អង្គការតម្លាភាពអន្តរជាតិ ថ្កោលទោសសេចក្តីព្រាងច្បាប់ NGO
- ដោយ: អ៊ុម វ៉ារី អត្ថបទ ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ -ភ្នំពេញថ្ងៃទី៧ កក្កដា ២០១៥
- កែប្រែចុងក្រោយ: July 08, 2015
- ប្រធានបទ: ច្បាប់ NGO
- អត្ថបទ: មានបញ្ហា?
- មតិ-យោបល់
-
អង្គការតម្លាភាពអន្តរជាតិ ដែលល្បីល្បាញខាងការឃ្លាំមើល ភាពស្អាតស្អំ នៅគ្រប់ជ្រុងជ្រោយ នៃផែនដី បានធ្វើការថ្កោលទោស ទៅលើសេចក្តីព្រាងច្បាប់ ស្ដីពីសមាគម និងអង្កការក្រៅរដ្ឋាភិបាល របស់រដ្ឋាភិបាលកម្ពុជា ដោយបានចាត់ទុកសេចក្ដីព្រាងច្បាប់នេះ ថាបានរំលោភលើច្បាប់ និងអនុសញ្ញាអន្តរជាតិ។
សេចក្ដីថ្លែងការណ៍ថ្កោលទោស របស់អង្គការតម្លាភាពអន្តរជាតិ ដែលមានទីតាំង នៅក្នុងប្រទេសអាល្លឺម៉ង់ ត្រូវបានដាក់ផ្សាយ នៅលើគេហទំព័ររបស់អង្គការនេះ កាលពីថ្ងៃទី២ ខែកក្កដាកន្លងទៅ (ប្រិយមិត្តអាចរកអានបាន ជាភាសាអង់គ្លេស ដោយចុចនៅទីនេះ)។ លោក ចូហ្សេ អ៊ូហ្គាស (Jose Ugaz) ប្រធាននៃអង្គការតម្លាភាពអន្តរជាតិ បានថ្លែងថា «សង្គមស៊ីវិល គឺជាការតំណាង ដ៏ខ្លាំងជាងគេបំផុត នៃសំលេងរបស់ពលរដ្ឋ នៅក្នុងប្រទេសកម្ពុជា និងនៅគ្រប់ទីកន្លែងផ្សេងទៀត នៅក្នុងពិភពលោក។ ប្រសិនបើប្រទេសកម្ពុជា បានព្យាយាមដាក់កំហិត ឬបំបិតមាត់អង្គការសង្គមស៊ីវិលនោះ វានឹងមាននូវការគ្រប់គ្រង បែបផ្តាច់ការមួយឡើង ដែលមិនអាចរិះគន់បាន គ្មានគណនីភាព និងអាចប្រព្រឹត្តអំពើពុករលួយ ដោយគ្មានទោសទណ្ឌ។»
លោក អ៊ូហ្គាស បានថ្លែងទៀតថា៖ «យើងបានឃើញ និងបានជួបប្រទះ ផលវិបាកដ៏អវិជ្ជមាន នៃច្បាប់ប្រភេទនេះ នៅក្នុងប្រទេសផ្សេងទៀត - ដូចប្រទេស វ៉េណេហ្សុយអេឡា ហុងគ្រី និងប្រទេសរុស្ស៊ី ជាដើម (...)។ ច្បាប់ទាំងនេះ ត្រូវបានរៀបចំឡើង ដើម្បីវាយប្រហារ ប្រឆាំងអំពើពុករលួយ និងសកម្មជនសិទ្ធិមនុស្ស។»
ថ្លែងក្នុងសិក្ខាសាលាពិគ្រោះយោបល់ នៃបណ្តាអង្គការសង្គមស៊ីវិលជាតិ និងអន្តរជាតិ នាព្រឹកថ្ងៃទី៧ ខែកក្កដា ឆ្នាំ២០១៥នេះ នាសណ្ឋាគារកាំបូឌីយ៉ាណា នាយកប្រតិបត្តិអង្គការតម្លាភាព ប្រចាំប្រទេសកម្ពុជា លោក ព្រាប កុល បានអះអាងដែរថា៖ «អង្គការតម្លាភាពអន្តរជាតិ ថ្កោលទោសលើសេចក្តីព្រាងច្បាប់ សមាគម និងអង្គការក្រៅរដ្ឋាភិបាល មិនមែនថ្កោលទោស ទៅលើរដ្ឋាភិបាលទេ»។ ប៉ុន្តែលោកបានស្នើឲ្យរដ្ឋាភិបាលកម្ពុជា ធ្វើការពិចារណាឡើយវិញ ទៅលើច្បាប់នេះ ដោយធ្វើការពិគ្រោះយោបល់ ឲ្យបានសមស្រប ជាមួយនឹងអង្គការដៃគូពាក់ព័ន្ធនានា ក្នុងពេលវេលាមួយសមស្រប និងគ្រប់គ្រាន់។
ក្នុងចំណោមមាត្រាជាច្រើន នៃសេចក្តីព្រាងច្បាប់ ស្ដីពីសមាគម និងអង្គការក្រៅរដ្ឋាភិបាលនោះ លោក ព្រាប កុល បានលើកយកនូវមាត្រា៥ នៃសេចក្តីព្រាងនោះ មកធ្វើការពន្យល់ថា ពិបាកនឹងទទួលយកបាន។ លោកបានលើកមាត្រានោះ មកថ្លែងថា៖ «ប្រធានអង្គការ ស្ថាបនិក ឬក៏មេដឹកនាំអង្គការ នៅពេលដែលអង្គការមួយនោះ ត្រូវបានបិទទ្វា ឬបញ្ចប់សកម្មភាព មិនមានសិទ្ធិ ទៅបង្កើតអង្គការ សមាគមផ្សេងបានទៀតទេ។»
លោកបានធ្វើការរិះគន់ លើមាត្រាប្រាំនោះថា ពិតជាមានភាពសាហាវមែនទែន ដែលមនុស្សម្នាក់ គ្មានកំហុសអ្វីទាល់តែសោះ តែត្រូវបាន«ច្បាប់»មួយនេះ បិទសេរីភាព ដោយគ្មានថ្ងៃនឹងរំដោះចេញបាននោះ។ លោកបានបង្ហាញឧទាហរណ៍ មួយទៀតថា៖ «ឧបមាថាខ្ញុំ លោក សារឿន លោក វ៉ាន់ ណារ៉ា លោកស្រី សុភាព រួមគ្នាដឹកនាំស្ថាប័នមួយ (ជាស្ថាបនិក ឬអ្នកដឹកនាំក្នុងអង្គការ)។ ស្រាប់តែមានកូនចៅណាម្នាក់ ឬបុគ្គល ដែលគេបង្កប់ខ្លួនពីណាមក មកធ្វើសកម្មភាពខុសច្បាប់ ក្នុងអង្គការយើង រដ្ឋអំណាចចាប់កំហុសយើង និងផ្តន្ទាទោស ហើយប្រកាសបិទអង្គការហ្នឹង។ ខ្ញុំ លោកសារឿន លោកវ៉ាន់ណារ៉ា លោកស្រីសុភាព មួយជីវិតហ្នឹង មិនអាចទៅបង្កើតសមាគម ណាមួយបានទៀតទេ ដែលយើងអត់មានកំហុសអ្វីទាល់តែសោះ។»
លោកបានបញ្ជាក់ដូច្នេះថា តាមចំណុចខាងលើ វាមិនដែលមាន ពិសេសក្នុងប្រទេសដទៃទៀត។ លោក ព្រាប កុល បានថ្លែងឲ្យដឹងទៀតថា៖ «យើងមើលទៅ វាមិនដែលធ្លាប់មាន នៅក្នុងប្រទេសដទៃទៀត។ មិនដែលរំលោភសិទ្ធិបុគ្គលហើយ ដាក់លក្ខខណ្ឌទៅអញ្ចឹងទេ។ សួរថា តើមានបំណងអ្វី បានជាយើងបង្កើតច្បាប់អញ្ចឹង? ជាស្វ័យប្រវត្តិ បើអង្គការត្រូវបានបិទទ្វា ស្ថាបនិក ប្រធានអង្គការអីទាំងអស់ចប់ហ្មង អត់មានទៅបង្កើតអង្គការ សមាគមអីទៀតទេ ទាំងខ្លួនគេមិនមានទោសអីផង។ ខ្ញុំមិនអាចទទួលយកបានទេ លើចំណុចហ្នឹង។»៕