ធម្មយាត្រា និងសិទ្ធិយាត្រា ត្រូវ​បាន​រៀបចំ​ឡើង ដើម្បី​ផ្សព្វផ្សាយ​នូវ​«សេចក្តី​សុខ»​សំខាន់​ចំនួន​៩​យ៉ាង ទៅ​ដល់​ពលរដ្ឋ និង​រដ្ឋាភិបាល​កម្ពុជា សម្រាប់​ចូល​រួម ក្នុង​ទិវា​សិទ្ធិ​មនុស្ស​អន្តរជាតិ ថ្ងៃ​ទី១០ ខែ​ធ្នូ ឆ្នាំ​២០១៤​នេះ។ សារ​សំខាន់​ទាំង​៩នោះ រួម​មាន៖ ការ​មិន​រើស​អើង, រួម​គ្នា​គោរព​សិទ្ធិ​មនុស្ស សន្តិភាព​ផ្តើម​ចេញ​ពី​ខ្លួន​យើង, បញ្ឈប់​អំពើ​ហិង្សា, ការ​មិន​បៀត​បៀន​គ្នា, សិទ្ធិ​ដី​ធ្លី គឺ​ជា​សិទ្ធិ​មនុស្ស, មាន​សីល​ប្រាំ​មាន​សន្តិភាព, ព្រះ​ធម៌ ជា​ផ្លូវ​នាំ​មនុស្ស​ទៅ​រក​សេចក្តី​សុខ, មាន​យុត្តិធម៌ មាន​សន្តិភាព។

គេសង្កេតឃើញ​មាន ព្រះ​សង្ឃ ប្រជា​ពលរដ្ឋ និង​សង្គម​ស៊ីវិល ព្រម​ទាំង​តំណាង​សហគមន៍​ដី​ធ្លី​មួយ​ចំនួន ត្រៀម​ខ្លួន​រួច​ជា​ស្រេច ចាប់​តាំង​ពី​ថ្ងៃ​ទី៥ ខែ​ធ្នូ ជា​មួយ​នឹង​ការ​ធ្វើ​ធម្មយាត្រា សិទ្ធិ​យាត្រា ដោយ​ថ្មើរ​ជើង ពី​បណ្តា​ខេត្ត​នានា តាម​ផ្លូវ​ជាតិ​ចំនួន​ប្រាំ​មួយ​ខ្សែរ រូម​មាន ផ្លូវជាតិ​លេខ​១, ២, ៣, ៤, ៥, ៦ មក​កាន់​រាជធានី​ភ្នំពេញ។ អ្នក​ចូល​រួម​ក្នុង​ការ​ធ្វើ​ធម្មយាត្រា សិទ្ធិ​យាត្រា នេះ មាន​ជាអាថ៌​លោក ម៉ម សូណង់ដូ, លោក វ៉ន ពៅ ប្រធាន​សមាគម​សេដ្ឋកិច្ច​ក្រៅ​ប្រព័ន្ធ, ព្រះ​តេជគុណ ប៊ុត ប៊ុនតិញ ស្ថាបនិក​បណ្តាញ​ព្រះ​សង្ឃ​ឯករាជ្យ ដើម្បី​យុត្តិធម៌​សង្គម, ព្រះ​តេជគុណ ងីម សៅរ៍សំខាន់ ប្រធាន​អង្គការ​ធម្មទាន​សង្គម​ជា​ដើម។

ដោយមានការចូលរួម ពីអង្គការសមាគមក្នុងស្រុកប្រមាណជាង២០០ផងនោះ ធម្មយាត្រា និងសិទ្ធិយាត្រា​ឆ្នាំនេះ បានធ្វើដំណើរនៅតាមបណ្តាផ្លូវជាតិ ដោយមានអ្នកដឹកនាំ និងអ្នកសម្របសម្រួលយ៉ាងហោចណាស់ បួននាក់/អង្គ ក្នុងក្រុមនីមួយៗ។ នៅតាមដងផ្លូវ បន្ថែមពីការតស៊ូមតិសិទិ្ធមនុស្ស អ្នកចូលរួមនឹងចូលរួម​នូវការ​ផ្តល់នូវពុទ្ធឱវាទ និងសិទិ្ធមនុស្ស វគ្គសំនួរចម្លើយ សំនួរល្បងប្រាជ្ញា និងកំណាព្យជាដើម។ ក្បួននៃដំណើរ​នីមួយៗនេះ ក៏មានអ្នកចូលរូមចាប់ពីរ៦០នាក់/អង្គ ឡើងទៅ។ ធម្មយាត្រា និងសិទ្ធិយាត្រា នោះគ្រោង​នឹង​ជួបជុំគ្នា ពីអ្នកចូលរួមយ៉ាងតិចប្រាំពាន់នាក់ នៅមុខ«វិមានរដ្ឋសភាជាតិ» ក្នុងព្រឹកថ្ងៃទី១០ ខែធ្នូនេះ។

ធម្មយាត្រា និងសិទ្ធិយាត្រានៅតាមបណ្តាផ្លូវជាតិនីមួយៗ

ផ្លូវជាតិលេខ១៖ ដឹកនាំដោយព្រះភិក្ខុ អ៊ិន ពុទ្ធិ អតីតចៅអធិការវត្តជ័យមុនី ធ្វើដំណើរចាប់ពី វត្តកអណ្តើក ស្រុក​កំពង់ត្របែក ខេត្តព្រៃវែង។ ក្បួននេះមកដល់រាជធានីភ្នំពេញ ក្នុងវត្តនិរោធរង្សី នាវេលាម៉ោងជាងបួន​រសៀល​ថ្ងៃ​ទី៩ ខែធ្នូ។ នេះបើតាមការបញ្ជាក់របស់អ្នកស្រី ច្រាយ នីម បណ្តាញជនរងគ្រោះសមាគមបឹងកក់។

ផ្លូវជាតិលេខ២៖ ដឹកនាំដោយលោក ទិប ទាវ នាយកប្រតិបត្តិនិស្សិតបញ្ញវ័ន្តកម្ពុជា ធ្វើដំណើរចាប់ពីវត្តសោម ស្រុកគិរីវង្ស ខេត្តតាកែវ។ ធម្មយាត្រានេះ បានមកដល់វត្តចាក់អង្រែក្រោម ស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ វេលាម៉ោងមួយថ្ងៃត្រង់ ក្នុងថ្ងៃទី៩ ខែធ្នូនេះ។ ធម្មយាត្រា និងសិទ្ធិយាត្រានេះ ក៏មានការចូលរួម និងស្វាគមន៍ពីមន្រ្តីធំៗនៃគណបក្សនេះ រួមទាំងប្រធាន លោក សម រង្ស៊ី និងភរិយា លោកស្រី ជូឡុង ស៊ូមូរ៉ា។ នេះបើតាមការបញ្ជាក់របស់លោក ទិប ទាវ នាយកប្រតិបត្តិនិស្សិតបញ្ញវ័ន្តកម្ពុជា។

ផ្លូវជាតិលេខ៣៖ ដឹកនាំដោយព្រះភិក្ខុ ណាំ ចាន់ថេន សមាជិកបណ្តាញព្រះសង្ឃឯករាជ្យ ដើម្បីយុត្តិធម៌សង្គម ធ្វើដំណើរចាប់ពីវត្តដីក្រហម ភូមិដីក្រហម ឃុំបឹងនិមល ស្រុកឈូក ខេត្តកំពត។  តាមការបញ្ជាក់របស់ព្រះពិក្ខុ ប៊ូ បេត បានឲ្យដឹងថា ក្បួននេះមកដល់រាជធានីភ្នំពេញ អង្គការCLEC ចំការដូង នាវេលាម៉ោងជិតប្រាំរសៀល​ថ្ងៃទី៩ ខែធ្នូ។

ផ្លូវជាតិលេខ៤៖ ដឹកនាំដោយព្រះភិក្ខុ ចៅ សែនរដ្ឋា គង់នៅក្នុងវត្តចង្ក្រានតាព្រហ្មស្ទឹងមានជ័យ រាជធានី​ភ្នំពេញ ធ្វើដំណើរចាប់ពីវត្តភ្នំពេជ្យនិល ឃុំត្រៃត្រយឹង ស្រុកភ្នំស្រួច ខេត្តកំពង់ស្ពឺ។ លោក សុត ពិសិដ្ឋ ដែល​ចូលរួមក្នុងក្បួននេះ បានថ្លែងថា ក្បួនផ្លូវជាតិលេខ៤នេះ បាមកដល់រាជធានីភ្នំពេញ ក្នុងវត្តស្ទឹងមានជ័យ នា​វេលាម៉ោងជាងបួនរសៀលថ្ងៃទី៩ ខែធ្នូ។

ផ្លូវជាតិលេខ៥៖ ដឹកនាំដោយព្រះភិក្ខុ ថង ណារិទ្ធិ ប្រធានបណ្តាញព្រះសង្ឃឯករាជ្យ ដើម្បីយុត្តិធម៌សង្គម គង់​នៅវត្តនាគវ័ន្ត ធ្វើដំណើរចាប់ពីវត្តឧទុមពរ ស្រុករលៀប្អៀ ខេត្តកំពង់ឆ្នាំង។ ក្បួននេះមកដល់រាជធានីភ្នំពេញ ក្នុងវត្តអ៊ុតរាវត្តី នាវេលាម៉ោងជិតប្រាំរសៀលថ្ងៃទី៩ ខែធ្នូ។

ផ្លូវជាតិលេខ៦-៧៖ ដឹកនាំដោយព្រះភិក្ខុ ធូរ ធា ធ្វើដំណើរចាប់ពីវត្តត្រពាំងព្រះ ស្រុកព្រៃឈរ ខេត្តកំពង់ចាម។ និងខេត្តរតនៈគីរី ដឹកនាំដោយ ព្រះតេជគុណ ងីម សៅរ៍សំខាន់ ប្រធានអង្គការធម្មទានសង្គម។ ព្រះភិក្ខុ ពៅ ស៊ីថា ដែលនិមន្តនៅជាមួយក្បួននេះ បានមានសង្ឃដីកាថា ក្បួនបានមកដល់រាជធានីភ្នំពេញ ក្នុងវត្តចាស់ នា​វេលាម៉ោងជិតប្រាំរសៀល ថ្ងៃទី៩ ខែធ្នូ។

ទោះបីការធ្វើធម្មយាត្រា និងសិទ្ធិយាត្រា នេះមានការរារាំងដោយក្រុមសមត្ថកិច្ច ប្រចាំខេត្តនីមួយៗក៏ដោយ តែ​ការធ្វើធម្មយាត្រា និងសិទ្ធិយាត្រា នៅតែបន្តមកដល់ទៅរាជធានីភ្នំពេញ ដោយជោគជ័យ៕