«កាស៊ីណូ» ដែលកំពុងកើតឡើងព្រោងព្រាត ក្នុងប្រទេសកម្ពុជា ពិសេសនៅតាមបណ្តាព្រំដែន នៅមិនទាន់​មានច្បាប់គ្រប់គ្រងនៅឡើយ។ តែផ្ទុយទៅវិញ សេចក្តីព្រាងច្បាប់ ស្ដីពីសមាគម និងអង្គការក្រៅរដ្ឋាភិបាល ដ៏ចម្រូងចម្រាស់ កំពុងរងការរិះគន់ថា ត្រូវបានរដ្ឋាភិបាល ផ្ដល់អាទិភាព ខ្លាំងជាងច្បាប់គ្រប់គ្រង់ កាស៊ីណូ ទៅវិញ។

លោក ហូរ វ៉ាន់ ប្រធានគណកម្មការទី១០នៃរដ្ឋសភា និងជាតំណាងរាស្ត្រ មកពីគណបក្សសង្គ្រោះជាតិ បាន​ថ្លែងថា ចំពោះសេចក្ដីព្រាងច្បាប់ ស្ដីពីអង្គការ និងសមាគមនេះ នៅមិនទាន់ដល់ពេល ឬចាំបាច់ និង​ប្រញាប់​អនុម័តនោះឡើយ។ លោកថា បើទោះជា១០ឆ្នាំទៀត ទើបអនុម័តនោះ ក៏វាមិនហួសពេលដែរ។ លោកបន្តថា តែអ្វីដែលគួរ យកចិត្តទុកដាក់ និងគិតគូរដើម្បីប្រយោជន៍ជាតិ និងប្រជាពលរដ្ឋនោះ រដ្ឋាភិបាលត្រូវ​ចាប់​អារម្មណ៍ បង្កើតឲ្យមានច្បាប់គ្រប់គ្រង លើ«កាស៊ីណូ»វាប្រសើរជាង។

តំណាងរាស្រ្តមណ្ឌលភ្នំពេញរូបនេះ បានបន្តថា តួយ៉ាង កាស៊ីណូ ដែលកំពុងរីកដូចផ្សិតនៅកម្ពុជា ពិសេស​តាមបណ្តាព្រំដែននោះ នៅមិនទាន់មានច្បាប់គ្រប់គ្រង ហើយកម្ពុជាក៏កំពុងខាតបង់ និងបាត់ចំណូលជា​ច្រើន ពីការបង្កើតស៊ីណូនោះ ដោយគ្មានច្បាប់ទម្លាប់ដែរ។

ចំពោះ ច្បាប់ដើម្បីគ្រប់គ្រង អង្គការសង្គមស៊ីវិល នេះវិញ មិនត្រូវបានលោក ហូរ វ៉ាន អះអាងគាំទ្រឡើយ។ លោកបានអះអាងថា នោះដោយសារតែច្បាប់នេះ ត្រូវបានរៀបរៀងឡើង ដោយមិនគោរពច្បាប់រដ្ឋធម្មនុញ្ញ និងបំបិទសិទ្ធិសេរីភាព ក្នុងសកម្មភាពសង្គម របស់ប្រជាពលរដ្ឋ។ លោកនៅតែស្នើឲ្យរដ្ឋសភា កែប្រែមាត្រា​មួយចំនួន និងទទួលយកអនុសាសន៍សង្គមស៊ីវិល ទៅបញ្ចូលក្នុងច្បាប់នោះ ជាចាំបាច់៕