ក្ដីសប្បាយរីករាយ របស់ក្រុមអ្នកប្រើប្រាស់បណ្ដាញសង្គម ក្នុងការដាក់លាយបញ្ចូលគ្នា រវាងរូបថតផ្ទាល់ខ្លួន របស់ពួកគេ និងពណ៌ចម្រុះ«ដូចឥន្ទនូ» នៅលើហ្វេសប៊ុកនោះ មិនមែនជាការពញចិត្ត របស់មនុស្ស​មួយ​ចំនួន​ទេ។ ជាពិសេស គឺតំណាងរាស្ត្រជាតិរ៉ូស្ស៊ីមួយរូប លោក វីតាលី មីឡូណូវ (Vitali Milonov) បានបង្កើត សេចក្ដី​ព្រាងច្បាប់​មួយ​ឡើង ដើម្បីដាក់ទណ្ឌកម្ម លើបណ្ដាញសង្គម ដែលបានផ្សព្វផ្សាយ មាន​លក្ខណៈជា​«ពាណិជ្ជកម្ម» ពីការ​ស្រឡាញ់​ភេទដូចគ្នា។

សម្រាប់លោក វីតាលី មីឡូណូវ រូបថតទាំងអស់ ដែលមានលាយឡំ ទៅដោយពណ៌ឥន្ទនូនោះ ជាការ​«រំលោភ» លើច្បាប់ទំម្លាប់របស់ប្រទេសរ៉ូស្ស៊ី។ លោកបាននិយាយថា៖ «ហ្វេសប៊ុក មិនបានកំណត់អាយុ របស់​អ្នក​ចូលទៅប្រើប្រាស់ទេ (តាមពិត មិនមែនដូច្នេះទេ ព្រោះតាមលក្ខខន្តិកៈ របស់ហ្វេសប៊ុក បានបញ្ជាក់ថា អ្នកប្រើប្រាស់​ត្រូវ​មានអាយុ ពី១៣ឆ្នាំឡើង) គេមិនអាចដឹងថា តើមានកុមារច្រើនយ៉ាងណា ដែលបានមើល​ឃើញ រូបថត​នេះ»។

តំណាងរាស្ត្ររូបនេះ បានបន្តអះអាងទៀតថា៖ «ដោយហេតុដូច្នេះហើយ ទើបគួរតែបិទ កុំឲ្យ ហ្វេសប៊ុក នៅ​មាន​ដំណើរការ (ក្នុងប្រទេសរ៉ូស្ស៊ី) តទៅទៀត»។

រូបថតដែលមានលាយបញ្ចូល ដោយពណ៌ឥន្ទនូ ដែលជានិមិត្តសញ្ញា របស់ក្រុមអ្នកស្រឡាញ់ភេទដូចគ្នា ត្រូវ​បានក្រុមអ្នកប្រើប្រាស់បណ្ដាញសង្គម បង្កើតជាមួយកម្មវិធីមួយ របស់ហ្វេសប៊ុក ហើយបានបង្ហោះ នៅលើ​គណនីរបស់ពួកគេ សឹងតែគ្រប់ៗគ្នា។ ការបង្កើតរូបភាព ជាមួយពណ៌នោះ បានធ្វើឡើង នៅក្រោយការ​ប្រកាស​សាលក្រម របស់តុលាការកំពូល នៅសហរដ្ឋអាមេរិក ដែលផ្ដល់ភាពស្របច្បាប់ ឲ្យទៅអាពាហ៍ពិពាហ៍ នៃ​ភេទ​ដូចគ្នា កាលពីថ្ងៃសុក្រសប្ដាហ៍មុន។

ការលើកឡើង របស់តំណាងរាស្ត្ររ៉ូស្សីខាងលើ បានរងនូវប្រតិកម្មយ៉ាងច្រើន ពីសំណាក់ក្រុមអ្នកប្រើប្រាស់​បណ្ដាញ​សង្គម។ ពួកគេបានយករូបថតផ្លូវការ របស់លោក វីតាលី មីឡូណូវ មកដាក់បញ្ចូល ជាមួយពណ៌​​ឥន្ទនូ រួចយកមកបង្ហោះបន្តៗគ្នា ទាំងនៅលើបណ្ដាញសង្គម ក៏ដូចជានៅលើទ្វីសធើរ។

នៅក្នុងប្រទេសរ៉ូស្សី ការស្រឡាញ់ភេទដូចគ្នា ត្រូវបានចាត់ទុក ជាឧក្រិដ្ឋកម្មរហូតដល់ឆ្នាំ១៩៩៣ និងចាត​ទុក​ជា ជំងឺ«រោគចិត្ត» រហូតដល់ឆ្នាំ១៩៩៩។ បើទោះជាមកដល់ពេលនេះ ច្បាប់រ៉ូស្សី បានលើកលែង មិនចាប់​ថ្នាក់​អូសដំណើរក៏ដោយ ក៏ការស្រឡាញ់ភេទដូចគ្នា នេះ នៅតែជាបញ្ហាមួយដ៏រសើប សម្រាប់សង្គមរ៉ូស្ស៊ីដែរ។ នៅ​តាមដងផ្លូវនានា បទល្មើសបានកើតឡើងជារឿយៗ ទាក់ទងនឹងការវាយតប កាប់សម្លាប់ ការជេរប្រមាថ ឬការ​ប្រកាន់រើសអើង ប្រឆាំងនឹងក្រុមអ្នកស្រឡាញ់ភេទដូចគ្នា។ នេះបើតាមរបាយការណ៍ របស់អង្គការឃ្លាំមើល​សិទ្ធិ​មនុស្ស ហៅជាភាសាអង់គ្លេសថា «Human Rights Watch»៕