ចាប់​ខ្លួន​សេដ្ឋី​ ប៉ូឡូស្គី នៅ​រ៉ូស្សី ក្រោយ​ពី​បណ្ដេញ​ចេញ​ពី​កម្ពុជា

ប្រទេសកម្ពុជា បានបណ្ដេញមហាសេដ្ឋី លោក ស៊ែរហ្គៃ ប៉ូឡូស្គី ចេញពីទឹកដីខ្លួន កាលពីថ្ងៃអាទិត្យ តាមការស្នើសុំ ធ្វើ​បត្យាប័ន​របស់​ប្រទេសរ៉ូស្សី ក្នុងសំណុំរឿងអចលនវត្ថុ ដ៏ចម្រូងចម្រាស។ មកដល់ព្រលានយន្ដហោះអន្តរជាតិ នៃរដ្ឋធានីម៉ូស្គូ លោក ប៉ូឡូស្គី ត្រូវ​បាន​ចាប់​ខ្លួន និង​បញ្ជូន​យក​ទៅ​ឃុំ​ភ្លាមៗ។
Loading...
  • ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី១៧ ឧសភា ២០១៥
  • កែប្រែចុងក្រោយ: May 18, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

តុលាការរបស់ប្រទេសរ៉ូស្សី បានសង្ស័យលោក ស៊ែរហ្គៃ ប៉ូឡូស្គី អាយុ៤២ឆ្នាំ ពីបទលួចកិបកេង ប្រាក់រាប់លានដុល្លា នៅ​ក្នុងរឿងអាស្រូវនៃអចលនវត្ថុ តាំងពីច្រើនឆ្នាំ មកហើយ។ តំណាងមួយរូប ពីក្រសួងមហាផ្ទៃរ៉ូស្សី អ្នកស្រី អេឡេណា អាឡិចសៃវ៉ា (Elena Alexeïeva) បានប្រកាស នៅក្នុងសេចក្ដីប្រកាសព័ត៌មានមួយថា៖ «លោក ប៉ូឡូស្គី ត្រូវបានបញ្ជូនខ្លួន មក​ដល់​ប្រទេស​រ៉ូស្សី ហើយនឹងត្រូវរងចំណាត់ការ តាមផ្លូវច្បាប់»។

ក្រុមមេធាវីការពារក្ដី ឲ្យមហាសេដ្ឋីរូបនេះ បានធ្វើដំណើរទៅកាន់ព្រលានយន្ដហោះ ប៉ុន្តែពួកគេមិនបានជួបលោក ប៉ូឡូស្គី ទេ។

នៅខែ សីហា ឆ្នាំ២០១៤ តុលាការមួយរបស់ប្រទេសរ៉ូស្សី បានចេញដីកា ឲ្យតាមចាប់ខ្លួនលោក ប៉ូឡូស្គី ដែលជាអ្នកជំនួញ​ដ៏ល្បីម្នាក់ ពីបទបានចូលរួម នៅក្នុងការឆរបោកដ៏ធំមួយ ដែលមានទំហំជាទឹកប្រាក់ ប្រមាណជា ៥,៧ពាន់លានដុល្លា។ ទឹក​ប្រាក់​ទាំង​នេះ ប្រមូលបានពីក្រុមអ្នកវិនិយោគទុន ប្រមាណជាង ៨០នាក់ ដែលចូលទាក់ទងរកស៊ី ជាមួយលោក ប៉ូឡូស្គី។

ចំពោះលោក ប៉ូឡូស្គី វិញ បានបដិសេធកាលពីឆ្នាំទៅម៉ិញ នូវរាល់ទោសកំហុសទាំងអស់ ហើយបានបរិហារករណីនេះ ថា​ជា​សំនុំរឿង ដ៏«អស្ចារ្យ»មួយ ដែលមានមនុស្ស«អាក្រក់» ជាច្រើននាក់ បានចូលរួម។ លោកបានថ្លែងនៅពេលនោះថា៖ «ខ្ញុំ​អត់​មាន បានយកប្រាក់អ្វីទេ»។

បញ្ហាផុត«ទិដ្ឋាការ»

រីឯភរិយារបស់លោក អ្នកស្រី អ៊ុលហ្គា ដេរីប៉ាស្កា (Olga Deripaska) វិញ បានថ្លែងប្រកែក ទៅកាន់អ្នកសារព័ត៌មានថា លោក ប៉ូឡូស្គី មិនបានរស់នៅក្នុងប្រទេសកម្ពុជា ដោយខុសច្បាប់ ដូចការចោទប្រកាន់ របស់អាជ្ញាធរកម្ពុជានោះឡើយ។ អ្នកស្រី​បានពន្យល់ថា បើទោះជាទិដ្ឋាការ បានអស់សុពលភាព តាំងពីពីរឆ្នាំមុនក៏ដោយ តែ«យើងបានទទួល ទិដ្ឋាការថ្មី សម្រាប់​រយៈពេលមួយឆ្នាំ កាលពីខែវិច្ឆិកាកន្លងទៅនេះ»។

លោក ប៉ូឡូស្គី ត្រូវបានអាជ្ញាធរកម្ពុជា ឃាត់ខ្លួន នៅលើកោះដំឡូង ក្នុងឆកសមុទ្រ នៃខេត្តព្រះសីហនុ កាលពីរសៀល​ថ្ងៃ​ទី១៥ ខែឧសភា ឆ្នាំ២០១៥ ពីបទអស់សិទ្ធិរស់នៅ ស្របច្បាប់ ក្នុងប្រទេស។ កាលពី​ចុង​ខែ​ធ្នូ ឆ្នាំ​២០១២ មហាសេដ្ឋីរូបនេះ ក៏ធ្លាប់ត្រូវ​បានអាជ្ញាធរកម្ពុជា ចាប់ខ្លួន និងបន្ទាប់មក ត្រូវបាន​សាលាដំបូង ខេត្តព្រះសីហនុ ផ្ដន្ទាទោស​ ក្រោម​បទ​ចោទ​ប្រើ​ហិង្សា និង​ឃុំ​ខ្លួន​កម្មករ​ខ្មែរ ៦​នាក់​ដោយ​ខុស​ច្បាប់។ ប៉ុន្តែ លោក ប៉ូឡូស្គី បានមាន​សេរីភាព​វិញ ​ក្រោយ​ពី​កម្មករ​ទាំង ៦​នាក់ ព្រម​បញ្ចប់ និង​ដក​ពាក្យ​បណ្ដឹង ហើយ​ទទួល​សំណង​ ក្នុងម្នាក់ ២​ម៉ឺន​ដុល្លា។

កាលពីអំឡូងខែមេសា ឆ្នាំ២០១៤ តុលាការ​កំពូល នៃប្រទេសកម្ពុជា ​ធ្លាប់​បាន​ច្រានចោល ​សំណើ​សុំ​ធ្វើ​បត្យាប័ន ​ជា​ថ្មី​ទៀត របស់​ក្រសួង​ការបរទេស​កម្ពុជា (តាមការស្នើររបស់ប្រទេសរ៉ូស្សី) ដោយតុលាការសំអាងលើ កង្វះភស្ដតាងច្បាស់​លាស់ ពី​ខាង​អាជ្ញាធររ៉ូស្សី៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...