ហេតុការណ៍នេះ ជាករណីវ៉ាស្តាំ ដោយមិនបានប្រយ័ត្ន ហើយបានកើតឡើង កាលពីម៉ោង៤ និង៣០ នាទី ល្ងាច​ថ្ងៃទី ១២ ខែកក្កដា ឆ្នាំ២០១៥ នៅតាមបណ្តោយផ្លូវជាតិ លេខ០៥ ត្រង់ចំណុចផ្លូវភ្លោះ ទល់មុខមន្ទីរពេទ្យ​ឯកជន យីហោ កង រចនា។

បើតាមសាក្សី នៅកន្លែងកើតហេតុម្នាក់ លោក ថៃ ធី បានប្រាប់ទស្សនាវដ្តីមនោរម្យ.អាំងហ្វូឲ្យដឹងថា ជន​រង​គ្រោះ ដែលរងរបួសធ្ងន់ជាងគេ ហើយត្រូវបញ្ជូន ទៅពេទ្យកាលម៉ែត្រនោះឈ្មោះ វណ្ណា សាម៉ែន។ លោក ធី បានបន្តទៀតថា ជនរងគ្រោះជិះម៉ូតូឌ្រីម ពណ៍ខ្មៅ ស្លាកលេខ ១W-២៩៧៨ ក្នុងទិសដៅពីជើងទៅត្បូង ក្នុង​ល្បឿនលឿន។ ស្រាប់តែមកដល់កន្លែងកើតហេតុ ម្ចាស់ម៉ូតូ បានជិះវ៉ា ម៉ូតូមួយគ្រឿងទៀត ម៉ាកគុបមិន​ស្គាល់​ស្លាកលេខ បើកបរដោយស្រ្តី មានគ្នាពីរនាក់ ក្នុងទិសដៅស្របគ្នាខាងស្តាំ។ ស្រាប់តែមិនទាន់ផុត ទៅវ៉ាក់​នឹង​ឡាន ហាយឡែឌឺ មួយគ្រឿង ចតនៅចិញ្ចើមផ្លូវ នោះពេញទំហឹង បណ្តាលឲ្យអ្នកបើកម៉ូតូ របួសទាំងសង​ខាង។

តាមការបញ្ជាក់របស់វេជ្ជបណ្ឌិត កង រចនា បានឲ្យដឹងថា ភ្លាមៗនេះ គ្លីនិករបស់លោក ដែលនៅជិតកន្លែង​កើត​ហេតុ មិនអាចទទួល អ្នករបួសធ្ងន់នេះបានទេ ដោយលោក គ្មានឧបករណ៍គ្រប់គ្រាន់ ក្នុង​ការថត (ឆ្លុះ) ដូច​នៅ​ពេទ្យធំ។ ម្យ៉ាងទៀតលោកមាន អ្នកជម្ងឺសង្គ្រោះបន្ទាន់ពីរនាក់ នៅខាងក្នុងហើយ ដូចច្នេះ​លោកទទួលបាន តែ​ស្រ្តីម្ចាស់ម៉ូតូពីរនាក់ និងកូនប្រុសអ្នករងគ្រោះម្នាក់ ប៉ុណ្ណោះ។

វេជ្ជបណ្ឌិតរូបនេះ បានបន្ថែមទៀតថា លោកបានឲ្យគ្រូពេទ្យជំនាញ របស់លោក ទៅធ្វើការសង្គ្រោះបឋម ដល់​ជនរងគ្រោះ ក្នុងពេលដែលលោក កំពុងទាក់ទងទៅឡានពេទ្យ។ ក្រោយពីគ្រោះថ្នាក់៤០នាទី ទើបឡាន​សង្គ្រោះ មកដល់ទីតាំងកើតហេតុ។

អ្នកស្រី ពុទ្ធ សុធី ជាម្ចាស់រថយន្ត ចតនៅលើផ្លូវសារធារណៈនោះ បានចេញមកអះអាងថា ឡានអ្នកស្រី​មិន​បានខុសទេ ព្រោះវានៅស្ងៀម។ អ្នកស្រីថែមទាំងបានទាមទារសំណង ពីជនរងគ្រោះទៀតផង។ បន្ទាប់ពី​ការ​វាស់វែង របស់មន្រ្តីចររាចរណ៍ នៅកន្លែងកើតហេតុ លោក ណុប គីមសុន បានឲ្យដឹងថា ការទាមទារ របស់​ម្ចាស់​ឡាន​ស្លាកលេខភ្នំពេញ ២S-៤០៤៩ ក៏មិនមែនជារឿងត្រឹមត្រូវដែរ ព្រោះបានចតរថយន្ត នៅទីសាធាណៈ​លើសពេលកំណត់។ ចំណែកម្ចាស់ម៉ូតូ ជាជនរងគ្រោះ ក៏មិនមែនត្រូវទាំងស្រុងដែរ ព្រោះបើកលឿន ទាំង​អាការៈ​ស្រវឹង បង្កគ្រោះថ្នាក់ ដល់កូន និងអ្នកដ៏ទៃ។

បច្ចុប្បន្នអ្នករងរបួសធ្ងន់ ត្រូវបានបញ្ជូនទៅមន្ទីពេទ្យកាល់ម៉ែត្រ ចំណែកឯកូនប្រុស អាយុ០៦ ឆ្នាំឈ្មោះ ម៉ែន សុខដែន ស្នាក់នៅមន្ទីរពេទ្យ ជិតកន្លែងគ្រោះថ្នាក់។ ចំណែកឯស្រ្តីរងគ្រោះ ក្នុងហេតុការណ៍នេះដែរ ត្រូវ​បាន​គ្រូពេទ្យប្រាប់ឲ្យដឹងថា ឈ្មោះ ជា សុជាតិតា អាយុ២៣ ឆ្នាំ។ រហូតមកទល់ពេលនេះ នៅមិនទាន់ដោះស្រាយ បានសម្រេចនៅឡើយ។ មន្រ្តីប៉ុស្តិ៍បានដកហូតវត្ថុតាង ទៅកាន់ប៉ុស្តិ៍នគរបាល ដើម្បីរងចាំភាគីទាំងសងខាង ទៅដោះស្រាយតាមច្បាប់ នៅពេលក្រោយ៕