លោក ជ គឹមស៊រ អភិបាលរងខណ្ឌចំការមន បានរងការចោទប្រកាន់ថា បានលើវិទ្យុទាក់ទង​វាយក្បាល​ស្ត្រី​ម្នាក់ បន្ទាប់ពីលោក បានដឹកនាំកម្លាំងសន្តិសុខ និងកម្លាំងចម្រុះមួយចំនួនទៀត មកធ្វើការបិទផ្លូវ និងទប់ទល់​នឹងការតវ៉ា របស់ប្រជាពលរដ្ឋ យុវជន និងអង្គការសង្គមស៊ីវិលមួយចំនួន នោមុខរដ្ឋសភា កាលពីព្រឹកថ្ងៃទី៧ ខែកក្កដា ឆ្នាំ២០១៥នេះ។

បូវ សោភា ដែលមកពីតំបន់បឹងកក់ និងដែលតែងសកម្ម ក្នុងការតវ៉ាទាមទារនូវសិទ្ធិសេរីភាព និងសិទ្ធិ​លំនៅ​ដ្ឋាន​នោះ បានអះអាងថា ខ្លួនបានរងគ្រោះ ក្រោមទំងន់វិទ្យុទាក់ទង របស់លោក ជ គឹមស៊រ។ ភ្លាមៗ បន្ទាប់ពី​ត្រូវ​បានគេវាយរួច (មិនមានគ្រោះថ្នាក់ធំដំទេ) អ្នកស្រីបានធ្វើការតវ៉ា និងឌឺដងថា៖ «មនុស្សប្រុសវាយស្រី អន់​ណាស់ វាយមក! វាយមក អន់ម្លេះ? មនុស្សប្រុសដែលអន់ ថោក វាយស្រ្តី។ (...) លោកបានបុណ្យសក្តិ ដោយ​សារ​វាយស្រីមែន? (...) ស្អីគេ យកអាយឌី (វិទ្យុទាក់ទង) មកវាយ សក្តិម៉ានហ្នឹង?»

ក្រោយពីមានការវាយនោះហើយ ក្រុមសន្តិសុខខណ្ឌមួយហ្វូងធំ បានចូលមកធ្វើការបំបែក ការជួបជុំនោះ ដោយបង្ខំឲ្យពួកគេចាកចេញ។ ភាពរឹងទទឹង និងមានៈរៀងៗខ្លួន នៃស្រ្តីដែលជាអ្នកតវ៉ា និងក្រុមសន្តិសុខ បាន​បង្កើត ឲ្យមានការទាស់សម្តីគ្នាតិចតួច។ បន្ទាប់ពីនោះ ស្រាប់តែក្រុមសន្តិសុខឃុតពណ៌កាកអំពៅ បាន​រុញ​ក្រុម​សន្តិសុខឈុតខៀវ ឲ្យបុកប៉ះក្រុមស្រ្តីដែលកំពុងឈរតវ៉ា ក៏បង្កមានទំនាស់ពាក្យ​សំដីឡើង​ខ្លាំងឡើង តែមិន​បាន​ឈានទៅដល់ការប្រើប្រាស់ នូវអំពើហិង្សាខាងរាយកាយឡើយ។

នៅមុខរដ្ឋសភា គេសង្កេតឃើញមាន ការដាក់រនាំងបិទ មិនឲ្យមានអ្នកដំណើរ ធ្វើការឆ្លងកាត់ផ្លូវមុខ​រដ្ឋសភា​នោះទេ។ ហើយការបិទផ្លូវនេះទៀតសោធ ក៏មានការពង្រាយកម្លាំងសន្តិសុខ រួមទាំងកម្លាំងចម្រុះ ប្រមាណ​ជាង១០០នាក់ ដើម្បីការពារសន្តិសុខមុខរដ្ឋសភា និងទប់ទល់ការជ្រែក ចូលមកមុខរដ្ឋសភា នៃក្រុមស្រ្តីអ្នក​តវ៉ា ដែលមានគ្នាមិនដល់៥០នាក់ផង។

ទស្សនាវដ្តីមនោរម្យ.អាំងហ្វូមិនអាចសុំការបញ្ជាក់ ពីលោកអភិបាលរង ខណ្ឌចំការមនរូបនោះបានទេ ទាក់ទង​នឹងការចោទប្រកាន់ របស់ស្រ្តីរងគ្រោះឈ្មោះ បូវ សោភា ដោយសារលោកខ្លួនឯង «មិន»និយាយ ជាមួយ​អ្នក​សារព័ត៌មាន និងបានដើរចេញ នៅពេលអ្នកសារព័ត៌មានសួរនាំ។ ការតវ៉ារបស់អ្នកបឹងកក់ទាំងនោះ ត្រូវ​បាន​សាលារាជធានីភ្នំពេញ ចោទប្រកាន់ថា ជាក្រុម«ពហុវិស័យ(បាតុកម្ម)» ដែលមាន័យថា ធ្វើការតវ៉ា​គ្រប់​រូបភាព គ្រប់ករណី មិនរើសមុខ។ ប៉ុន្តែបើទោះជា«ពហុវិស័យ»ក៏ដោយ ក៏រឿង«វាយក្បាលនឹងវិទ្យុទាក់ទង» គឺជា​រឿង​ពីរផ្សេងពី​គ្នា៕