅលើទីនេះ។

ប៉ុន្តែ ការថ្លែងព្រមាន នៅសន្និសីទសារព័ត៌មាន របស់លោក ឈាង វុន មិនអាចទុកឲ្យលោក អ៊ុំ សំអាន បិត​មាត់​សង្កត់ចិត្ត នៅស្ងៀមមិនតបតរនោះទេ។ តំណាងរាស្ត្រមកពីគណបក្សប្រឆាំង បានសរសេរតប នៅលើ​ទំព័រ​ហ្វេសប៊ុក របស់លោកវិញថា៖ «លោក ឈាង វុន ព្រមានព្យួរអភ័យឯកសិទិ្ធ តំណាងរាស្រ្តរបស់ខ្ញុំ។ សូម​លោក ឈាង វុន មើលមាត្រា៨០នៃ​រដ្ឋធម្មនុញ​ផង។»

មាត្រា ៨០ នៃរដ្ឋធម្មនុញ្ញចែងថា៖ «តំណាងរាស្ត្រ មានអភ័យឯកសិទ្ធិសភា។ តំណាងរាស្ត្ររូបណាក៏ដោយ មិន​អាចត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុពីបានសំដែងយោបល់ ឬបញ្ចេញមតិ ក្នុង​ការ​បំពេញមុខងាររបស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួន សមាជិកណា​មួយ​នៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍ របស់​រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែង។ ក្នុង​ករណី​ខាងក្រោយនេះ ក្រសួងមានសមត្ថកិច្ច ត្រូវធ្វើសេចក្ដីរាយការណ៍ជូនរដ្ឋសភា ឬជូនគណៈកម្មាធិការ​អចិន្ត្រៃយ៍ របស់រដ្ឋសភាជាបន្ទាន់ ដើម្បីសម្រេច។ សេចក្ដីសម្រេច របស់គណៈកម្មាធិការអចិន្ត្រៃយ៍​របស់​រដ្ឋសភា ត្រូវដាក់ជូនសម័យប្រជុំរដ្ឋសភាខាងមុខ ដើម្បីអនុម័តតាមមតិភាគច្រើន ពីរភាគបីនៃសមាជិក​រដ្ឋសភា​ទាំងមូល។ ក្នុងករណីទាំងអស់ខាងលើនេះ ការឃុំខ្លួន ការចោទប្រកាន់តំណាងរាស្ត្រណាមួយត្រូវផ្អាក ប្រសិន​បើរដ្ឋសភាបានបញ្ចេញមតិឱ្យផ្អាក តាមមតិភាគច្រើនបីភាគបួន នៃចំនួនសមាជិករដ្ឋសភាទាំងមូល។»

សូមរំលឹកថា នៅក្នុងរយៈពេលចុងក្រោយនេះ ក្រុមអ្នកតំណាងរាស្រ្ត មកពីគណបក្សសង្គ្រោះជាតិ ពិសេស​លោក អ៊ុំ សំអាន បានធ្វើការ​ចោទប្រកាន់ប្រធានរដ្ឋសភា លោក ហេង សំរិន ថា បានរំលោភមាត្រា៩៦ និង​មាត្រា​១៥០ថ្មី នៃរដ្ឋធម្មនុញ និងរំលោភប្រការ ៣២នៃបទបញ្ជាផ្ទៃក្នុងរដ្ឋសភា ម្តងជាពីរដង។ លោក អ៊ុំ សំអាន បានលើកឡើងថា ក្នុងលិខិតរបស់លោក រួមជាមួយតំណាងរាស្រ្តចំនួន៧នាក់ កាលពីថ្ងៃទី១០ ខែកកក្កដា ឆ្នាំ​២០១៥ ស្នើទៅកាន់ឲ្យលោក ហោ ណាំហុង កោះហៅលោកឯកអគ្គរដ្ឋទូតវៀតណាម ប្រចាំកម្ពុជា មកបំភ្លឺ​រឿង​យួនបង្កហឹង្សា លើខ្មែរនៅជាយដែន និងការរំលោភដីខ្មែរ តាមរយៈរដ្ឋសភា តែត្រូវបានលោក ហេង សំរិន ទុក​ចោល មិនចុះហត្ថលេខារហូតដល់១០ថ្ងៃ។ លោកបានថ្លែងទៀតថា តាមរដ្ឋធម្មនុញ្ញ យ៉ាងយូរលិខិត របស់​តំណាង​រាស្រ្ត អាចទុកបានត្រឹមតែ៣ថ្ងៃប៉ុណ្ណោះ ត្រូវបញ្ជូនចេញពីដៃប្រធានរដ្ឋសភា។

អមជាមួយលិខិតនោះ ដែលបានបង្ហោះ នៅលើទំព័រហ្វេសប៊ុករបស់លោក តំណាងរាស្រ្តរូបនេះ បាន​សរសេរ​ថា៖ «លិខិតនេះ បានដាក់ជូនសម្តេច១០ថ្ងៃហើយ មិនទាន់ឃើញសម្តេចស៊ីញ៉េ វាយត្រាបញ្ជូនទៅ​រដ្ឋាភិបាល នៅឡើយទេ។ តាមធម្មតាលិខិតមួយ ចំណាយពេលពី២ ទៅ៣ថ្ងៃប៉ុណ្ណោះ សម្រាប់ស៊ីញ៉េបោះត្រា។ សម្តេច​ធ្វើ​ប្រធានសភា តាំងពីឆ្នាំ២០០៦មក គឺ៩ឆ្នាំហើយ។ ក្នុង១ខែ សម្តេចបដិសេធមិនបញ្ជូនលិខិត យ៉ាងតិច​លិខិត៤ ក្នុង១ខែ។ ដូច្នេះ៩ឆ្នាំ បដិសេធ មិនបញ្ជូនលិខិតតំណាងរាស្រ្ត យ៉ាងតិច ៤៣២លិខិត។»

លោកបានធ្វើការចោទប្រកាន់ ប្រធានរដ្ឋសភាថា៖ «ការបដិសេធ មិនបញ្ជូនលិខិតតំណាងរាស្រ្ត គឺជាការ​រំលោភសិទ្ធិតំណាងរាស្រ្ត និងសិទ្ធិប្រជាពលរដ្ឋ។ ព្រោះប្រជាពលរដ្ឋ យ៉ាងតិច៥ម៉ឺននាក់ បាន​បោះឆ្នោតឲ្យ​តំណាងរាស្រ្តម្នាក់។ ហើយសំណើរបស់ប្រជាពលរដ្ឋ តាមរយៈតំណាងរាស្រ្ត ត្រូវបានផ្អាប់ទុក។ តំណាង​រាស្រ្ត គួរតែពិចារណារឿងនេះ កុំទុកឲ្យគេរំលោភសិទ្ធិទៀត។ សិទ្ធិតំណាងរាស្រ្ត ត្រូវបានគេរំលោភ ចុះទំរាំសិទ្ធិ​ប្រជា​ពលរដ្ឋ ត្រូវបានគេរំលោភយ៉ាងណា?»

ទស្សនាវដ្តីមនោរម្យ.អាំងហ្វូមិនអាចស្វែងរកប្រតិកម្ម ត្រឡប់ពីអ្នកនាំពាក្យរដ្ឋសភាបានទេ ក្នុងថ្ងៃទី២១ ខែ​កក្កដា ឆ្នាំ២០១៥នេះ៕