ប៉ុន្តែយ៉ាងហោចណាស់ នៅព្រឹកថ្ងៃអង្គារនេះ អាជ្ញាធររបស់ប្រទេសកូរ៉េខាងត្បូង មិនបានប្រកាស ពីករណី​មរណៈភាពថ្មីទៀត ដែលកើតចេញពីជំងឺនេះទេ ដែលផ្ទុយពីម្សិលម៉ិញ ដែលអាជ្ញាធរបានប្រកាសថា ចំនួនអ្នក​ស្លាប់បានកើនឡើង ដល់២៧នាក់។ នេះបើតាមការផ្សាយឲ្យដឹង របស់ទីភ្នាក់ងារសារព័ត៌មាន យ៉ុងហាប់ របស់​កូរ៉េខាងត្បូង។

អ្នកជំងឺ៤នាក់ បានជាសះស្បើយ និងបានចេញពីមន្ទីរពេទ្យ ធ្វើឲ្យចំនួនអ្នកជំងឺជាសះទាំងអស់ កើនដល់​៥៤​នាក់។ បណ្ដាជនដែលបានឆ្លងកាត់ការត្រួតពិនិត្យ មានចំនួនទាំងអស់ ២៨០៥នាក់សម្រាប់ព្រឹកថ្ងៃនេះ តិច​ជាង​ម្សិលម៉ិញ ដែលមានចំនួនដល់ទៅ ៣ ៨៣៣នាក់។ មនុស្សដែលទទួលបានការត្រួតពិនិត្យ ហើយត្រូវបាន​ចេញ​មកវិញ រហូតមកដល់ម៉ោងនេះ មានចំនួនទាំងអស់ ១០ ៧១៨នាក់។

៣ករណីទៀត ទើបនឹងត្រូវបានរកឃើញបន្ថែម ធ្វើឲ្យអ្នកជំងឺដែលបានឆ្លងជំងឺនេះ មានចំនួនឡើងដល់ ១៧៥​នាក់ ហើយ២៧នាក់ បានស្លាប់ និង៩៤នាក់ កំពុងសម្រាក នៅក្នុងមន្ទីរពេទ្យនៅឡើយ (អ្នកជំងឺ ៥៤នាក់ បាន​ជាសះស្បើយ)។ ពីក្នុងចំណោមអ្នកជំងឺ ដែលកំពុងសម្រាកព្យាបាលនេះ មាន១៦នាក់ ស្ថិតក្នុងស្ថានភាព​មិន​នឹងនរ។

អ្នកជំងឺម្នាក់ បានប្រសូតបុត្រ...

នៅព្រឹកថ្ងៃអង្គារនេះដែរ ស្ត្រីម្នាក់មានផ្ទៃពោះ ដែលរងគ្រោះនឹងជំងឺនេះ ទើបនឹងប្រសូតបានទារកមួយរូប តាម​រយៈការវះកាត់ នៅក្នុងមន្ទីរពេទ្យ «Samsung Medical Center»។ បើតាមមន្ទីរពេទ្យ បានអះអាងថា ទាំង​ម្ដាយ​ទាំង​កូន មានសុខភាពធម្មតា។ ស្ត្រីម្នាក់នេះ បានឆ្លងមេរោគ Mers ចូលមកក្នុងខ្លួន តែមិនបាន​បង្ហាញ​អាការៈ​​ជា​អ្នកជំងឺ បន្ទាប់ពីទទួលបាន ការព្យាបាលនោះមក៕