ហេតុការណ៍ ដែលអ្នកភូមិផ្អើល នាំគ្នាទៅកន្លែងកើតហេតុទាំងយប់នេះ បានកើតឡើង កាលពីវេលាម៉ោង​០៧ និង៤៥ នាទីយប់ថ្ងៃទី ២១ ខែមិថុនា ឆ្នាំ២០១៥។ ប្តីប្រពន្ធបង្កជម្លោះជាមួយគ្នា រហូតដល់ខាងស្រី ទាញ​កាំបិត​កាប់ខាងប្រុសនេះ រស់នៅភូមិតាសេក ឃុំបែកចានស្រុកអង្គស្នួល ខេត្តកណ្តាល។ ករណីបង្ករហឹង្សា​រវាង​​អ្នក​ទាំងពីរ បានបង្ករឡើង ដោយជម្លោះពាក្យសម្តីដ៏តិចតួចប៉ុណ្ណោះ។ នេះបើតាមការបញ្ជាក់ របស់​ប្អូន​ប្រុស​​ជីដូន​មួយ ដែលនៅផ្ទះក្បែរនោះ។

ជនរងគ្រោះ ដែលត្រូវបានប្រពន្ធរបស់ខ្លួនកាប់ចាក់ ធ្វើឲ្យមានរបួសស្នាមយ៉ាងដំណំនោះ ឈ្មោះ ផាត មី អាយុ​២៥ឆ្នាំ សព្វថ្ងៃជាកម្មកររោងចក្រ មួយកន្លែងនៅក្នុងស្រុកអង្គស្នួល។ ភ្លាមៗ បន្ទាប់ពីកើតហេតុ អ្នកជិតខាង​បាន​នាំអ្នករបួស ទៅមន្ទីពេទ្យស្រុកអង្គស្នួល តែដោយសាររបួស មានលក្ខណៈធ្ងន់ធ្ងរពេក ទើបមកដល់ថ្ងៃទី២២ ខែ​មិថុនានេះ ជនរងគ្រោះត្ រូវបានបញ្ជូនបន្តមកកាន់មន្ទីពេទ្យ ព្រះកុសមៈ (ពេទ្យលោកសង្ឃ) នៅរាជធានី​ភ្នំពេញ។ បើតាមការបញ្ជាក់របស់គ្រូពេទ្យ បានឲ្យដឹងថា បុរសរងគ្រោះ របួសក្បាលធ្ងន់ធ្ងរ នឹងកដៃខាងស្តាំ ដោយស្នាមកាំបិតតាំងតោ។

ក្មួយជនរងគ្រោះបានប្រាប់ថា បច្ចុប្បន្នស្ត្រីជាប្រពន្ធ ដែលបានកាប់ពូរបស់ខ្លួននោះ បានរត់ចេញពីផ្ទះបាត់​ស្រមោល នៅពេលធ្វើសកម្មភាពហើយភ្លាមៗ។ ក្មួយប្រុសអ្នករបួស បានដំណាលពីរឿងដំបូងថា មុនពេល​កើតហេតុ មានការទាស់សំដីគ្នា តែបន្តិចបន្តួចប៉ូនណ្ណោះ ហើយការឈ្លោះគ្នា នៅល្ងាចកើតហេតុ ក៏មិនខុសពី​សព្វដងដែរ លឺសម្លេងដល់ផ្ទះអ្នកជិតខាង ហាក់មិនត្រូវគ្នា ស្រាប់តែប្រពន្ធគាត់ទាញកាំបិត មកកាប់តែម្តង។ លោកបញ្ជាក់ថា បុរសរងគ្រោះកាលពីប៉ុន្មានខែមុន ធ្លាប់ត្រូវបានប្រពន្ធចិត្តសាហាវនេះ កាប់ម្តងរួចហើយ តែមិនធ្ងន់ធ្ងរដូចពេលនេះទេ៕