ជំលោះដីធ្លី នៅ​សហគមន៍​ឡពាង នៅ​តែ​មាន​បញ្ហា​រក​ដំណោះ​ស្រាយ​មិន​ចេញ។ នោះ​ដោយ​សារ​តែ​ក្រុម​គ្រួសារ​ដែល​នៅ​សេស​សល់​ទាំង ១៦​គ្រួសារ​ មិន​មាន​គោល​ជំហរ​ច្បាស់​លាស់​នោះ​ទេ ក្នុង​ការ​ទាមទារ​សំណង។ នេះ​បើ​តាម​ការ​បញ្ជាក់​របស់​លោកស្រី ឡោក ខេង សមាជិក​គណៈកម្មការ​ទី ១ នៃ​រដ្ឋសភា ក្នុង​ការ​ថ្លែង​មួយ​ទៅ​កាន់​ក្រុម​អ្នក​សារព័ត៌មាន បន្ទាប់​ពី​លោកស្រី​ចេញ​ពី​អង្គ​ប្រជុំ​ពិភាក្សា រវាង​សហគមន៍​ឡពាង និង​គណៈកម្មការ​សិទ្ធិ​មនុស្ស ទទួល​ពាក្យ​បណ្តឹង អង្កេត និង​ទំនាក់​ទំនង រដ្ឋសភា ព្រឹទ្ធសភា (​ឬ​ហៅ​ថា​គណៈកម្មការ​ទី១) នៃ​រដ្ឋសភា នា​ព្រឹក​ម៉ិញ​នេះ។

តំណាងរាស្ត្រ​មក​ពី​គណបក្ស​ប្រជាជន​រូប​នេះ បាន​និយាយ​ថា សុំ​ឲ្យ​ពលរដ្ឋ​ទាំង​នោះ​បញ្ជាក់​ជំហរ «ថា​តើ​គាត់​ចង់​បាន​ដី ឫច​ង់​បាន​លុយ ពី​ក្រុមហ៊ុន KDC» ដើម្បី​ងាយ​ស្រួល​ដល់​គណៈកម្មការ ជជែក​ជា​មួយ​នឹង​ក្រុមហ៊ុន ដែល​កំពុង​ធ្វើការ​វិនិយោគ​លើ​ដី របស់​សហគមន៍​ឡ​ពាង​នេះ។

ជំលោះដីធ្លីនៅក្នុងសហគមន៍ខាងលើនេះ ជាមួយនឹងក្រុមហ៊ុន KDC មានចំនួន ៥២គ្រួសារ ដែលទទួលរង​ផលប៉ះពាល់ពីក្រុមហ៊ុន ប៉ុន្តែបច្ចុប្បន្នគណៈកម្មការទី ១នៃរដ្ឋសភា បានធ្វើការដោះស្រាយរួចរាល់ចំនួន ៣៦ គ្រួសារហើយ ដោយឡែកនៅចំនួន ១៦គ្រួសារទៀត នៅមិនទាន់បានដោះស្រាយ និងទទួលសំណង​នៅ​ឡើយ។

លោកស្រី ឡោក ខេង បានបញ្ជាក់ប្រាប់អ្នកសារព័ត៌មានយ៉ាងដូច្នេះទៀតថា គណៈកម្មការទី១ នៃរដ្ឋសភា​កំពុងប្រឹងប្រែងដោះស្រាយបញ្ហានេះខ្លាំងណាស់ ប៉ុន្តែប្រជាពលរដ្ឋទៅវិញទេ ដែលមិនទាន់មានជំហរច្បាស់​លាស់ណាមួយ ដើម្បីឲ្យគណៈកម្មការជួយជួយសម្របសម្រួលជូនដល់ពួកគាត់។ រីឯក្រុមហ៊ុន KDC វិញ លោកស្រីនិយាយថា ក្រុមហ៊ុននៅតែរងចាំទទួលនៅការចរចា ដើម្បីដោះស្រាយជំលោះនេះផងដែរ ប៉ុន្តែ​ពលរដ្ឋទាំង ១៦គ្រួសារនេះ មិនមានគោលជំហរមួយច្បាស់លាស់នោះទេ នៅពេលនេះ។ លោកស្រី​និយាយ​ទៀតថា៖ «អ្នកខ្លះចង់ឲ្យក្រុមហ៊ុនផ្តល់សំណងជាប្រាក់ ហើយអ្នកខ្លះទៀតចង់បានដីរស់នៅវិញ»។

តាមការបញ្ជាក់របស់លោក អេង ឆៃអៀង ប្រធានគណៈកម្មការទី ១ និងជាតំណាងរាស្ត្រពី​គណបក្ស​សង្គ្រោះ​ជាតិ បានស្នើនៅក្នុងកិច្ចប្រជុំខាងលើនេះ ទៅអ្នកស្រី អ៊ុំ សុភី តំណាងសហគមន៍ឡពាង ឲ្យធ្វើការបញ្ជាក់​ពី​ក្រុមគ្រួសារ ដែលមិនទាន់ទទួលបានសំណងថា តើពួកគាត់ចង់បានសំណងអ្វីពីក្រុមហ៊ុនពិតប្រាកដ។ លោក​ថា ក្រោយពីមានបញ្ជាក់ពីក្រុមគ្រួសារទាំងនោះ បានច្បាស់លាស់ហើយនោះ ទើបគណៈកម្មការ ធ្វើការ​ចរចា​ជាមួយក្រុមហ៊ុនរកដំណោះស្រាយ ជូនប្រជាពលរដ្ឋឲ្យបានឆាប់រហ័ស។

រីឯអ្នកស្រី អ៊ុំ សុភី វិញ បានប្រាប់ទស្សនាវដ្តីមនោរម្យ.អាំងហ្វូតាមទូរស័ព្ទថា នៅពេលដែលអ្នកស្រីធ្វើ​ដំណើរ​ទៅដល់ផ្ទះនៅល្ងាចនេះ អ្នកស្រីនឹងប្រមូលសហគមន៍ឡពាងទាំងអស់ មកប្រជុំពិភ្សាគ្នា អំពីអ្វីដែលពួក​គាត់​ត្រូវឲ្យក្រុមហ៊ុន KDC ផ្តល់សំណងដល់ពួកគាត់។

សូមរំលឹកថា ក្រុមហ៊ុនខេប៊ីស៊ី (KDC) របស់អ្នកស្រី ជា ខេង ភរិយាលោក ស៊ុយ សែម រដ្ឋមន្ត្រី​ក្រសួង​រ៉ែ និង​ថាមពល បានរងការចោទប្រកានថា បានរំលោភដីធ្លី និងឈូសឆាយកម្ទេចផ្ទះសម្បែងប្រជាពលរដ្ឋ អស់​១៤​ខ្នង នៃប្រជាពលរដ្ឋសរុប៨៩គ្រួសារតាំងពីថ្ងៃទី០៩ ខែមករា ឆ្នាំ២០០៨មក។ តាំងពីពេលនោះមក រហូត​ដល់​មាន​ការ​ព័ទ្ធរបងនាពេលកន្លងមក អាជ្ញាធរ ក៏ដូចជាអភិបាលខេត្តកំពង់ឆ្នាំង រួមទាំងមន្រ្តីរដ្ឋាភិបាល​ពាក់​ព័ន្ធ​មួយចំនួន មិន​ទាន់​បាន​រកដំណោះស្រាយឲ្យនោះឡើយ រហូតជំរុញឲ្យពលរដ្ឋស្វែងរកជំនួយពីរដ្ឋសភា៕