អ្នកដែលចង់ឃើញស្នាដៃ របស់វិចិត្រករអាមេរិកាំង ជេម ថួរ៉ែល (James Turrell) ដែលមកតាំងពិព័រណ៍របស់ខ្លួន នៅ​សារមន្ទីរជាតិអូស្ត្រាលី នៅរដ្ឋធានី កង់បេរ៉ា ត្រូវដោះសម្លៀកបំពាក់ចេញ សូម្បីខោអាវក្នុងក៏ដោយ។ នេះជា​គម្រោង​មួយ ដែលអ្នករៀបចំបង្កើតឡើង ដើម្បីបញ្ជៀសពីគម្លាតខណ្ឌ រវាងវិចិត្រករ និងអ្នកគាំទ្ររបស់ខ្លួន ដែលអាច​ប្រទាំង​ប្រទើស​គ្នា ពីបញ្ហាសម្លៀកបំពាក់។

ពិព័រណ៍ បានបើកទ្វាដំបូងនៅយប់ថ្ងៃពុធ ទី០១ ខែមេសា នេះ ដោយអនុញ្ញាត ឲ្យតែទស្សនិកជនពេញវ័យ ប្រមាណ​ជាង​៥០នាក់ប៉ុណ្ណោះ ឲ្យចូលទៅសម្ភោធមើលមុនគេ។ នៅស្អែកឡើង បញ្ជរលក់សំបុត្រ ក៏ត្រូវបិទទ្វាបាត់ទាំងព្រឹកទៀត ដោយ​ហេតុទស្សនិកជន បានមកដណ្ដើមគ្នា យកសំបុត្រដ៏ពិសេសនេះ ដើម្បីអាចចូលមើល ក្នុងពេលបន្ទាប់មក។

ពិព័រណ៍របស់លោក ជេម ថូរ៉ែល បានគោលគំនិតជាសំខាន់ នូវលំហ និងពន្លឺភ្លើង ដើម្បីបង្ហាញពីអារម្មណ៍ និងភាព​ត្រេក​ត្រអាល។ ពិព័រណ៍នៅលើកនេះ មានចំណងជើងថា «ចំណាំងផ្លាត ដើម្បីឃើញ ពីស្នេហារបស់ជនជាតិអាមេរិក សម្រាប់​ពន្លឺ និងទេសភាព»។ អ្នករៀបចំពិព័រណ៍ លោក ស្ទូអាត រីងហូត (Stuart Ringholt) បានអះអាងថា នេះជាចំណុចដ៏​ពិសេសៗ របស់វិចិត្រករ ដែលមានលក្ខណៈសេរី។

លោក រីងហូត បាននិយាយទៀតថា៖ «ពិព័រណ៍របស់លោក ថូរ៉ែល ត្រូវបានបង្កើតឡើង នៅជុំវិញពន្លឺ។ ស្បែកមនុស្ស បានស្រូបយកពន្លឺ ហើយយើងបានគិតថា ដងខ្លួនទាំងមូល អាចចាប់យក នូវចំណុចពិសេស អស់ទាំងនេះ។»

ចំពោះ​ទស្សនិកជន ដែលស្រាតននលគោក ត្រូវបានលោក រីងហូត លើកមករៀបរាប់ថា ពួកគេមានអារម្មណ៍ ដូចជា​អៀនប្រៀន ក្នុងពេលដំបូង តែបន្ទាប់ពីបានដោះខោអាវចេញទាំងអស់ ពួកគេបាននាំគ្នាញញឹម និងខ្លះទៀតសើច​យក​តែម្ដង៕