ចាប់ខ្លួនយុវជនស្លៀកពាក់អ្នកទោស បង្កការភ្ញាក់ផ្អើលនៅបរទេស!
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី២៧ កក្កដា ២០១៥
- កែប្រែចុងក្រោយ: July 28, 2015
- ប្រធានបទ: ច្បាប់ NGO
- អត្ថបទ: មានបញ្ហា?
- មតិ-យោបល់
-
ការចាប់ខ្លួនយុវជនទាំង៦នាក់ ដែលបានសម្ដែងការតវ៉ារបស់ពួកគេ ដោយស្លៀកពាក់ ជាអ្នកទោសមានច្រវ៉ាក់ ជាប់នឹងជើងនោះ បានបង្កការចាប់អារម្មណ៍ ពីសារព័ត៌មាននានា នៅបស្ចឹមលោក នៅក្នុងប៉ុន្មានថ្ងៃនេះ បន្ទាប់ពីសំនុំរឿង វាយតប់ទាត់ធាក់ របស់លោកឧកញ៉ា សុខ ប៊ុន ទៅលើតារាទូរទស្សន៍ កញ្ញា សាសា កាលពីដើមខែកក្កដានេះ។ ការស្លៀកពាក់ ជាអ្នកទោស ដែលយុវជនទាំង៦នាក់ អះអាងចង់បង្ហាញថា ច្បាប់គ្រប់គ្រង សមាគម និងអង្គការក្រៅរដ្ឋាភិបាល នឹងក្លាយជាអាវុធដ៏មុតស្រួច ផ្ដល់ទៅឲ្យរដ្ឋាភិបាល ដើម្បីរឹតត្បិតសេរីភាពរបស់ពួកគេនោះ មិនបានធ្វើឲ្យអាជ្ញាធរ រដ្ឋាភិបាល ដែលដឹកនាំដោយលោក ហ៊ុន សែន សប្បាយចិត្តនោះទេ ដែលខុសពីការសម្លឹងមើល ដោយក្រសែភ្នែកនានា នៅបស្ចឹមលោក ចាត់ទុកកាយវិការនេះ ថាជាការឆ្នៃប្រឌិតមួយ ជំនួសឲ្យពាក្យសម្ដី និងការគិតរបស់ក្រុមយុវជន។
សារព័ត៌មាននៅក្នុង បណ្ដាប្រទេសអ៊ឺរ៉ុបខាងលិច យ៉ាងហោចណាស់៣ (បារាំង ប៊ែលហ្សិក ស្វីស) បានយកអត្ថបទរាយការណ៍ របស់ទីភ្នាក់ងារសារព័ត៌មានបារាំង អាអេហ្វប៉េ (AFP) មករៀបរាប់បន្តថា ការចាប់ខ្លួនក្រុមយុវជន ដែលមាន៥នាក់ជាបុរស ម្នាក់ជាស្ត្រីនោះ ត្រូវបានដោះលែងមកវិញ បន្ទាប់ពីត្រូវបានអាជ្ញាធរខណ្ឌ ចាប់ពួកគេយកទៅសាកសួរ និងឲ្យធ្វើកិច្ចសន្យា ឈប់បង្កការរំខាន ដល់សណ្ដាប់ធ្នាប់សាធារណៈ នៅពេលក្រោយទៀត ដោយគ្មានការអនុញ្ញាត។ លោក អំ សំអាត មន្រ្តីស៊ើបអង្កេតជាន់ខ្ពស់ នៃអង្គការការពារសិទ្ធិមនុស្ស លីកាដូ (Licadho) ក៏ត្រូវបានដកស្រង់សម្ដី របស់សារព័ត៌មានទាំងនោះ យកមកចុះផ្សាយ ដោយលោកបានអះអាង ថាពិតជាមានការឃាត់ខ្លួន យុវជនទាំង៦នាក់នោះ ដើម្បីនាំទៅសាកសួរមែន។
ក្រុមសារព័ត៌មានបានដកស្រង់សំដីលោក ឡុង ឌីម៉ង់ មកសរសេរដែរថា ការចាប់ខ្លួននេះ បណ្ដាលមកពីយុវជនទាំង៦នាក់ បានធ្វើការតវ៉ា ដោយគ្មានការអនុញ្ញាត។
ច្បាប់គ្រប់គ្រង អង្គការសង្គមស៊ីវិលនេះ បានបង្កឲ្យមាននូវការជំទាស់តវ៉ា ជាច្រើនពីសំណាក់អង្គការសមាគម ដែលធ្វើការងាររបស់ពួកគេផ្នែកមនុស្សធម៌ នៅក្នុងប្រទេសកម្ពុជា ដោយទទួលបានជំនួយ ពីក្រៅប្រទេស។ សារព័ត៌មាននៅលោកខាងលិច បានសរសេររាយការណ៍ទៀតថា អង្គការអន្តរជាតិធំៗ ប្រមាណជាង១០ ក្នុងនោះមាន អង្គការលើកលែងទោសអន្តរជាតិ អង្គការឃ្លាំមើលសិទ្ធិមនុស្ស និងអង្គការតម្លាភាពអន្តរជាតិផង បានអំពាវនាវ ឲ្យរដ្ឋាភិបាលលោក ហ៊ុន សែន ឲ្យទម្លាក់ចោល សេចក្ដីព្រាងច្បាប់នេះ។
សូមបញ្ជាក់ជូនដែរថា យុវជនទាំងប្រាំមួយនាក់ ដែលបានចាប់ខ្លួន កាលពីថ្ងៃទី២៧ ខែកក្កដានោះ រួមមានបងប្អូន ជុំ ហួរ និង ជុំ ហួត មកពីក្រុមយុវជនមហានគរ។ លោក វឿន រតនា, មួង សូនី និង សឿន វាសនា មកពីសមាគមសម្ព័ន្ធ សិស្សនិស្សិតបញ្ញវ័ន្តខ្មែរ និង កញ្ញា មាស លក្ខិណា មកពីចលនាស្ត្រីគណបក្សសង្គ្រោះជាតិ ខណ្ឌជ្រោយចង្វារ។ ការចាប់ខ្លួននោះ ត្រូវបានក្រុមអាជ្ញាធរចោទប្រកាន់ថា ដោយសារយុវជន មានកំហុសបួនយ៉ាង៖ បង្កហិង្សា, ក្លែងឯកសណ្ឋាន, បាតុកម្មខុសច្បាប់, និងថាមានគណបក្សសង្គ្រោះជាតិ នៅពីក្រោយ។ ពួកគេទាំងប្រាំមួយនាក់ ក៏ត្រូវបាន«បង្ខំឲ្យផ្តិតមេដៃ» ដោយសន្យាថា ឈប់មានការប្រមូលផ្តុំ ដោយគ្មានការអនុញ្ញាត ពីសាលារាជធានីភ្នំពេញ៕
» សូមទស្សនាវីដេអូ ដែលរំលឹកពីព្រឹត្តិការណ៍ នាំការឃាត់ខ្លួន យុវជនទាំង៦រូប ដូចខាងក្រោម៖