នៅប្រទេសស្វីស នាង មីឡូ ម័រ៉េ ត្រូវបានអ្នកផងស្គាល់ និងល្បីថា នាងមានភាពប៉ិនប្រសព្វ ខាងឈុត​ឆាក​សិល្បៈ បង្ហាញខ្លួនស្រាតននលគោក ជាសាធារណៈ។ ប៉ុន្តែនៅរដ្ឋធានី ប៉ារីស ប្រទេសបារាំងវិញ វិចិត្រការិនី និងជាតារាបង្ហាញម៉ូដរូបនេះ មិនសូវជាមាននរណាស្គាល់នាងទេ។ ដោយទំនងជាបែបនេះផង ទើបនាង​បាន​មកកាន់ទីលានត្រូកាដេរ៉ូ (Trocadéro) ខាងមុខតួអេហ្វែល (tour Eiffel) នៃរដ្ឋធានី ប៉ារីស ដើម្បីរៀបចំ​ឈុត​ឆាក ស្រាតដោយខ្លួនឯង ជាមួយមនុស្សម្នានៅទីនោះ។

បើក្រុមអ្នកទេសចរណ៍ និងបណ្ដាជនរស់នៅក្បែរនោះ បានសប្បាយរីករាយ នឹងបានឃើញនាង ហើយបាន​ថតរូបជាមួយនាងនោះ តែសម្រាប់អាជ្ញាធរនគរបាលបារាំងវិញ មិនបានសប្បាយចិត្តទេ។ ហេតុដូច្នេះហើយ ទើបនាង មីឡូ ម័រ៉េ ត្រូវបាននគរបាលឃាត់ខ្លួន ប្រមូលទាំងសម្ភារៈនានារបស់នាង ដែលមាន​នៅ​នឹងកន្លែង យកទៅដាក់ នៅស្នងការនគរបាល សង្កាត់លេខ១៧ នៅវេលាម៉ោង១៧ល្ងាច។

ភ្នាក់ងារចាត់ការទូទៅ​របស់នាង លោក ភីធើ ប៉ាល (Peter Palm) បានឲ្យដឹងថា នគរបាលបារាំង បាន​ឃាត់​ខ្លួន​តារាវ័យ៣២ឆ្នាំ ដោយហេតុថា នៅប្រទេសបារាំង ការស្រាតដោះខោអាវ នៅតាមដងផ្លូវសាធារណៈ ត្រូវ​​បាន​ច្បាប់ហាមឃាត់។ នៅពេលនាំនាង នៅដល់ស្នងការរួច ភ្នាក់ងារនគរបាល បានសូត្រច្បាប់ទាំង​នេះ​​ចេញ​មក ហើយបានយកស្នាមមេដៃ និងបានថតរូបនាង មុននឹងដាក់នាងទៅក្នុងបន្ទប់ឃុំឃាំង អស់ពេញ​មួយ​យប់។ នៅ​ថ្ងៃចន្ទស្អែកឡើង វេលាម៉ោង១៦រសៀល នាង ម័រ៉េ ត្រូវបានដោះលែងមកវិញ ដោយសារការ​ឃុំ​ខ្លួន ជា​បណ្ដោះ​អាសន្ននេះ មានរយៈពេលតាមច្បាប់កំណត់ ត្រឹមតែ១ថ្ងៃ១យប់ប៉ុណ្ណោះ។

ប៉ុន្តែនៅមិនទាន់ចប់នៅឡើយ ព្រោះច្បាប់ព្រហ្មទណ្ឌបារាំង មាត្រា ២២២-៣២ បានចែងឡើងថា៖ «ការដាក់​តាំងបង្ហាញ ប្រដាប់ភេទ នៅទីសាធារណៈ ត្រូវផ្ដន្ទាទោស ដាក់ពន្ធនាគារ១ឆ្នាំ និងឲ្យបង់ពិន័យ ជាប្រាក់ ១៥ ០០០អ៊ឺរ៉ូ (ប្រមាណជា ១៧ ០០០ដុល្លារ)»។ នាង មីឡូ នឹងដឹងពីការសម្រេចចិត្ត របស់តុលាការបារាំង ទាក់ទង​នឹ​ងការពិន័យនេះ នៅប៉ុន្មានថ្ងៃក្រោយមកទៀត៕

» រូបភាព និងវីដេអូ របស់នាង ម័រ៉េ មួយចំនួន ទាក់ទងនឹងការងារសិល្បៈ របស់នាង៖